23-Apr-2023

ବିନିକା(ହିମାଂଶୁ ଶେଖର ପୁଟେଲ) ଆଇପିଏଲ ଢାଞ୍ଚାରେ ଚାଲୁଥିବା ବିନିକା ଅଞ୍ଚଳର ବହୁ ଚର୍ଚ୍ଚିତ ବିପିଏଲ ସିଜନ-୩ କ୍ରିକେଟ ଟୁର୍ଣ୍ଣାମେଣ୍ଟ ଶନିବାର ଅପରାହ୍ନରେ ରଙ୍ଗାରଙ୍ଗ କାର୍ଯ୍ୟକ୍ରମ ମଧ୍ୟରେ ସ୍ଥାନୀୟ ବିଜୁ ପଟ୍ଟନାୟକ ଷ୍ଟାଡିୟମ ଠାରେ ଉଦ୍ଘାଟିତ ହୋଇଯାଇଛି ।ପ୍ରାରମ୍ଭରେ ୮ଜଣ ମାଲିକଙ୍କ ଅଧୀନରେ ଥିବା ସମସ୍ତ ଖେଳାଳୀ,ବିନିକା ସ୍ପୋର୍ଟସ କ୍ଲବର ସଦସ୍ୟ,ଅଞ୍ଚଳର କ୍ରୀଡାପ୍ରେମୀ ବିନିକାର ଇଷ୍ଟଦେବୀ ମା ନାରାୟଣୀଙ୍କ ଠାରେ ପୂଜାର୍ଚ୍ଚନା କରିବା ପରେ ଏକ ବିରାଟ ଶୋଭାଯାତ୍ରାରେ ସହର ପରିକ୍ରମା କରି ଷ୍ଟାଡିୟମକୁ ପହଞ୍ଚିଥିଲେ ।ସେଠାରେ କ୍ରୀଡା ପତାକା ବିଶିଷ୍ଟ କ୍ରୀଡାବିତ ତଥା ଶିକ୍ଷକ ସୂର୍ଯ୍ୟ ନାରାୟଣ ସାହୁଙ୍କ ଦ୍ଵାରା ଉତ୍ତୋଳନ ହେବାପରେ ଅନ୍ୟ ସମ୍ମାନିତ ଅତିଥି ଶିଳ୍ପଦ୍ୟୋଗୀ ପ୍ରଶାନ୍ତ ବାବୁ,ବିନିକା ଥାନା ସବଇନ୍ସପେକ୍ଟର ରବୀନ୍ଦ୍ର ସାହୁ,ବରୋଦା ବ୍ୟାଙ୍କ ମ୍ୟାନେଜର ଅବୀନ ମେହେର ପ୍ରମୁଖ ଖେଳକୁ ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ପ୍ରଥମ ମ୍ୟାଚ ଫ୍ରାଞ୍ଚାଇଜ ଜ୍ୟୋତି ରଂଜନ ପଣ୍ଡାଙ୍କ ସିଦ୍ଧିକଶ୍ୟା ରେବେଳସ୍ ବନାମ ଆଦିତ୍ୟ କୁମାର ଜଗଦଳାଙ୍କ ସାଗର-୧୧ ମଧ୍ୟରେ ଅନୁଷ୍ଟିତ ହୋଇଥିଲା ।ପାଗ ଯୋଗୁଁ ଖେଳ ଅମିମାଂସିତ ଭାବେ

ସମ୍ପୁର୍ଣ୍ଣ ହୋଇଥିଲା। ଖେଳକୁ ବିନୋଦ ପାତ୍ର ଓ ଜିତେନ୍ଦ୍ର ମାହାଣା ପରିଚାଳନା କରିଥିବା ବେଳେ ଅଫ ସ୍କୋରର ଭାବେ ହାଡୁ ବଢେଇ,ଅନ ଲାଇନ ସ୍କୋରର ଆଲୋକ ସେଠୀ ଦାୟିତ୍ଵ ତୁଲାଇଥିଲେ । ଟୁର୍ଣ୍ଣାମେଣ୍ଟରେ ସ୍ପୋର୍ଟସ କ୍ଲବ ସମ୍ପାଦକ ମନୋଜ ଦାସ,କୋଷାଧ୍ୟକ୍ଷ ହିମାଂଶୁ ଶେଖର ପୁଟେଲ,ଉପ ସଭାପତି ବୁଲୁ ଦଣ୍ଡିଆ,କାର୍ଯ୍ୟକାରୀ ସଦସ୍ୟ ସୃଜନ ପଣ୍ଡା,ଅଧିନାୟକ ପ୍ରତାପ ସାହୁଙ୍କ ସମେତ କ୍ଲବର ସମସ୍ତ ସଦସ୍ୟ ପରିଚାଳନାରେ ସହଯୋଗ କରିଥିଲେ। ରବିବାର ଫ୍ରାଞ୍ଚାଇଜ ରବୀନ୍ଦ୍ର କୁମାର ହୋତାଙ୍କ ଅତୁଳ-୧୧ ବନାମ ପଞ୍ଚାନନ ନାୟକ ଙ୍କ  ଆନ୍ୟା ସ୍ପୋଟିଂ ମଧ୍ୟରେ ଅନୁଷ୍ଟିତ ହେବ ।ଏଥିରେ ମୁଖ୍ୟ ଅତିଥି ଭାବରେ ସରକାରୀ ଓକିଲ ଜୟ ପ୍ରକାଶ ପ୍ରଧାନ,ସମ୍ମାନିତ ଅତିଥି ଯୁବ ଓକିଲ ରଘୁନାଥ କୁମ୍ଭାର,ଗୋବିନ୍ଦା ହୋତା ଯୋଗଦେଇ ଉଭୟ ଦଳକୁ ପୁରସ୍କାର ପ୍ରଦାନ କରିବେ  ବୋଲି ଆୟୋଜକ ବିନିକା ସ୍ପୋର୍ଟସ କ୍ଲବ ତରଫରୁ ସୂଚନା ଦିଆଯାଇଛି ।