-+91-9937148622 |
prerana_bgr@rediffmail.com |
Monday 4th May 2026 |
R.N.I. Regd No. ODIODI/2010/46693
Breaking News
23-Aug-2024
ସୋନପୁର(ପ୍ରେରଣା ଖବର): ସୁବର୍ଣ୍ଣପୁର ଜିଲ୍ଲାର ଏମୁଣ୍ଡ ଓ ସେମୁଣ୍ଡର ଦୁଇଟି ଅଭ୍ୟନ୍ତର ଅଞ୍ଚଳର ଆଦିବାସୀ କଲ୍ୟାଣ ବିଭାଗର ଆଶ୍ରମସ୍କୁଲ୍ ଏତେ ବ୍ୟବସ୍ଥିତ ଓ ସୁସଜ୍ଜିତ ଯେ ଆଖିରେ ନ ଦେଖିଲେ ଜଣେ ବିଶ୍ବାସ କରିପାରିବ ନାହିଁ। ସ୍କୁଲ୍ ଭିତରର ଲନ୍, ବଗିଚା, ପରିବେଶ, ଶ୍ରେଣୀକୋଠରୀ, ପିଲାଙ୍କ ଖାଦ୍ୟପେୟ , ଶିକ୍ଷାଦାନରୁ ଶୃଙ୍ଖଳା ପର୍ଯ୍ୟନ୍ତ ସବୁକିଛି। ଅନ୍ୟ ସ୍କୁଲ୍ ଗୁଡିକର ଏହା ଅନୁକରଣୀୟ। ଏହାର ଶ୍ରେୟ ନିଶ୍ଚିତ ଭାବରେ ସ୍କୁଲର ପ୍ରଧାନ ସେବକ ବା ପ୍ରଧାନଶିକ୍ଷକ , ସମସ୍ତ ଶିକ୍ଷକ, କର୍ମଚାରୀ, କମିଟି, ଗ୍ରାମବାସୀ ଓ ଜିଲ୍ଲା ଅଧିକାରୀଙ୍କର ।
ସୋନପୁର ବ୍ଲକ୍ ଲଛିପୁର ନିକଟବର୍ତ୍ତୀ ଅସୁରମୁଣ୍ଡା ଗ୍ରାମରେ ରହିଛି ଆଦିବାସୀ କଲ୍ୟାଣ ବିଭାଗର ଏହି ନନ୍ଦନକାନନ ଆଶ୍ରମସ୍କୁଲ୍ ଟି । ଏହାର ହେଡ୍ ମାଷ୍ଟର ଅଛନ୍ତି ବୃନ୍ଦାବନ ବଢେଇ । ସେ ଗତ ୩୦/୯/୨୦୦୬ ରୁ ୧୩/୧/୨୦୧୨ ପର୍ଯ୍ୟନ୍ତ ଏଠାରେ ଏହି ଦାୟିତ୍ୱରେ ଥିଲେ ଓ ଏବେ ଦ୍ବିତୀୟବାର ଗତ ୧/୮/୨୦୧୨ରୁ ଅଛନ୍ତି । ସ୍କୁଲ୍ ର ଛାତ୍ରଛାତ୍ରୀଙ୍କ ମୋଟ ସଂଖ୍ୟା ୩୪୫ ଓ ୪ ଟି ହଷ୍ଟେଲ (୪୦ ଆସନର ବାଳିକା , ୧୦୦ ଅନୁସୂଚୀତ ଜାତିର ବାଳିକା, ୧୦୦ ଅନୁସୂଚିତ ଜନଜାତିର ବାଳିକା ଓ ୧୦୦ ଅନୁସୂଚିତ ଜନଜାତିର ବାଳକ) ଏମିତି ମିଶି ମୋଟ ୨୬୮ ଛାତ୍ରଛାତ୍ରୀ ଅନ୍ତେବାସୀ ଅଛନ୍ତି । ୭ ଜଣ ସହକାରୀ ଶିକ୍ଷକ/ଶିକ୍ଷୟିତ୍ରୀ ଓ ୬ ଜଣ ରାନ୍ଧୁଣୀ ବା ସିସିଏ ଅଛନ୍ତି । ଗ୍ରାମର ମାଆ ଜଗଦମ୍ବା ଏସ୍ ଏଚ୍ ଜି ମଧ୍ୟାହ୍ନ ଭୋଜନର ଦାୟିତ୍ୱ ନେଇଛନ୍ତି । ଅଭିଭାବକ କମିଟିର ସଭାନେତ୍ରୀ ଅଛନ୍ତି ଗୌରୀ ନାଏକ । ସିସିଟିଭି ଲାଗିଛି । ପାନୀୟଜଳ ପାଇଁ ଆକ୍ବାଗାର୍ଡ ଲାଗିଛି । ପାଚେରୀ ଅଛି । ତେବେ ଏଠାରେ ଗୋଟିଏ ଅସୁବିଧା ଯେ ସ୍ଥାନାଭାବ ଯୋଗୁଁ ଖେଳପଡିଆ ନାହିଁ । ସ୍କୁଲ୍ ପରିବେଶ ଅତ୍ୟନ୍ତ ସୁସଜ୍ଜିତ । ଏଠାରେ ଅଶୋକଚକ୍ର ସ୍ଥାପନା ଏହାର ଗୁରୁତ୍ୱକୁ ଆହୁରି ବଢାଇ ଦେଇଛି । ଏହି ବିଦ୍ୟାଳୟଟି ସୁବର୍ଣ୍ଣପୁର ଡି ଡବ୍ଲୁ ଓ ଅଚ୍ୟୁତାନନ୍ଦ ସିଂଙ୍କ ତତ୍ତ୍ବାବଧାନରେ ଚାଲିଛି । ପଚାରିବାରୁ ଜଣାଗଲା ଏଡିଡବ୍ଲୁଓ ସଂଯୁକ୍ତା ମାଝି ଗତ ଜୁଲାଇ ୨୭ ତାରିଖରେ ଏଠାକୁ ଭିଜିଟ୍ କରିଥିଲେ ଓ ଡବ୍ଲୁଇଓ ସୌରଭ ଦାନୀ ପ୍ରତିମାସରେ ଆସନ୍ତି। ସ୍ବାସ୍ଥ୍ୟବିଭାଗର ଆର ବି ଏସକେ ଟିମ୍ ମଧ୍ୟ ନିୟମିତ ପିଲାଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରିଥାନ୍ତି । ଦୁଇଥର ଦାୟିତ୍ୱ ନେଇଥିବା ଜଣେ ଆଦିବାସୀ ପ୍ରଧାନସେବକଙ୍କ ନିଷ୍ଠା ଓ ଆନ୍ତରିକତା ଯୋଗୁଁ ଏସବୁ ସହିତ ପାଠପଢା ଓ ପରିଚାଳନାଗତ ଶୃଙ୍ଖଳା ସବୁଠାରୁ ଗୁରୁତ୍ୱପୂର୍ଣ୍ଣ ।
ଏହି ଜିଲ୍ଲାର ଆରମୁଣ୍ଡରେ ଉଲୁଣ୍ଡା ବ୍ଲକ୍ ର ପାତାଳୀଶ୍ରୀକ୍ଷେତ୍ର ନିକଟସ୍ଥ ଖୁଣ୍ଟ ସମଲେଇ ପଞ୍ଚାୟତର କୁଞ୍ଜାମାଲ ଗ୍ରାମରେ ମଧ୍ୟ ରହିଛି ଏହିପରି ଆଉ ଏକ ସୁନ୍ଦର ସୁବ୍ୟବସ୍ଥିତ ଆଶ୍ରମସ୍କୁଲ୍ । ଏହାର ପ୍ରଧାନଶିକ୍ଷକ ଅଛନ୍ତି ସୁଧାଂଶୁ ଶେଖର ପଣ୍ଡା । ଏଠାରେ ୬ ଜଣ ଅତିଥି ଶିକ୍ଷକ ଓ ମାତ୍ର ୪ ଜଣ ସ୍ଥାୟୀ ଶିକ୍ଷକ ଅଛନ୍ତି । ତେବେ ସେତିକି ୪ ଟି ହଷ୍ଟେଲରେ ମୋଟ ୪୧୦ ଛାତ୍ରଛାତ୍ରୀଙ୍କ ମଧ୍ୟରୁ ୩୪୭ ଅନ୍ତେବାସୀଙ୍କୁ ପ୍ରଧାନଶିକ୍ଷକଙ୍କ ସମେତ ୨ ଜଣ ମେଟ୍ରନ୍ ଓ ସିସିଏ ମାନେ ସମୂଭାଳନ୍ତି । ଏଠାରେ ଅତିଥି ଶିକ୍ଷକ/ଶିକ୍ଷୟିତ୍ରୀଙ୍କ ବଦଳରେ ସମସ୍ତ ସ୍ଥାୟୀ ଶିକ୍ଷକ/ଶିକ୍ଷୟିତ୍ରୀଙ୍କୁ ଦିଆଯିବା ଆବଶ୍ୟକ ବୋଲି ସ୍ଥାନୀୟ ଲୋକେ ମତବ୍ୟକ୍ତ କରନ୍ତି । ତେବେ ସେ ଯା'ହେଉ , ଏହି ସ୍କୁଲର ଉଚ୍ଚପାଚେରୀ, ଶ୍ରେଣୀକୋଠରୀ ଓ ହଷ୍ଟେଲ, ପରିବେଶ ଇତ୍ୟାଦି ସୁବ୍ୟବସ୍ଥିତ ଓ ସୁସଜ୍ଜିତ। ସର୍ବୋପରି ସୁବର୍ଣ୍ଣପୁର ଜିଲ୍ଲାର ଆଦିବାସୀ କଲ୍ୟାଣ ବିଭାଗର ଏଇ ଦୁଇଟି ଆଶ୍ରମସ୍କୁଲ୍ ଅନ୍ୟାନ୍ୟ ପଡୋଶୀ ଜିଲ୍ଲାର ଉକ୍ତ ବିଭାଗର ଆଶ୍ରମସ୍କୁଲ୍ ଠାରୁ ଯଥେଷ୍ଟ ଉନ୍ନତ ।