26-Apr-2023

ବଲାଙ୍ଗିର (ଦେବାଶିଷ ବହିଦାର (: ବଲାଙ୍ଗିର ଜିଲ୍ଲା ଗୁଡ଼ଭେଲା ବ୍ଲକ ଅନ୍ତର୍ଗତ ଘୁନା ପଞ୍ଚାୟତର ରାଣୀମାଳ ସାପ୍ତାହିକ ବଜାରରେ ଶିଶୁ ଓ ମହିଳା ବିକାଶ ସୋସାଇଟି ( ସିଡବ୍ଲୁଡିଏସ୍‌ ) ତରଫରୁ ବାଲ୍ୟ ବିବାହ କୁ ନାଁ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି ।ଶିଶୁ ଓ ମହିଳା ବିକାଶ ସୋସାଇଟି ଅଧ୍ୟକ୍ଷ ମେଜର ଡ. କଳ୍ପନା ଦାଶଙ୍କର ପ୍ରତ୍ୟକ୍ଷ ତତ୍ତ୍ୱାବଧାନରେ ଅନୁଷ୍ଠିତ କାର୍ଯ୍ୟକ୍ରମକୁ ପ୍ରଭାକର ଛନ୍ଦ ସଂଯୋଜନା କରିଥିଲେ । ମୁଖ୍ୟ ଅତିଥି ଭାବରେ ଗୁଡ଼ଭେଲା ବି.ଡ଼ି.ଓ. ଗୁରେଶ୍ଵର ଭୋଇ (ଓ.ଏ.ଏସ ) ଓ ସମ୍ମାନିତ ଅତିଥି ଭାବରେ ଘୁନା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ସଦାଶିବ ମହାନନ୍ଦ ଯୋଗଦେଇଥିଲେ । ବାଲ୍ୟ ବିବାହ ଏକ ଦଣ୍ଡନୀୟ ଅପରାଧ । ବାଲ୍ୟ ବିବାହ ଅଭିଶାପ । ବାଲ୍ୟ ବିବାହକୁ ନାଁ, ସ୍କୁଲ ଯିବାକୁ ହଁ କହିବା । ଝିଅକୁ ୧୮ ବର୍ଷରୁ କମ୍ ଓ ପୁଅକୁ ୨୧ ବର୍ଷରୁ କମ୍ ବୟସ ହୋଇ, ବିବାହ କଲେ ବାଲ୍ୟ ବିବାହ ଭାବରେ ଗଣନା କରାଯାଏ ।

ବାଲ୍ୟ ବିବାହ କରିବା ଦ୍ୱାରା  ପରବର୍ତ୍ତୀ ସମୟରେ ଉଭୟ ଝିଅ ଓ ପୁଅକୁ ସ୍ୱାସ୍ଥ୍ୟଗତ ତଥା ବିଭିନ୍ନ ସମସ୍ୟାର ସମ୍ଭୁଖୀନ ହୋଇଥାଏ  । ଶିକ୍ଷା ଦ୍ୱାରା ଲୋକ ମାନଙ୍କର ମନୋବୃତ୍ତି ପରିବର୍ତ୍ତନ ଅଣାଯାଇ ବାଲ୍ୟ ବିବାହକୁ ରୋକାଯାଇପାରିବ ବୋଲି  ମୁଖ୍ୟ ଅତିଥି  ଗୁଡ଼ଭେଲା ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ଭୋଇ ମତଵ୍ୟକ୍ତ ଦେଇଥିଲେ । ସିଡ଼ବ୍ଲୁଡ଼ିଏସର ସଭ୍ୟ ତଥା ରାଜ୍ୟ ପୁରସ୍କାର ପ୍ରାପ୍ତ ସମାଜ ସେବୀ ଶିକ୍ଷକ ରାମନାରାୟଣ ଦାଶ ବଜାରରେ ଉପସ୍ଥିତ ଥିବା ଲୋକମାନଙ୍କୁ ବାଲ୍ୟ ବିବାହକୁ ରୋକିବା ପାଇଁ ଶପଥ ପାଠ କରାଇଥିଲେ ।

କାର୍ଯ୍ୟକ୍ରମରେ ସରକାରୀ ଉଚ୍ଚ ବିଦ୍ୟାଳୟ ଘୁନାର ଶିକ୍ଷକ ତରଣୀ ଭୋଇ, ଲୋକନାଥ ପୁଟା,  ଶିକ୍ଷୟତ୍ରୀ ସ୍ବର୍ଣ୍ଣକାନ୍ତି ମାଝୀ, ଲିକି ପଧାନ,  ଅଙ୍ଗନବାଡିକର୍ମୀ ଚଞ୍ଚଳା ସୁନା, ଆଶାକର୍ମୀ ସନ୍ଧ୍ୟା ରଣା, ସଭ୍ୟ ଚନ୍ଦ୍ରଶେଖର ସେଠ, ବିଘ୍ନ ମେହେର ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ। କାର୍ଯ୍ୟକ୍ରମକୁ ସିଡ଼ବ୍ଲୁଡ଼ିଏସ ସଭ୍ୟ ଦୀପକ ସେନ ଧରୁଆ ପରିଚାଳନା କରିଥିଳାବେଳେ ଶିକ୍ଷକ ସାରତ କୁମାର ସାହୁ ଧନ୍ୟବାଦ ଅର୍ପଣ କରିଥିଲେ।