04-Sep-2024

ବଲାଙ୍ଗିର,ମୁକ୍ତା ଯୋଜନାରେ ବଲାଙ୍ଗିର ମ୍ୟୁନିସିପାଲିଟିକୁ କୋଟି କୋଟି ଟଙ୍କା ଆସିଛି । ତାହାକୁ କିପରି ଖର୍ଚ୍ଚ କରାଯିବ ଏବଂ ଠିକାଦାର ପୋଷା ଯିବ ସେନେଇ ଯୋଜନା ତିଆରି କରାଯାଉଛି । ମୁକ୍ତା ଯୋଜନାର ଆଳ ଦେଖାଇ ପୌରପାଳିକା କାମ ଦରକାର ନଥିବା ଜାଗାରେ ମଧ୍ୟ କାମ କରି ଟଙ୍କା ବାଟମାରଣ କରିବାର ବ୍ୟବସ୍ଥା କରୁଥିବା ନେଇ ବାରମ୍ବାର ଅଭିଯୋଗ ହେଉଛି । ଏହି ଯୋଜନାରେ ଏସଏଚଜିମାନଙ୍କୁ ସମ୍ମୁଖରେ ରଖି କିଛି ଠିକାଦାରଙ୍କ ଜରିଆରେ କାମ ଚାଲିଥିବା ଏବଂ ଏହା ପଛରେ ଜଣେ ଆଂଚିଳକ ଦଳର ନେତା ଥିବା ନେଇ ମଧ୍ୟ ଅଭିଯୋଗ ହେଉଛି । ଗତ ଦୁଇଦିନ ତଳେ ବଲାଙ୍ଗିର ସହରର ୧୫ନଂ ୱାଡ ର ରାମ ମନ୍ଦିର ଛକରୁ ସହିଦ ଭଗତ ସିଂ କ୍ଲବ ପର୍ଯ୍ୟନ୍ତ ପେଭର ବ୍ଲକ କାମ କରାଯାଇଛି । କାମ ଆରମ୍ଭ ହେଲା ମାତ୍ରେ ସ୍ଥାନୀୟ ଲୋକେ ଗତ ୨୩ ତାରିଖ ଦିନ ବଲାଙ୍ଗିର ମ୍ୟୁନିସିପାଲିଟି ନିର୍ବାହୀ ଅଧିକାରୀ ବିଶ୍ୱମ୍ବର ମିଶ୍ରଙ୍କ ନିକଟରେ ଅଭିଯୋଗ କରିଥିଲେ । ସ୍ଥାନୀୟ ଲୋକଙ୍କ କହିବା ଅନୁସାରେ, କିଛି ମାସ ତଳେ ଏହି ରାସ୍ତାରେ ପିଚୁ କାମ କରାଯାଇଥିଲା ଏବଂ ରାସ୍ତା ଠିକ ଅଛି । ତେଣୁ ଏହି ରାସ୍ତାର କାମ କରିବାର କୌଣସି ଆବଶ୍ୟକ ନାହିଁ । ଯଦି କାମ କରିବାର ଅଛି ତେବେ ଏହି ପିଚୁ ରାସ୍ତାକୁ ଖୋଳି ସରକାରଙ୍କ ନିର୍ଦ୍ଦେଶାବଳୀ ପାଳନ କରି କାମ କରାଯାଉ । ଅଭିଯୋଗ ପରେ ପୌର ଯନ୍ତ୍ରୀ ଇଂ ପ୍ରଶାନ୍ତ ନାଏକଙ୍କୁ ପୌର ନିର୍ବାହୀ ଅଧିକାରୀ ତଦନ୍ତ କରିବାକୁ ନିର୍ଦ୍ଦେଶ ଦେଇଥିଲେ । କିନ୍ତୁ  ତଦନ୍ତ ପୂର୍ବରୁ ଓ ନିର୍ବାହୀ ଅଧିକାରୀଙ୍କ ଅଜାଣତରେ ତରବରିଆ ଭାବରେ ରାତି ଅଧରେ ପିଚୁ ରାସ୍ତା ଉପରେ ଅଧ ଇଂଚର ବାଲି ପକାଇ ନିମ୍ନମାନର ପେଭର ବ୍ଲକ ବସାଇ କାମ ସାରି ଦିଆଯାଇଛି । ଏଠାରେ ପ୍ରଶ୍ନ

