08-Feb-2025

ଯାଜପୁର/ବରୀ(ରଞ୍ଜିତ ମହାନ୍ତି): ସରକାର ବଦଳି ଥିଲେ ମଧ୍ୟ  ଯାଜପୁର ଜିଲ୍ଲାର ବିଭିନ୍ନ ସ୍ଥାନରୁ ଲଘୁ ଖଣିଜ ପଦାର୍ଥର ବ୍ୟାପକ ଚୋରା ଚାଲାଣ କିନ୍ତୁ ବନ୍ଦ ହେଉନାହିଁ । ବିଭିନ୍ନ ନଦୀରୁ ବାଲି ଚୋରା ଚାଲାଣ କମିବା ବଦଳରେ ବଢି ଚାଲିଛି  । ବାଲିର ବ୍ୟାପକ ଚୋରା ଚାଲାଣ ଦ୍ୱାରା ସରକାର ବ୍ୟାପକ ରାଜସ୍ୱ ହରାଇ ଚାଲିଛନ୍ତି । ହେଲେ ଏଥିପ୍ରତି ପ୍ରଶାସନ ପଦକ୍ଷେପ ଗ୍ରହଣ କରୁନାହିଁ । ପ୍ରଶାସନର ଦୁର୍ବଳତାର ସୁଯୋଗ ନେଇ ପ୍ରଭାବଶାଳୀ ବ୍ୟକ୍ତି ଶହ ଶହ ଟ୍ରିପ ବାଲି ନଦୀରୁ ବେଆଇନ ଭାବେ ଉତ୍ତୋଳନ କରି ତାକୁ ବିକ୍ରି କରି ଲକ୍ଷ ଲକ୍ଷ ଟଙ୍କା ରୋଜଗାର କରୁଥିଲା ବେଳେ ସରକାର କିନ୍ତୁ ରାଜସ୍ୱ ହରାଇ ଚାଲିଛନ୍ତି । ଏ ନେଇ ପ୍ରଶାସନ ପଦକ୍ଷେପ ନେବା ବଦଳରେ ଚୁପ ବସିବା ଚିନ୍ତାର ବିଷୟ ହୋଇଛି। ବାଲି ମାଫିଆଙ୍କ ଆଗକୁ ପ୍ରଶାସନ ଯିବାକୁ ସାହସ ଜୁଟାଇ ପାରୁ ନଥିଲା ବେଳେ କେହି ଯଦି ନିଜ ଘର କାମ ପାଇଁ ନଦୀରୁ ବାଲି ଉଠାଉଛି ତେବେ ତା ନାଁରେ ମାମଲା ରୁଜୁ କରୁଥିବା ଅଭିଯୋଗ ହେଉଛି । ବରୀ ବ୍ଲକରେ ପ୍ରବାହିତ ବିଭିନ୍ନ ନଦୀରୁ ବ୍ୟାପକ ବାଲି ଚୋରା ଚାଲାଣ ହେଉଥିଲା ବେଳେ ଉଦୟନାଥପୁର ପଞ୍ଚୟତର ପୁଣ୍ଟିଆ ପଡ଼ିଆରେ ଗଦା ହୋଇଥିବା ଶହ ଶହ ଟ୍ରିପ ବାଲି କାହାର ବୋଲି ପ୍ରଶ୍ନ ହୋଇଛି । ଏହି ପଡ଼ିଆଟି ଗୋଚର ଜମି ବୋଲି ମଧ୍ୟ ଅଭିଯୋଗ ହୋଇଛି । ହେଲେ ଏହି ଗୋଚର ଜମି ଏବେ ବାଲି ଗଦାରେ ପରିଣତ ହୋଇଛି । ଜନୈକ ପ୍ରଭାବଶାଳୀ ବ୍ୟକ୍ତି ଏହି ବିପୁଳ ପରିମାଣ ବାଲି ଗଦା କରି ରଖି ବିକ୍ରି କରୁଥିଲା ବେଳେ ବରୀ ପ୍ରଶାସନ ଏହା ଜାଣି ମଧ୍ୟ ଅଜଣା ବସିଥିବା ପଞ୍ଚାୟତବାସୀ ଅଭିଯୋଗ କରିଛନ୍ତି । ଅନ୍ୟ ପକ୍ଷରେ ବାଲି ବ୍ୟବସାୟରୁ ବେଶ କିଛି ଅର୍ଥ ଭାଗବଣ୍ଟା ହେଉଥିବାରୁ ପ୍ରଶାସନ ଚୁପ ରହିଥିବା ଅଭିଯୋଗ ହେଉଛି । ଏହି ବାଲି ନିକଟସ୍ଥ ଚିଙ୍ଗୁଡ଼ିଆ ନଦୀରୁ ଜେସିବି ସାହାଯ୍ୟରେ ଉତ୍ତୋଳନ ହୋଇ ରଖାଯାଇଛି ବୋଲି ଜଣା ଯାଇଛି । ଏ ନେଇ ଜିଲ୍ଲାପାଳ ତଦନ୍ତ କରି ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି ।