25-Jul-2023

ନୁଆଁପଡ଼ା /ଖରିଆର(ପ୍ରେରଣା ଖବର ): ଖାଦ୍ୟ ବସ୍ତ୍ର ଶିକ୍ଷା ସ୍ୱାସ୍ଥ୍ୟ ଓ ବାସଗୃହ ଲୋକଙ୍କ ମୌଳିକ ଆବଶ୍ୟକତା ହୋଇ ଥିବା ବେଳେ ସରକାର ମଧ୍ୟ ଅନେକ ଯୋଜନା ମାଧ୍ୟମରେ ଏସବୁ ଲୋକଙ୍କୁ ଯୋଗାଇବାର ବ୍ୟବସ୍ଥା କରୁଛନ୍ତି।କିନ୍ତୁ ଅନେକ ଗରିବ ଓ ନିରାଶ୍ରୟ ଲୋକ ସବୁ ପ୍ରକାର ଯୋଗ୍ୟତା ସତ୍ତ୍ୱେ ଏବେ ମଧ୍ୟ ତାହାର ସୁଫଳ ପାଉ ନାହାଁନ୍ତି।

ଯୋଜନାର ସଫଳ ରୂପାୟନ ପାଇଁ ପ୍ରଶାସନିକ ଇଛାଶକ୍ତି ର ଅଭାବ ସକାଶେ ସରକାରଙ୍କ ଜନ ମଙ୍ଗଳ ଯୋଜନା ସବୁ ଫେଲ ମାରୁଛି।ବିଶେଷ କରି ଆବାସ ଯୋଜନାରେ ବହୁ ପରିବାର ସାମିଲ ହୋଇ ନ ପାରି ଭଙ୍ଗା ଦଦରା ଘରେ ଭାଗ୍ୟ ଆଦରି ପଡି ରହିଛନ୍ତି।ଏସ ଇ ସି ସି ରେ ନାଁ ନ ଥିବା ଦର୍ଶାଇ ସେମାନଙ୍କୁ ଘର ଖଣ୍ଡେ ମଧ୍ୟ ଦିଆ ଯାଉନି।ନୂଆପଡ଼ା ଜିଲ୍ଲା ଖଡ଼ିଆଳ ବ୍ଲକ ଅନ୍ତର୍ଗତ ତୁକଲା ଗ୍ରାମର କଲେଜ ପଡ଼ାରେ ରହନ୍ତି ସୁବାସ ହଂସ ଓ ପରିବାର।ପରିବାର କହିଲେ ୭୦ ବର୍ଷୀୟା ମାଁ ବୁଢ଼ୀ ନିଲାନ୍ଦ୍ରୀ ହଂସ, ସ୍ତ୍ରୀ ସୁରେଖା ଓ ଦୁଇ ବର୍ଷର ଝିଅ ନିଆଁ।ଏହି ପରିବାରର ଦୁଃଖ କହିଲେ ନ ସରେ।ପୂର୍ବରୁ ଜାତୀୟ ରାଜପଥ ପାର୍ଶ୍ୱରେ ତାଙ୍କ ଘର ଥିଲା।ଖଡ଼ିଆଳ ଭବାନୀପାଟଣା ରାଜ୍ୟ ରାଜପଥ ପ୍ରଶସ୍ତି କରଣ ସମୟରେ ୨୦୧୦ ମସିହାରେ ତାଙ୍କ ଘରକୁ ଭାଙ୍ଗି ଦିଆଗଲା।କ୍ଷତିପୂରଣ ଯାହା ମିଳିଲା ସମୁଦ୍ର କୁ ଶଙ୍ଖେ ପରି।ସେ ସମୟରେ ବିଭାଗୀୟ ଅଧିକାରୀ ମାନେ ପ୍ରତିଶ୍ରୁତି ଦେଇଥିଲେ ଇନ୍ଦିରା ଆବାସ ଖଣ୍ଡେ କରାଇଦେବେ ବୋଲି କିନ୍ତୁ କେହି ଆଉ ଧରା ଛୁଆଁ ଦେଲେନି।ନିଜର ସମ୍ପର୍କୀୟଙ୍କ ଘରେ ୨/୩ବର୍ଷ ରହିଲା ପରେ ଆଉ ଜଣକ ଘରେ ୬ବର୍ଷ ରହିଲେ।ଉକ୍ତ ପରିବାର ର ଅସୁବିଧା ହେବାରୁ ତାଙ୍କୁ ରଖି ପାରିଲେନି।ସୁବାସ  ଏବେ ଚାଲ ଘର ଖଣ୍ଡେ ତିଆରି କରି ରହୁଛନ୍ତି।ସ୍ଥାନଭାଵରୁ ବାହାରେ ରୋଷେଇ କରିବାକୁ ପଡେ।ଉପରେ ଜରି ଢ଼ଙ୍କା ଯାଇଛି, ବର୍ଷା ଦିନରେ ପାଣି ଗଳିବାରୁ ଝିଅ କାନ୍ଦିଲେ ତାକୁ ଅନ୍ୟ କାହା ଘରକୁ ନେଇକି ରୁହେ ବୋଲି କୋହଭରା କଣ୍ଠରେ କହନ୍ତି ସୁରେଖା।ଘର ଖଣ୍ଡେ ପାଇଁ ଦଶ ବର୍ଷ ହେଲା ପଞ୍ଚାୟତ ଠାରୁ ଜିଲ୍ଲା ପ୍ରଶାସନ ପାଖକୁ ଧାଉଁଛନ୍ତି ସୁବାସ କିନ୍ତୁ ପ୍ରତିଶ୍ରୁତି ଛଡା କିଛି ମିଳୁନି।ପଞ୍ଚାୟତ ତରଫରୁ ଏସ ଇ ସି ସି ଡାଟା ରେ ନାମ ନ ଥିବା କହିଛନ୍ତି । ତାଙ୍କ ନାମ ଏବେ ଯୋଗ କରାଯାଇଛି ଓ ଶୀଘ୍ର ଘର ଯୋଗାଇ ଦିଆଯିବ ବୋଲି ପଞ୍ଚାୟତ ତରଫରୁ ପ୍ରକାଶ କରାଯାଇଛି ।