23-Apr-2023

ବଲାଙ୍ଗୀର(ପ୍ରେରଣା ଖବର)-ଅକ୍ଷୟତୃତୀୟା ପର୍ବ ହେଉଛି କୃଷି ଓ କୃଷକର ପର୍ବ । ୮୪ଘର ଅଘରିଆ ସମାଜ ମଧ୍ୟ ଏକ କୃଷିଭିତ୍ତିକ ସମାଜ । ପ୍ରାୟ ୯୦% ଅଘରିଆ ପରିବାର କୃଷକ ଅଟନ୍ତି । ତେଣୁ ଅକ୍ଷୟତୃତୀୟାକୁ ଅଘରିଆମାନେ ତାଙ୍କର ମୁଖ୍ୟପର୍ବ ଭାବରେ ପାଳନ କରିଥାନ୍ତି । ଆଜି ବଲାଙ୍ଗୀର ସହର ଉପକଣ୍ଠରେ ଥିବା ଲର୍କିପାଲିଠାରେ ଅଘରିଆ ସମାଜ ପକ୍ଷରୁ ଅକ୍ଷୟତୃତୀୟା ପର୍ବ ପାଳନ କରାଯାଇଥିଲା । ଅଘରିଆ ସମାଜର ବଲାଙ୍ଗୀର ଜିଲ୍ଲା ସଭାପତି ଶୁଭ୍ରାଂଶୁ ପଟେଲ,ଉପସଭାପତି ଶ୍ରୀମତୀ ଲିଲି ପଟେଲ,ମହିଳା ମଞ୍ଚନେତ୍ରୀ ମିତା ରାଉତଙ୍କ ନେତୃତ୍ୱରେ ସମାଜର ବରିଷ୍ଠସଭ୍ୟ/ସଭ୍ୟାଙ୍କ ଉପସ୍ଥିତିରେ କୃଷକଙ୍କ ମଙ୍ଗଳକାମନା କରି ଅଖିମୁଠି ଅନୁକୂଳ କରାଯାଇଥିଲା । ପ୍ରଥମେ ମାଁ ଲକ୍ଷ୍ମୀଙ୍କ ପୂଜାର୍ଚ୍ଚନା କରାଯାଇ ଏକ ବିଲରେ ଧାନବୁଣି ପରେ ହଳଚଳାଯାଇଥିଲା । ଚଳିତ ବର୍ଷ କିଭଳି ଚାଷିଙ୍କ ଚାଷ ଭଲ ହୋଇ ଅମଳ ଭଲ ହେବ ସେନେଇ ଭଗବାନଙ୍କଠାରେ ସାମୁହିକ ପ୍ରାର୍ଥନା କରାଯାଇଥିଲା । ଏହି କାର୍ଯ୍ୟକ୍ରମରେ ଅଘରିଆ ସମାଜର ପୂର୍ବତନ ସଭାପତି ହରିଶଙ୍କର ସାଏ,ଦିଗାମ୍ବର ନାଏକ,ଭବାନୀଶଙ୍କର ପଟେଲ,ରାଜକିଶୋର ନାଏକ,ନରହରି ରାଉତ ପ୍ରମୁଖଙ୍କ ସହିତ ଶତାଧିକ ଲୋକ ସାମିଲ ହୋଇଥିଲେ । ପରେ ସମାଜର ଏକ ବୈଠକ ବସି ଆସନ୍ତାଦିନରେ ହେବାକୁ ଥିବା ସାମାଜିକ କାର୍ଯ୍ୟକ୍ରମ ଉପରେ ଆଲୋଚନା ହୋଇଥିଲା । 
 

ବଲାଙ୍ଗୀର(ପ୍ରେରଣା ଖବର)-କୃଷିଭିତ୍ତିକ ପର୍ବ ଅକ୍ଷୟତୃତୀୟା ଅବସରରେ ଜିଲ୍ଲାର ବିଭିନ୍ନ ସ୍ଥାନରେ ଆଜି ଅକ୍ଷୟତୃତୀୟା ପର୍ବ ପାଳିତ ହୋଇଯାଇଛି । ବିଭିନ୍ନ କୃଷକସଂଗଠନ,ରାଜନେତା,ଜିଲ୍ଲା ପ୍ରଶାସନ ତରଫରୁ ଏହି ପର୍ବକୁ ଧୂମଧାମରେ ପାଳନ କରାଯାଇଛି । ଆଜି ଜିଲ୍ଲା କୃଷକମହାସଂଘ ତରଫରୁ ବଲାଙ୍ଗୀର ସଦରବ୍ଲକ ଅନ୍ତର୍ଗତ ଜନକପୁର ଗ୍ରାମଠାରେ ଚାଷିଙ୍କୁ ନେଇ ଏହି ପର୍ବ ପାଳିତ ହୋଇଛି । ମହାସଂଘର ଜିଲ୍ଲା ସଭାପତି ଜତି ପଧାନ ଓ ସଂପାଦକ ସୌମେନ୍ଦ୍ର ପରିଚ୍ଛାଙ୍କ ନେତୃତ୍ୱରେ ଶତାଧିକ ଚାଷି ଯୋଗଦେଇଥିଲେ । ପ୍ରଥମେ ମାଁ ଲକ୍ଷ୍ମୀଙ୍କୁ ପୂଜାର୍ଚ୍ଚନା କରାଯାଇ ଧାନକୁ ବୁଣାଯାଇ ଅଖିମୁଠି ଅନୁକୂଳ କରାଯାଇଥିଲା । ଚଳିତବର୍ଷର ପ୍ରଥମ ବିହନକୁ ବିଲରେ ବୁଣାଯାଇ ଭଲ ଫସଲଅମଳ ପାଇଁ ଭଗବାନଙ୍କଠାରେ ପ୍ରାର୍ଥନା କରାଯାଇଥିଲା । ବିଲରେ ଧାନବୁଣା ଯାଇ ତାପରେ ହଳ ଚଳାଯାଇଥିଲା । ସଭାପତି ଜତି ପଧାନ ଓ ସଂପାଦକ ସୌମେନ୍ଦ୍ର ପରିଚ୍ଛା(ଚଗଲା) ବିଲରେ ହଲଚଳାଇଥିଲେ । ଏହି କାର୍ଯ୍ୟକ୍ରମରେ ଅଞ୍ଚଳର ଶହଶହ ସଂଖ୍ୟାରେ ଚାଷି ଯୋଗଦେଇଥିଲେ । 
 

 ଠିକ ସେହିପରି ସଦରବ୍ଲକର ଆମପାଲିଠାରେ କିଷାନକଂଗ୍ରେସ ତରଫରୁ ଆୟୋଜିତ ଅକ୍ଷୟତୃତୀୟା ପାଳନ କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବଲାଙ୍ଗୀର ସଦର ବିଧାୟକ ନରସିଂହ ମିଶ୍ର ଯୋଗଦେଇଥିଲେ । କିଷାନ କଂଗ୍ରେସର ଜିଲ୍ଲା ସଭାପତି ସାନନ୍ଦ ମିଶ୍ର ଓ ସଂପାଦକ ସରୋଜ ରଥଙ୍କ ନେତୃତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବଲାଙ୍ଗୀର ବିଧାୟକ ନରସିଂହ ମିଶ୍ର,ସଦର ବ୍ଲକ ସଭାପତି ରାମପ୍ରସାଦ୍ ମିଶ୍ର ଯୋଗଦେଇଥିଲେ । ପ୍ରଥମେ ଆମପାଲି ଗ୍ରାମରେ ଚାଷିଙ୍କ ଏକ ଶୋଭାଯାତ୍ରା ଅନୁଷ୍ଠିତ ହୋଇଥିଲା । ପରେ ବିଧାୟକ ଶ୍ରୀ ମିଶ୍ର ଅଖିମୁଠି ଅନୁଖୁଳ କରି ବିଲରେ ହଳଚଳାଇଥିଲେ ଓ କୃଷକଙ୍କ ଶୁଭମନାସିଥିଲେ । ପରେ କୃଷକଙ୍କୁ ନେଇ ଆୟୋଜିତ ଏକ ସଭାରେ କୃଷକମାନଙ୍କ ସହିତ ଆଲୋଚନାକରି ସଫଳ ଚାଷିଙ୍କୁ ମାନପତ୍ରଦେଇ ସମ୍ବର୍ଦ୍ଧିତ କରିଥିଲେ । ଏହି କାର୍ଯ୍ୟକ୍ରମରେ ସଦର ବ୍ଲକର ଶତାଧିକ ଚାଷି ଯୋଗଦେଇଥିଲେ । 

କୃଷିବିଜ୍ଞାନ କେନ୍ଦ୍ରରେ କୃଷିବିଭାଗର ଅକ୍ଷୟତୃତୀୟା ପର୍ବ
ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲାପ୍ରଶାସନ ତଥା କୃଷିବିଭାଗ ତରଫରୁ ଆଜି ଲର୍କିପାଲି କୃଷିବିଜ୍ଞାନ କେନ୍ଦ୍ରଠାରେ ଅକ୍ଷୟତୃତୀୟା ପର୍ବ ପାଳିତ ହୋଇଯାଇଛି । ଅତିରିକ୍ତ ଜିଲ୍ଲାପାଳ ଲମ୍ବୋଦର ଧରୁଆ ମୁଖ୍ୟଅତିଥି ଭାବରେ ଯୋଗଦେଇ ଏହି କାର୍ଯ୍ୟକ୍ରମରେ ଅଖିମୁଠୀ ଅନୁକୂଲ କରିଥିଲେ । ଜିଲ୍ଲା ମୁଖ୍ୟକୃଷିଅଧିକାରୀ ସୁଭାଷଚନ୍ଦ୍ର ବେହେରାଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଏଡିଏମ ଶ୍ରୀ ଧରୁଆ,ନାବାର୍ଡର ଡିଜିଏମ,ବଲାଙ୍ଗୀର କୃଷିବିଜ୍ଞାନକେନ୍ଦ୍ରର ମୁଖ୍ୟ ସତ୍ୟମୟ ଶତପଥି,ଡିଆରସିଏସ ଦୟୟନ୍ତି ସିଂ ପ୍ରମୁଖ ଯୋଗଦେଇଥିଲେ । ପ୍ରଥମେ ଲର୍କିପାଲିର କୁନି କୁନି ଶିଶୁଙ୍କ ଦ୍ୱାରା ଆୟୋଜିତ ସଂକିର୍ତ୍ତନ୍ୟରେ ଅତିରିକ୍ତ ଜିଲ୍ଲାପାଳଙ୍କୁ ସ୍ୱାଗତ କରାଯାଇଥିଲା । କୃଷିବିଜ୍ଞାନ କେନ୍ଦ୍ରର ଫାର୍ମରେ ପୂଜାର୍ଚ୍ଚନା କରାଯାଇ ଏଡିଏମ ଧାନବୁଣି ହଳ ଚଳାଇ ଅଖିମୁଠୀ ଅନୁକୂଳ କରିଥିଲେ । ପରେ କୃଷକମାନଙ୍କୁ ନେଇ ଏକ ସଭାର ଆୟୋଜନ କରାଯାଇଥିଲା । ଏହି କାର୍ଯ୍ୟକ୍ରମରେ ବହୁସଂଖ୍ୟାରେ ପୁରୁଷ ଓ ମହିଳା ଚାଷି ଯୋଗଦାନ କରିଥିଲେ ।