ଉଠୁଛି ଯେ, ନିର୍ବାହୀ ଅଧିକାରୀଙ୍କୁ ସ୍ଥାନୀୟ ବାସିନ୍ଦା ଅଭିଯୋଗ କଲାପରେ ଉନ୍ନତ ମାନର କାମ ହେବା ବଦଳରେ ତରବରିଆ ଭାବରେ ଉକ୍ତ ପିଚୁ ରାସ୍ତା ଉପରେ କିପରି ମାତ୍ର ଅଧ ଇଂଚ ବାଲି ବିଛାଯାଇ ପେଭର ବ୍ଲକ ବସାଇଦିଆ ଗଲା ।  ମ୍ୟୁନିସିପାଲିଟି ଏମଇ(ଯନ୍ତ୍ରୀ)ଙ୍କ ଅହେତୁକ ଅନୁକମ୍ପା ଯୋଗୁଁ କାମ ବନ୍ଦ ହେବା ବଦଳରେ ରାତି ଅଧିଆ କାମ ସମ୍ପୂର୍ଣ୍ଣ କରାଯାଇଛି ଏବଂ ଯନ୍ତ୍ରୀମାନଙ୍କ ଆଗରେ ପୌର ନିର୍ବାହୀ ଅଧିକାରୀ ଅସହାୟ ହୋଇ ପଡିଥିବା ସାଧାରଣରେ ଚର୍ଚ୍ଚା ହେଉଛି ।  ମ୍ୟୂନିସିପାଲିଟି ନିର୍ବାହୀ ଅଧିକାରୀ ଏହାର ତଦନ୍ତ କରାଯିବ ବୋଲି କହିଥିବା ବେଳେ ସ୍ଥାନୀୟ ଲୋକଙ୍କ ଏହି ତଦନ୍ତ ଉପରେ ଭରସା ନଥିବା ଜଣାଯାଇଛି । ମୁକ୍ତା ଯୋଜନା ନିର୍ଦ୍ଦେଶାବଳୀ ଅନୁସାରେ, ଯେଉଁ ରାସ୍ତରେ ପେଭର ବ୍ଲକ ବସାଯିବ ସେହି ରାସ୍ତାକୁ ୮ ଇଂଚ ଖୋଳାଯାଇ ୪ ଇଂଚର ପଥର ଗୁଣ୍ଡ ଓ ମେଟାଲ ଆସ୍ତରଣ ଦେବା ପରେ  ୨ଇଂଚ ବାଲି ବିଛାଯିବା ପରେ ପେଭର ବ୍ଲକ ବସାଯିବା କଥା । ମାତ୍ର ବଲାଙ୍ଗିର ମ୍ୟୁନିସିପାଲିଟି ପକ୍ଷରୁ ସହରର ବିଭିନ୍ନ ପଡାରେ କରାଯାଇଥିବା ପେଭର ବ୍ଲକ କାମରେ ପିଚୁ ଓ କଂକ୍ରିଟ ରାସ୍ତାକୁ ଖୋଳା ନଯାଇ ତାଉପରେ ଇଂଚେ କିମ୍ବା ଅଧ ଇଂଚର ବାଲି ବିଛାଯାଇ ପେଭର ବ୍ଲକ ବସାଇ ଦିଆଯାଇଥିବା ଅଭିଯୋଗ ହେଉଛି । ଫଳରେ ରାସ୍ତା ନିର୍ମାଣର କିଛିଦିନ ପରେ ପେଭର ବ୍ଲକ ଦବି ଯିବା ସହ ରାସ୍ତାରେ ଖାଲଖମା ସୃଷ୍ଟି ହୋଇ ପାଣି ଜମିରହିବା ଓ ଛୋଟମୋଟ ଦୁର୍ଘଟଣା ହେଉଥିବା ଦେଖିବାକୁ ମିଳୁଛି । ଜିଲ୍ଲାପାଳ ଏଥିପତ୍ର ଦୃଷ୍ଟି ଦେବା ସହ ଏକ ଉଚ୍ଚସ୍ତରୀୟ ତଦନ୍ତ ଏବଂ ଦୋଷି ବିରୋଧରେ କାର୍ଯାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ପଡାବାସୀ ଦାବି କରିଛନ୍ତି ।