16-Sep-2024

ବଲାଙ୍ଗୀର,(ପ୍ରେରଣା ଖବର)-ବଲାଙ୍ଗିର ସହର ମଧ୍ୟଦେଇ ଯାଇଥିବା ଏନଏଚ୍ ୨୦୧ ବରଗଡ-ବୋରିଗୁମା ରାସ୍ତା ଉପରେ ଦୀର୍ଘଦିନ ହେଲା ପଡି ରହିଛି ଇଟା ଓ ବାଲି । ଜିଲ୍ଲାପାଳ, ଉପଜିଲ୍ଲାପାଳଙ୍କ ସମେତ ବିଭିନ୍ନ ଅଧିକାରୀ ପ୍ରତ୍ୟେକ ଦିନ ଏହି ରାସ୍ତା ଦେଇ ଯିବା ଆସିବା କରୁଥିବା ବେଳେ ତାଙ୍କର ମଧ୍ୟ ଏଥିପ୍ରତି ଧ୍ୟାନ ନାହିଁ । କିଛିଦିନ ତଳେ ନୂଆଁଖାଇ ସମୟରେ ଓଡିଶାର ଉପମୁଖ୍ୟମନ୍ତ୍ରୀ, ବଲାଙ୍ଗିର ସାଂସଦ ଏବଂ ସ୍ଥାନୀୟ ବିଧାୟକ ମଧ୍ୟ ଏହି ରାସ୍ତା ଦେଇ ତାଙ୍କ ପେଲେସକୁ ଯାଇଥିଲେ ନୂଆଁଖାଇବାକୁ । କିନ୍ତୁ କାହାରି ନଜର ଏହି ମୁଖ୍ୟରାସ୍ତାରେ ପଡି ରହିଥିବା ଇଟା ବାଲି ଉପରେ ପଡି ନଥିଲା ।   ପ୍ରକାଶ ଯେ, ପିଡବ୍ଲୁଡି କାର୍ଯ୍ୟାଳୟ ପାଖରେ ଥିବା ଟିପିଡବ୍ଲୁଡିଏଲ ଗ୍ରିଭେନ୍ସସେଲ୍ ଫୋରମ କାର୍ଯ୍ୟାଳୟ ସମ୍ମୁଖରେ ଥିବ ଏନଏଚ୍ ରାସ୍ତାକୁ ଲାଗି ଚାଲିଥିବା ଅବୈଧ ନିର୍ମାଣ କାମକୁ ନେଇ ଅଭିଯୋଗ ହୋଇଥିଲା । ଅଭିଯୋଗ ପରେ କାମ ବନ୍ଦ ଥିବା ଦେଖିବାକୁ ମିଳିଛି । କିନ୍ତୁ ୨ମାସ ହେଲା ଏହି ରାସ୍ତା ଉପରେ ଇଟା ଓ ବାଲି ପଡି ରହିଥିବା ଏବଂ ଏହା ଯୋଗୁଁ ଦୁର୍ଘଟଣାମାନ ଘଟୁ ଥିବା ଲୋକେ ଅଭିଯୋଗ କରିଛନ୍ତି । ଏନେଇ ଆମେ ଏନଏଚ୍ ବିଭାଗର ଅଧିକ୍ଷଣ ଯନ୍ତ୍ରୀଙ୍କୁ ପଚାରିବାରୁ ଆମେ ଜାଣି ନାହୁଁ, ଏହା ବଲାଙ୍ଗିର ମୁନିସିପାଲିଟି କାମ କରୁଥିବ ବୋଧେ । ତେବେ ମୁନିସିପାଲିଟି ଆପଣଙ୍କ ବିଭାଗରୁ ଅନୁମତି ନେଇଛନ୍ତି କି ବୋଲି ପଚାରିବାରୁ ନେଇ ନାହାନ୍ତି, ଆମେ ତାଙ୍କୁ ଚିଠି କରିବୁ ବୋଲି ବହୁ ହାଲୁକା ଭାବରେ ଉତ୍ତର ରଖିଥିଲେ ଅଧୀକ୍ଷଣ ଯନ୍ତ୍ରୀ । ପରେ ଏନେଇ ଆମେ ବଲାଙ୍ଗିର ମୁନିସିପାଲିଟି ନିର୍ବାହୀ ଅଧିକାରୀ ଇଂ ବିଶ୍ୱମ୍ବର ମିଶ୍ରଙ୍କ ସହ ଆଲୋଚନା କରିଥିଲୁ । ନିର୍ବାହୀ ଅଧିକାରୀ ଶ୍ରୀ ମିଶ୍ରଙ୍କ କହିବା ଅନୁସାରେ ଏହି କାମ ପାଇଁ ଏନଏଚ୍ ରୁ କୌଣସି ଅନୁମତି ଅଣାଯାଇ ନାହିଁ । ଗତ ଜିଲ୍ଲାପାଳଙ୍କ ସମୟରେ ସୌନ୍ଦର୍ଯ୍ୟକରଣ କରିବା ନେଇ ଆଲୋଚନା ହୋଇଥିଲା । ସୌନ୍ଦର୍ଯ୍ୟକରଣ ପାଇଁ ଛୋଟ ବାଡ ଦେଇ ଗଛ ଲଗା ଯିବାର ବ୍ୟବସ୍ଥା କରାଯାଇଛି । ବଲାଙ୍ଗିର ସହରର ବହୁ ଯାଗାରେ ସୌନ୍ଦର୍ଯ୍ୟକରଣ କରାଯିବା ପାଇଁ ବାଡ ଦେଇ ଗଛ ଲଗାଯାଇଛି । କିନ୍ତୁ ତାର ଦେଖାରେଖା କରାଯାଉଛି କି ବୋଲି ପାଚାରିବାରୁ ତାହା କରାଯାଇ ପାରୁନାହିଁ ବୋଲି ଉତର ରଖିଥିଲେ ନିର୍ବାହୀ ଅଧିକାରୀ ଶ୍ରୀ ମିଶ୍ର । ତେବେ ଏଠାରେ ପ୍ରଶ୍ନ ଉଠୁଛି ଯେ, ବିନା ଦେଖାରେଖାରେ ସୌନ୍ଦର୍ଯ୍ୟକରଣ ନାଁରେ ବାଡ ଦେଇ କିଛି ଗଛ ଲାଗାଯାଇ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯିବା କେତେ ଯୁକ୍ତିଯୁକ୍ତ । ଅନ୍ୟପଟେ ସୌନ୍ଦର୍ଯ୍ୟକରଣ କରାଯାଇଥିବା ସ୍ଥାନମାନଙ୍କର ଦେଖାରେଖା କରା ନଯିବାରୁ ଉକ୍ତ ସ୍ଥାନମାନଙ୍କ ଅନାବନା ଗଛ ଲତା ହେବା ସହ ଉକ୍ତ ସ୍ଥାନ ଗୁଡିକ ଅସୁନ୍ଦର ଦେଖାଯାଉଛି ଏବଂ ସଂଧ୍ୟା ହେଲେ ଆସାମାଜିକ ଯୁବକମାନଙ୍କ ଆଡ୍ଡାସ୍ଥଳୀ ପାଲଟିଥିବା ଓ ମଦ ଗଂଜେଇର ଆସର ଜମୁଥିବା ଦେଖିବାକୁ ମିଳୁଛି । ଏପରିକି କାମ ଚାଲିଥିବା ସ୍ଥାନରେ କୌଣସି ସୂଚନାଫଳକ ନଥିବା କିଏ କାମ କରୁଛି, କେତେ ଟଙ୍କାର କାମ, କି କାମ କରାଯାଉଛି, କେବେ ଆରମ୍ଭ ହେଲା କେତେ ଦିନରେ କାମ ସଂପୂର୍ଣ୍ଣ ହେବ କାହକୁ ଜଣା ନାହିଁ । ସୌନ୍ଦର୍ଯ୍ୟକରଣ ନାଁରେ ଏହା କିଛି ଠିକାଦାରଙ୍କୁ ତୁଷ୍ଟିକରଣ କରିବା ଏବଂ ଟଙ୍କା ବାଟମାରଣ କରିବାର ମାଧ୍ୟମ ବୋଲି ଚର୍ଚ୍ଚା ହେଉଛି । ତୁରନ୍ତ ରାସ୍ତା ଉପରେ ପଡି ରହିଥିବା ଇଟା ବାଲି କୁ ରାସ୍ତା ଉପରୁ  ହଟାଇବା ସହ ବିନା ଅନୁମତିରେ ତିଆରି ହୋଇଥିବା ଏହି ବାଡକୁ ଭାଙ୍ଗିବା ପାଇଁ ସାଧାରଣରେ ଦାବି ହେଉଛି । ନଚେତ ଆଗାମୀ ଦିନରେ ଯଦି କୌଣସି ବଡ ଦୁର୍ଘଟଣା ଘଟେ ତେବେ ବିଭାଗୀୟ ଅଧିକାରୀ ଦାୟୀ ରହିବେ ।