01-Aug-2024

ବଲାଙ୍ଗିର(ପ୍ରେରଣା ଖବର): ମହାରାଣୀ ସାଗରରେ ବର୍ଷା ପାଇଁ କାମ ବନ୍ଦ ଅଛି l କିନ୍ତୁ ମଙ୍ଗଳବାର ଦିନ 12 ଟାରେ ମୁନିସିପାଲିଟି ଏମଇ ପି. ନାଏକ ଙ୍କ ଉପସ୍ଥିତି ରେ ମାଟି ଖୋଲା କାମର ମାପ ଚାଲିଥିବା ବେଳେ  କାମରେ ନିୟୋଜିତ ଜଣେ ଶ୍ରମିକଙ୍କ 11କେଭି ଇଲେକ୍ଟ୍ରି ତାର ସଂସ୍ପର୍ଶ ରେ ଆସିବାରୁ ତାଙ୍କର ମୃତ୍ୟୁ ହୋଇଛି ଏବଂ ଅନ୍ୟ ଜଣେ ସାମାନ୍ୟ ଆହତ ହୋଇଛନ୍ତି । ମୃତ ଶ୍ରମିକ ଜଣକ ସ୍ଥାନୀୟ କାମାକ୍ଷାନଗରର ରାଜା(୩୦ ବର୍ଷ, ଜଣେ ଅଣ ଓଡ଼ିଆ ଶ୍ରମିକ) ବୋଲି ଜଣାପଡିଛି। ସୂଚନା ଅନୁସାରେ ମହାରାଣୀ ସାଗରରେ ପୋଖରୀ ଖୋଳା କାମ ସରିବା ପରେ ସେଠାରେ ହୋଇଥିବା ମାଟିକାମର ମାପଜୋଖ ଚାଲିଥିଲା ।  ଠିକାଦାର ଜଣକ ଶ୍ରମିକ ରାଜାଙ୍କୁ ମାଟି ମାପଜୋଖ ପାଇଁ ପୋଖରୀ ଭିତରକୁ ପଠାଇଥିଲେ। ଆଲୁମିନିୟମ ମେସିନରେ ମାଟିମାପିବା ସହ ସେ ବାହାରକୁ ଆସୁଥିଲେ। ହେଲେ ସେଠାରେ ଥୁବା ୧୧କେଭି ତାର ସହ ମେସିନ ଲାଗିଯିବାରୁ ଶ୍ରମିକ ରାଜାଙ୍କୁ କରେଣ୍ଟ ଲାଗି ଯାଇଥିଲା l ଘଟଣା ସ୍ଥଳ ରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା । ପରେ ଲୋକମାନେ ତାଙ୍କୁ ସ୍ଥାନୀୟ ଭୀମଭୋଇ ମେଡିକାଲ କଲେଜ ହସ୍ପିଟାଲ କୁ ବୋହି ଆଣିଥିଲେ l ସେଠାରେ ଥିବା ଡାକ୍ତର ତାଙ୍କୁ ମୃତ ଘୋଷଣା କରିଥିଲେ l ମୃତ ରାଜାଙ୍କୁ ନିୟୋଜିତ କରିଥିବା ଠିକାଦାର ଲିଙ୍ଗରାଜ ମିଶ୍ରଙ୍କ କହିବା ଅନୁସାରେ  ସେ ସେଠାରେ ନଥିଲେ l ଖବର ପାଇ ପହଂଚି ଦେଖିଲା ବେଳକୁ ମୃତ ରାଜା ଏବଂ ସୁଜିତ ବେହେରା ନାମକ ଜଣେ ବ୍ୟକ୍ତି 11କେଭି ଇଲେକ୍ଟ୍ରି ତାର ସଂସ୍ପର୍ଶ ରେ ଆସି ଯିବାରୁ କରେଣ୍ଟ ଲାଗି ଯାଇଥିଲା l ଦୁଇଜଣଙ୍କୁ ମେଡିକାଲ ନିଆ ଯାଇଥିଲା l ସେଠାରେ ଡାକ୍ତର ରାଜାଙ୍କୁ ମୃତ ଘୋଷଣା କରିଥିବା ବେଳେ ସୁଜିତ ଙ୍କୁ ସାମାନ୍ୟ ଚିକିତ୍ସା ପରେ ଘରକୁ ପଠାଇ ଦେଇଥିଲେ l ମୃତ ରାଜାଙ୍କ ଏଠାରେ କେହି ନଥିବାରୁ ମୋ ପାଖରେ ରହୁଥିଲା ଏବଂ କାମ କରୁଥିଲା ବୋଲି ସେ କହିଛନ୍ତି l ମହାରାଣୀ ସାଗର ପୁନଃ ଉଦ୍ଧାର କାର୍ଯ୍ୟ ତଦାରଖ କରୁଥିବା ମୁନିସିପାଲିଟି ଏମଇ ଶ୍ରୀ ନାଏକ ଙ୍କ କହିବା ଅନୁସାରେ ବର୍ଷା ଯୋଗୁଁ ମହାରାଣୀ ସାଗରର କାମ ବନ୍ଦ ଅଛି l ବହୁଲୋକ ସାଗର କୁ ବୁଲି ଯାଉଛନ୍ତି କାହାକୁ କଣ ହେଲା ଆମେ ଜାଣି ନାହୁଁ l ଜଣକୁ କରେଣ୍ଟେ ଲାଗିଥିବା ଶୁଣିଛି ବୋଲି କହିଥିଲେ l ତେବେ ଏଠି ପ୍ରଶ୍ନ ଉଠୁଛି ମୃତ ରାଜା 11କେଭି ତାର କୁ କାହିଁକି ମେସିନ ସାହାଯ୍ୟ ରେ ଉପରକୁ କରୁଥିଲେ l କେଉଁ ଏସଏଚଜି ଅଧିନରେ ସେ ଶ୍ରମିକ ଭାବରେ କାମ କରୁଥିଲେ, କି ଏସଏଚଜି ନାଁ ରେ କୌଣସି ଠିକାଦାର କାମ କରୁଥିଲେ l ଏସବୁର ତଦନ୍ତ ହେଲେ କିଏ ସତ କହୁଛି ତାହା ପଦାକୁ ଆସିବ l ଅନ୍ୟପଟେ ମୃତ ରାଜାଙ୍କ ଶବକୁ ପୁଲିସ ଜବତ କରିବା ଏବଂ ପୋଷ୍ଟମଟମ ପରେ ଘର ଲୋକଙ୍କୁ ଶବ ହସ୍ତାନ୍ତର କରିବା ସହ ତଦନ୍ତ ଚଳାଇଥିବା କହିଛି l ମୃତ ରାଜାଙ୍କ ର ଏଠାରେ କେହି ନଥିବାରୁ ତାଙ୍କ ମୃତୁ ଘଟଣାକୁ ଚପେଇ ଦେବାକୁ ଚେଷ୍ଟା ଚାଲିଥିବା ଏବଂ ଠିକାଦାରଙ୍କ ଭୁଲ ଯୋଗୁଁ ଜଣେ ନିରୀହ ଶ୍ରମିକର ମୃତ୍ୟୁ ଘଟିଥିବା  ଅଭିଯୋଗ ହୋଇଛି। ଜିଲ୍ଲାପାଳ ଏହାର ତଦନ୍ତ କରି ଦୋଷୀ ବିରୁଦ୍ଧରେ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ଦାବି ହେଉଛି l