11-Sep-2024

ପାଟଣାଗଡ[ପୂର୍ଣ୍ଣ ଶଶୀ ଶେଖର ରାଓ]ଗତକାଲି  ବଲାଙ୍ଗିର ଜିଲ୍ଲା ବେଲପଡା ବ୍ଳକ ନୁନହାଡ ଗାଁ ରେ ଘଟିଥିଲା ଏକ ଚାଞ୍ଚଲ୍ୟକର ଦୁର୍ଘଟଣା। ଯାହାକି ଅଞ୍ଚଳ ରେ ଖେଳିଯାଇଛି ଶୋକର ଛାୟା। ସୂଚନା ଅନୁସାରେ ସନ୍ଧ୍ୟା ୫ ଟା ସମୟରେ ଉକ୍ତ ଗ୍ରାମର ତିନୋଟି ଝିଅ ଭୋଲେଶ୍ବରୀ ମାଝୀ,ପ୍ରତିମା ମାଝୀ ଏବଂ ଦେମତୀ ମାଝୀ ନିଜ ଘର ସମ୍ମୁଖ ପିଣ୍ଡାରେ ବସି କଥାବାର୍ତ୍ତା ହେଉଥିବା ବେଳେ ଉକ୍ତ ଗ୍ରାମର ସନ୍ ସାଇନ୍ ହୋଟେଲ ମାଲିକ ଶୁଶିଲ କୁମାର ସାହୁ ନିଜ କିଣିଥିବା ନୂଆ କାର୍ ଗାଡ଼ି ନମ୍ବର OD03AC 3771 ରେ ତିନି ଜଣଙ୍କୁ ଜୋର ରେ ଧକ୍କା ମାରିଦେଲେ ଏବଂ ସେଠାରୁ ଚମ୍ପଟ ମାରିଥିଲେ। ତିନୋଟି ଝିଅ କୁ ରକ୍ତାକ୍ତ ଅବସ୍ଥା ରେ ଗ୍ରାମବାସୀ ପ୍ରଥମେ ବେଲପଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର କୁ ଆଣିଥିବା ବେଳେ ଡ଼ାକ୍ତର ତାଙ୍କୁ ପାଟଣାଗଡ଼ ଉପଖଣ୍ଡ ଚିକିତ୍ସାଳୟକୁ ସ୍ଥାନାନ୍ତରିତ କରିଥିଲେ। ଉପଖଣ୍ଡ ଚିକିତ୍ସାଳୟରେ ଡାକ୍ତର ଭୋଲେଶ୍ବରୀ ମାଝୀ କୁ ମୃତ ଘୋଷଣା କରିଥିବା ବେଳେ ଅନ୍ୟ ଦୁଇ ଜଣଙ୍କ ଚିକିତ୍ସା କରିଥିଲେ। ମୃତ୍ୟୁ ଖବର ପାଇ ପରିବାର ଓ ଗ୍ରାମବାସୀମାନେ ଉତ୍କ୍ଷୀପ୍ତ ହୋଇ ନୁନହାଡ ଗାଁ ବସଷ୍ଟାଣ୍ଡ ଠାରେ ନିଆଁ ଲଗାଇ ରାସ୍ତା ଅବରୋଧ କରିଥିଲେ। ଗତକାଲି ସନ୍ଧ୍ୟା ୮ ଟା ରୁ ରାତ୍ର ୨ ଟା ପର୍ଯ୍ୟନ୍ତ ରାସ୍ତାରୋକ କରାଯାଇଥିଲା । ରାତିରେ ପାଟଣାଗଡ଼ ଉପଖଣ୍ଡ ପୋଲିସ ଅଧିକାରୀ ସଦାନନ୍ଦ ପୁଝାରୀ ବେଲ ପଡ଼ା  ଥାନା ଅଧିକାରୀ ଅନନ୍ତ ପ୍ରଧାନ, କଣ୍ଟାବାଞ୍ଜି ଥାନା ଅଧିକାରିଣୀ ରଶ୍ମିତା ବେହେରା, ଖପ୍ରାଖୋଲ ଥାନା ଅଧିକାରୀ ନରେନ୍ଦ୍ର ଛତର ସଦଳବଳେ ଘଟଣାସ୍ଥଳରେ ଉପସ୍ଥିତ ରହିଥିଲେ ଏବଂ ଲୋକ ଙ୍କୁ ବୁଝାସୁଝା କରି ରାତି ୧ ଟାରେ ଆନ୍ଦୋଳନ ପ୍ରତ୍ୟାହୃତ କରାଇଥିଲେ। ଘଟଣା ର ସମାଧାନ ନହେବା ଯୋଗୁଁ ଆଜି ପୁଣି ଥରେ ଜନଆନ୍ଦୋଳନ ତେଜିଥିଲା। ସକାଳ ୭ ଟା ରୁ ସନ୍ଧ୍ୟା ୪  ଟା ପର୍ଯ୍ୟନ୍ତ ୪୨ ନମ୍ବର ରାଜପଥ ରୋକ୍ କରାଯାଇଥିଲା। ଆନ୍ଦୋଳନ ରେ ପ୍ରଭାବିତ ହୋଇ ରାସ୍ତା ଉପରେ ଗମନାଗମନ ର ଅସୁବିଧା ହୋଇଥିଲା। ଘଟଣା ସ୍ଥଳରେ ଅତିରିକ୍ତ ଆରକ୍ଷୀ ଅଧିକ୍ଷକ ହେମନ୍ତ କୁମାର ପାଢ଼ୀ,ଡି ଏସ ପି , ଉପଖଣ୍ଡ ପୋଲିସ ଅଧିକାରୀ ସଦାନନ୍ଦ ପୁଝାରୀ,ବେଲପଡା ଥାନା ଅଧିକାରୀ ଅନନ୍ତ ପ୍ରଧାନ, କଣ୍ଟାବାଞ୍ଜି ଥାନା ଅଧିକାରିଣୀ ରଶ୍ମିତା ବେହେରା, ପାଟଣାଗଡ଼ ଥାନା ଅଧିକାରିଣୀ ତାରାବତୀ ପ୍ରଧାନ, ରିଜର୍ଭ ସିପାହୀ ଏବଂ ମାଜିଷ୍ଟ୍ରେଟ ଭାବେ ବେଲପଡା ତହସିଲଦାର ଜ୍ଞାନ ରଞ୍ଜନ ମାଝୀ ଓ ସହକାରୀ ଜିଲ୍ଲାପାଳ ପଦ୍ମନାଭ ମହାରଣା ଉପସ୍ଥିତ ରହି ମୃତକ ପରିବାର କୁ ରେଡ଼କ୍ରସ ପାଣ୍ଠିରୁ ୧୫୦୦୦ ହଜାର ଟଙ୍କା ପ୍ରଦାନ କରିଥିଲେ ଏବଂ ଗାଡ଼ି ଚାଲକ ଠାରୁ ଆହତଙ୍କ ଚିକିତ୍ସା ଏବଂ ମୃତକ ପରିବାର କୁ ସହାୟତା ପ୍ରଦାନ କରାଯିବ ବୋଲି ଉପଖଣ୍ଡ ପୋଲିସ ଅଧିକାରୀ ସଦାନନ୍ଦ ପୁଝାରୀ କହିଥିବା ବେଳେ ଉତ୍ତ୍ୟକ୍ତ ଲୋକ ଶାନ୍ତି ହୋଇ ଧାରଣା ରୁ ଓହରି ଥିଲେ। ଉକ୍ତ ଗାଡ଼ି ଚାଲକ ତଥା ଢ଼ାବା ମାଲିକଙ୍କ ଗାଡ଼ି କାଗଜପତ୍ର ଠିକ୍ ଅଛି ନାଁ ନାହିଁ ଏବଂ ତାଙ୍କର ଡ୍ରାଇଭିଂ ଲାଇସେନ୍ସ ଅଛି କି ନାହିଁ ତାହା ତର୍ଜମା କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଅଞ୍ଚଳବାସୀ ଦାବି କରିଛନ୍ତି।