16-May-2023

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ): ଭୁବନେଶ୍ୱରର ସାମାଜିକ ସାଂସ୍କୃତିକ ଅନୁଷ୍ଠାନ କଳାଭୂମି ପଣା ସଂକ୍ରାନ୍ତି ଠାରୁ ଏକମାସ ଧରି ପଟିଆ ବିଗବଜାର ଛକ ଠାରେ ଦହିପଣା, ସର୍ବତ, ଗ୍ଲୁକୋଜ ଆଦି ବଣ୍ଟନ କରି ଆସୁଥିଲା l ଓଡ଼ିଆ ପରମ୍ପରା ଭିତ୍ତିକ ଏହି ସାମୂହିକ ପଣl ବଣ୍ଟନ ପର୍ବର ଉଦଯପନୀ ଉତ୍ସବ ଓ ଜଣେ ଅସହାୟ କର୍କଟ ପୀଡିତ ଶିଶୁକୁ ସମାଜମଙ୍ଗଳ ହୁଣ୍ଡୀ ମାଧ୍ୟମରେ ଆର୍ଥିକ ସହାୟତା ପ୍ରଦାନ କାର୍ଯ୍ୟକ୍ରମରେ ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ ମା ଉମାଦେବୀ ଆଞ୍ଚଳିକ ଉଚ୍ଚ ମାଧ୍ୟମିକ ବିଦ୍ୟାଳୟର ଆଇଟି ବିଭାଗ ଅଧ୍ୟାପକ ତଥା ମେଣ୍ଟାଲିଷ୍ଟ ମ୍ୟାଜିସିଆନ ଉଦ୍ଧବ ପଧାନଙ୍କୁ ସଂସ୍କୃତି ସେବା ସମ୍ମାନରେ ସମ୍ବର୍ଦ୍ଧିତ କରାଯାଇଛି l କଳାଭୂମି, ଓଡିଶାର ଅଧ୍ୟକ୍ଷ ଯୁବ ବଂଶୀବାଦକ ପ୍ରମୋଦ ପତିଙ୍କ ସଭାପତିତ୍ୱରରେ ମୁଖ୍ୟ ଅତିଥି ଭାବେ ଉତ୍ତର ବିଧାୟକ ସୁଶାନ୍ତ ରାଉତ ଯୋଗଦେଇ ଥିବା ବେଳେ ମୁଖ୍ୟବକ୍ତା ଭାବେ ବରିଷ୍ଠ ସାମ୍ବାଦିକ ପ୍ରଦ୍ୟୁମ୍ନ ଶତପଥୀ ଯୋଗଦେଇ କଳାଭୂମିର ଏହି କାର୍ଯ୍ୟକୁ ଉଚ୍ଚ ପ୍ରଶଂସା କରିଥିଲେ l ସମ୍ମାନିତ ଅତିଥିଭାବେ ଉକ୍ତ ୱାର୍ଡ ର କର୍ପୋରେଟର ମିହିର କୁମାର ରାଉତ, ଏସିପି ବିଷ୍ଣୁ ପ୍ରସାଦ ପାତ୍ର, ବିଜେପି ନେତା ପବିତ୍ର ମୋହନ ଦାସ, ପ୍ରଯୋଜକ ଶ୍ରୀଧର ମାର୍ଥା, ବାପୁ ଓଝା ପ୍ରମୁଖ ଯୋଗ ଦେଇଥିଲେ । ବିଶେଷକରି ଚଉରା ଉପରେ ଠେକି ରଖି ସେଥିରେ ପାଣି ଢାଳି କାର୍ଯ୍ୟକ୍ରମ ଆରମ୍ଭ ପ୍ରକ୍ରିୟା ସମସ୍ତ ଙ୍କୁ ଆକର୍ଷିତ କରିଥିଲା । ଭାଗବତର ପ୍ରଚାର ପ୍ରସାର ପାଇଁ କଳାଭୂମି ଯେଉଁ ପଦକ୍ଷେପ ନେଇଛି ତାକୁ ସମ୍ପୂର୍ଣ ସହଯୋଗ କରିବେ ବୋଲି ବିଧାୟକ ସୁଶାନ୍ତ ରାଉତ ପ୍ରତିଶୃତି ଦେଇଥିଲେ । କାର୍ଯ୍ୟକ୍ରମକୁ ଇଂ. ମିଳନ ଘଟୁଆରୀ ସଂଯୋଜନା କରିଥିଲେ ।