04-Oct-2020

ବଲାଙ୍ଗୀର,ଠ୪/୧ଠ- ଗତ କିଛି ଦିନ ହେଲା ବଲାଙ୍ଗୀର ସହରରେ କରୋନାଜନିତ ମୃତ୍ୟୁ ସଂଖ୍ୟା ଉଦ୍‌ବେଗଜନକ ଭାବରେ ବୃଦ୍ଧି ପାଇବାରେ ଲାଗିଛି । ସହରର ଅନେକ ଚିହ୍ନାମୁହଁ ଓ ଜଣାଶୁଣା ବ୍ୟକ୍ତିତ୍ୱ ଆମ ଗହଣରୁ ଚାଲିଯାଉଛନ୍ତି । କରୋନା ମହମାରୀ ଅନେକ ଲୋକଙ୍କ ଜୀବନରେ ସୀମାହୀନ ଦୁଃଖ ଓ ଯନ୍ତଣା ଆଣି ଦେଉଛି ।  ଏହି କ୍ରମରେ ଆଜି ବଲାଙ୍ଗୀର ସହରରେ ଜଣେ ଯୁବ ଉଦ୍ୟୋଗପତିଙ୍କ ମୁଣ୍ଡ ନେଇଛି କରୋନା । ବଲାଙ୍ଗୀରର ବରିଷ୍ଠ ସାମ୍ବାଦିକ ରାମକୁମାର ଅଗ୍ରୱାଲଙ୍କ ଜ୍ୟେଷ୍ଠ ପୁତ୍ର ସଙ୍ଗୀତ ଅଗ୍ରୱାଲ(୪୯)ଙ୍କ ଆଜି କରୋନାରେ ଚିକିତ୍ସାଧୀନ ଅବସ୍ଥାରେ ପରଲୋକ ହୋଇଯାଇଛି । କରୋନା ପଜିଟିଭ ଚିହ୍ନଟ ପରେ ସଙ୍ଗୀତ କିଛି  ଦିନ ହେଲା ରାୟପୁରର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ । ସଙ୍ଗୀତ ଫାର୍ମାସୁଟିକାଲ କଂପାନୀ ଓ ଔଷଧ ହୋଲ୍‌ସେଲିଙ୍ଗ କ୍ଷେତ୍ରରେ ବେଶ ସୁନାମ ଅର୍ଜନ କରିବା ସହ ଜଣେ ମେଳାପୀ ଓ କର୍ମନିଷ୍ଠ ଯୁବକ ଭାବରେ ଜଣାଶୁଣା ଥିଲେ । କଳ୍ପନା ଏଜେନ୍ସିର ମାଲିକ ଭାବରେ ଖୁବ ସଫଳତାର ସହ ନିଜର ବ୍ୟବସାୟକୁ ଉତ୍କର୍ଷତାର ଶୀର୍ଷରେ ପହଞ୍ଚାଇପାରିଥିଲେ । 
ସଙ୍ଗୀତଙ୍କ ବାପା ରାମକୁମାର ଅଗ୍ରୱାଲ ବଲାଙ୍ଗୀର ଜିଲ୍ଲାର ଜଣେ ବରିଷ୍ଠ ସାମ୍ବାଦିକ ଭାବରେ ବେଶ ଜଣାଶୁଣା ଥିବା ବେଳେ ବର୍ତ୍ତମାନ ସେ ବାର୍ଦ୍ଧକ୍ୟଜନିତ ଅସୁସ୍ଥତା ଯୋଗୁଁ ଶଯ୍ୟାଶାୟୀ ଅଛନ୍ତି । ତେବେ ସଙ୍ଗୀତଙ୍କ ଅକାଳ ବିୟୋଗରେ ବଲାଙ୍ଗୀର ମାରୱାଡି ସମାଜ, ଔଷଧ ବ୍ୟବସାୟୀ, ସାମ୍ବାଦିକ ସଂଘ ତଥା ବଲାଙ୍ଗୀର ଜନସାଧାରଣ ଗଭୀର ଶୋକବ୍ୟକ୍ତ କରିଛନ୍ତି ।