31-May-2023

ବଲାଙ୍ଗିର (ପ୍ରେରଣା ଖବର ବ୍ୟୁରୋ ): ପାରିବାରିକ କଳହକୁ କେନ୍ଦ୍ର କରି ସ୍ୱାମୀ ସହିତ ଝଗଡା କରିବା ପରେ ଏବେ ସ୍ୱାମୀ କିଣି ଦେଇଥିବା ଜମି ବିକ୍ରି କରିବାକୁ ଉଦ୍ୟମ କରୁଛି ସ୍ତ୍ରୀ । ଏଭଳି ଏକ ଘଟଣା ଘଟିଛି ବଲାଙ୍ଗିର ସହର ରାଧାରାଣୀ ପଡାରେ । ଏନେଇ ସ୍ୱାମୀ ସନ୍ତୋଷ କୁମାର ସାହୁ ଟାଉନ ଥାନାର ଦ୍ୱାରସ୍ଥ ହୋଇ ଲିଖିତ ଅଭିଯୋଗ କରିଛନ୍ତି ।
ସୂଚନା ଅନୁସାରେ ୨୦୦୪ ମସିହାରେ ବଲାଙ୍ଗିର ଜିଲ୍ଲା ତୁଷୁରା ଥାନା ଅର୍ନ୍ତଗତ ମଧୁପୁର ଗ୍ରାମର ସବିତା ସାହୁ ଙ୍କୁ  ସନ୍ତୋଷ ସାମାଜିକ ରିତୀନିତୀ ଅନୁସାରେ ବାହା ହୋଇଥିଲେ । ତାଙ୍କର ୨ ଝିଅ ଓ ଜଣେ ପୁଅ ଅଛନ୍ତି । ବିବାହ ପରେ ସବୁକିଛି ଠିକ ଚାଲୁଥିଲା । ଦୁହିଁଙ୍କ ମଧ୍ୟରେ ଉତ୍ତମ ସର୍ମ୍ପକ ଥିଲା । ତେଣୁକରି ଗତ ୨୦୨୧ ମସିହାରେ ସନ୍ତୋଷ ପୁଇଁତଲା ଅଞ୍ଚଳରେ ୨୫୦୦ ବର୍ଗଫୁଟ ର ଏକ ଜମି କିଣିଥିଲେ । ଏହାକୁ ସେ ତାଙ୍କର ସ୍ତ୍ରୀ ଙ୍କ ନାମରେ ରେଷ୍ଟ୍ରି କରିଥିଲେ । ପରିବାରିକ କଳହ କୁ କେନ୍ଦ୍ର କରି ଦୀର୍ଘ ୯ ମାସ ହେଲା ସବିତା ତାଙ୍କର ଛୁଆପିଲା ଙ୍କୁ ଧରି ମା ଘର କୁ ଚାଲିଯାଇଥିଲେ । ସବିତା ଙ୍କ ଭାଇ ଶରଣ ସାହୁ ଗତ ୨୦୧୪ ମସିହାରେ ସନ୍ତୋଷ ଙ୍କ ଠାରୁ ଢାବା  ଖୋଲିବାକୁ ୮୦ ହଜାର ଟଙ୍କା ନେଇ ଫେରାଉନଥିବାରୁ ସ୍ୱାମୀ ସ୍ତ୍ରୀ ମଧ୍ୟରେ ଝଗଡା ହୋଇଥିବା ସେ କହିଥିଲେ । କିନ୍ତୁ ତାଙ୍କର ନାମରେ ଜମି ର କାଗଜପତ୍ର ରହିଥିବାର ଫାଇଦା ଉଠାଇ ସେ ଏବେ ଉକ୍ତ ଜମି କୁ ବିକିବାକୁ ଯୋଜନା କରୁଛନ୍ତି । ଏ ସର୍ମ୍ପକରେ ଜାଣିବା ପରେ ସନ୍ତୋଷ ତାଙ୍କୁ ମନା କରିଥିଲେ । କିନ୍ତୁ ସବିତା ତାଙ୍କର କଥା  ଶୁଣିବାକୁ ନାରାଜ । ତେଣୁକରି ସେ ଟାଉନ ଥାନାର ଦ୍ୱାରସ୍ଥ ହୋଇ ସ୍ତ୍ରୀ ବିରୋଧରେ ଏକ ଲିଖିତ ଅଭିଯୋଗ କରିଛନ୍ତି । ସନ୍ତୋଷ ବହୁ କଷ୍ଟରେ ଟଙ୍କା ରୋଜଗାର କରି ଜମି କିଣିଥିଲେ । କିନ୍ତୁ ତାଙ୍କର ସ୍ତ୍ରୀ ଉକ୍ତ ଜମିକୁ ବିକ୍ରୀ କରି ଟଙ୍କା ହଡପ କରିବାକୁ ଯୋଜନା କରୁଛନ୍ତି । ତେଣୁ କରି ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଥିଲେ ।