25-May-2023

ପଦ୍ମପୁର(ପ୍ରେରଣା ଖବର):  ବରଗଡ଼ ଜିଲ୍ଲା ପଦ୍ମପୁର ଶୀତଳଷଷ୍ଠୀ ଯାତ୍ରା ପାଇଁ ପଦ୍ମପୁର ସହର ଉତ୍ସବମୁଖର ହୋଇଉଠିଛି । ଦ୍ୱିତୀୟ ବର୍ଷରେ ପଦାର୍ପଣ କରିଥିବା ଏହି ଯାତ୍ରା ଚଳିତ ବର୍ଷ ଧୂମଧାମରେ ପାଳିତ ହେଉଛି । ପତରପେଣ୍ଡୀ ନିର୍ବନ୍ଧ ଓ ଦେବ ନିମନ୍ତ୍ରଣ ନୀତି ସମ୍ପନ୍ନ ପରେ ଗତକାଲି ରାତିରେ ଦେବ ଦମ୍ପତିଙ୍କ ବିବାହ ସମ୍ପନ୍ନ ହୋଇଛି । ଏଥିପାଇଁ ଯାତ୍ରା କମିଟି ତରଫରୁ ସଭାପତି ଭୋଜରାଜ ସିଂ ବରିହା, କାର୍ଯ୍ୟକାରିଣୀ ସଭାପତି ହରିଶଙ୍କର ଅଗ୍ରୱାଲ (ନବୁ), ସମ୍ପାଦକ ଅଚ୍ୟୁତାନନ୍ଦ ସେଠ, କୋଷାଧ୍ୟକ୍ଷ  ଆଶିଷ ବଂଶଲଙ୍କ ନେତୃତ୍ୱରେ କମିଟି କର୍ମକର୍ତ୍ତା ଓ ଭକ୍ତମାନେ ପ୍ରଭୁଙ୍କୁ ବର ବେଶରେ ସଜାଇଥିଲେ ।ପରେ ବରାତ ଶୋଭାଯାତ୍ରାରେ ମହାଦେବ ବିଜେ କରିଥିଲେ ।ଏହି ଶୋଭାଯାତ୍ରାରେ ସହରର ବିଭିନ୍ନ ଦେବାଦେବୀ ସାମିଲ ହୋଇଥିଲେ । ଶୋଭାଯାତ୍ରାରେ ବିଭିନ୍ନ ସ୍ଥାନରୁ ଆସିଥିବା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ସହ ଭକ୍ତଙ୍କ ଜୟଧ୍ବନୀରେ ସହର ପ୍ରକମ୍ପତ ହୋଇଥିଲା ।ରାସ୍ତାରେ ହଜାର ହଜାର ଶ୍ରଦ୍ଧାଳୁ ଭକ୍ତ ପ୍ରଭୁଙ୍କ ଦର୍ଶନ କରିବାର ସୁଯୋଗ ପାଇଥିଲେ । ବିଳମ୍ବିତ ରାତ୍ରୀରେ ପଣ୍ଡିତ ସରୋଜ ପାଣିଗ୍ରାହୀ, ଉଦୟ ନନ୍ଦ  ଦ୍ଵାରା ପୂଜାର୍ଚ୍ଚନା ଓ ମନ୍ତ୍ରପାଠ ପରେ ଶିବ ପାର୍ବତୀଙ୍କ ବିବାହୋତ୍ସବ ଅନୁଷ୍ଟିତ ହୋଇଥିଲା । ଦେବ ବିବାହକୁ ଦେଖିବା ପାଇଁ ରାତିତମାମ ଭକ୍ତମାନଙ୍କ ଭିଡ ଜମିଥିଲା ଓ ଉଜାଗର ରହିଥିଲେ।ଏଥର ପ୍ରଭୁ ରାମେଶ୍ୱର ବାବାଙ୍କ ପିତାମାତା ଭାବେ ଜିତେନ୍ଦ୍ର ଦାସ ଓ ତାଙ୍କ ଧର୍ମପତ୍ନୀ ଚିନ୍ମୟୀ ଦାସ ,ପାର୍ବତୀ ଦେବୀଙ୍କ ପିତାମାତା ଭାବେ ଆଶିଷ ବଂଶଲ ଓ ତାଙ୍କ ଧର୍ମପତ୍ନୀ ବର୍ଷା ବଂଶଲ ଦାୟିତ୍ୱ ତୁଲାଇଥିଲେ । ଆଜି ଏକ ବିରାଟ ବର୍ଣ୍ଣାଢ଼୍ୟ ଶୋଭାଯାତ୍ରାରେ ବାବା ରାମେଶ୍ୱର ଓ ଦେବୀ ପାର୍ବତୀଙ୍କ ମନ୍ଦିର ପ୍ରତ୍ୟାବର୍ତ୍ତନ ଉତ୍ସବ ଅନୁଷ୍ଠିତ ହେବ ବୋଲି କମିଟି ପକ୍ଷରୁ ସୂଚନା ଦିଆଯାଇଛି ।