21-Apr-2023

ବିନିକା(ହିମାଂଶୁ ଶେଖର ପୁଟେଲ): ବିନିକା ସହର ଚଣ୍ଡିପଡାର ବିଶିଷ୍ଟ ଐତିହାସିକ ତଥା ପୂର୍ବତନ ଅଧ୍ୟକ୍ଷ ରାମ ପ୍ରସାଦ ମିଶ୍ରଙ୍କ(୭୩)ବର୍ଷ ବୟସରେ ଗତ ବୁଧବାର  ପରଲୋକ ଘଟିଛି  । ତାଙ୍କ ପରଲୋକ ଖବର ପ୍ରଚାରିତ ହେବା ପରେ ସାରା ଅଞ୍ଚଳର ଶିକ୍ଷାପ୍ରେମୀ ମହଲରେ ଶୋକର ବାତାବରଣ ଖେଳିଯାଇଛି । ସ୍ବର୍ଗତ ରାମ ପ୍ରସାଦଙ୍କ ମରଶରୀରକୁ ଏକ ବିରାଟ ଶୋଭାଯାତ୍ରାରେ ସ୍ଥାନୀୟ ମହାନଦୀ ବ୍ରିଜ ନିକଟ ଶ୍ଵଶାନ ଘାଟକୁ ନେବାପରେ ସେଠାରେ ତାଙ୍କର ପୁତ୍ର ତଥା ରାଉରକେଲା ଏନଆଇଆଇଟିର ପ୍ରଫେସର ବ୍ରଜ ଗୋପାଳ ମିଶ୍ର 

ମୁଖାଗ୍ନି ପ୍ରଦାନ କରିଥିଲେ । ସୂଚନାଯୋଗ୍ୟ ଯେ ସ୍ବର୍ଗତ ରାମ ପ୍ରସାଦ ବିଶେଷ କରି ଐତିହାସିକ କିମ୍ବଦନ୍ତୀ ଉପରେ ଗବେଷଣା କରି ପ୍ରକୃତ ତଥ୍ୟ ଲୋକଲୋଚନକୁ ଆଣିବାରେ ପ୍ରୟାସ କରିବାକୁ ଚେଷ୍ଟା ଜାରି ରଖିଥିଲେ । ଯାହାକି ତାଙ୍କର ଏହି ଉଦ୍ୟମ ଯୋଗୁଁ ରାଜ୍ୟ, ଦେଶ ତଥା ଦେଶ ବାହାରେ ବିଭିନ୍ନ ଅନୁଷ୍ଠାନ ପକ୍ଷରୁ ପୁରସ୍କୃତ ହୋଇଛନ୍ତି । ସ୍ବର୍ଗତ ରାମ ପ୍ରସାଦ ପ୍ରଥମେ ଜି.ଏ ଏମ୍ ଇଭିନିଂ କଲେଜରେ ଅଧ୍ୟାପକ ଭାବେ ତାଙ୍କର ଚାକିରୀ ଜୀବନ ଆରମ୍ଭ କଲେ । ପରେ ତାଳଚେର କଲେଜ, ଟିଟିଲାଗଡ଼ କଲେଜରେ ୧୭ବର୍ଷ, ଆଗଲପୁର ସ୍ଥିତ ରୋତ କଲେଜରେ ଅଧ୍ୟକ୍ଷ ଭାବେ କିଛିବର୍ଷ ଅବସ୍ଥାପିତ ହେବାପରେ ଅବସର ଗ୍ରହଣ କରିଥିଲେ । ତାଙ୍କର ଚାକିରୀ ଜୀବନ ଭିତରେ ଭାରତୀୟ ସଂସ୍କୃତିକୁ ନେଇ ଯୋଗିନୀ ପୀଠ, ବୌଦ୍ଧଧର୍ମ, ଶୋବଧର୍ମ ଉପରେ ଲିଖିତ ୬ଖଣ୍ଡ ପୁସ୍ତକ ଏବଂ ରାଜନୀତି ବିଜ୍ଞାନ,ଇତିହାସ ଓ ଅର୍ଥନୀତି ଉପରେ ଆର୍ଟିକେଲ ପ୍ରକାଶିତ ହୋଇଥିଲା । ସେହିପରି ଫରଗାମେଣ୍ଟ ଅଫ ଇଣ୍ଡିଆନ କଲଚର ଏ ଷ୍ଟଡି ଅନ ମତମୟୂରା ଶୈବଧର୍ମ, ବୈଷ୍ଣବ ଧର୍ମ, ଶାକ୍ତଧର୍ମ ଆଦି ଉପରେ ପ୍ରକାଶିତ ପୁସ୍ତକ ଗୁଡ଼ିକ ରାଜ୍ୟ ତଥା ଜାତୀୟ, ଆନ୍ତର୍ଜାତୀୟ ସ୍ତରର ବିଭିନ୍ନ ବିଶ୍ଵବିଦ୍ୟାଳୟ ମାନଙ୍କରେ ପ୍ରଚଳିତ ହେବା ସହିତ ବେଶ ଆଦୃତ ଲାଭ କରିଛି । ସେହିପରି ଚଉଷଠୀ ଯୋଗିନୀ ପୀଠ ରାଣୀପୁର ଝରିଆର ଉପରେ ଥିବା ଐତିହାସିକ କିମ୍ବଦନ୍ତୀକୁ ଗବେଷଣା କରିବାରେ ସଫଳ ହେବାରୁ ସେ ଡକ୍ଟରେଟ ଉପାଧି ପାଇଥିଲେ । ଅନ୍ୟ ପକ୍ଷରେ ବିନିକାର ଐତିହାସିକ ତାରାପୁର ଗଡ, ଇଷ୍ଟଦେବୀ ମା ନାରାୟଣୀଙ୍କ ଆବିର୍ଭାବ, ପ୍ରସିଦ୍ଧ ଶୈବପୀଠ ଚରଦା କପିଳେଶ୍ୱର ମନ୍ଦିରର ଇତିବୃତି,ବିନିତପୁର ଅଧୁନା ବିନିକାର ବିନିକେୟୀ ଦେବୀଙ୍କ ଉପରେ ମଧ୍ୟ ସୁନ୍ଦର ଭାବେ ବର୍ଣ୍ଣନା କରିଥିବାରୁ ତାହା ଜାଣିବାରେ ଜନମାନସରେ ସହାୟକ ହୋଇପାରିଛି । ସେହିପରି ୧୯୪୭ମସିହାରେ ଦାନଗଦି ବିରୋଧୀ କମିଟି ଗଠନ କରି ବିନିକା ଆନ୍ଦୋଳନରେ ପୋଲିସର ବୋୟେନେଟ ଚାର୍ଜରେ ପ୍ରାଣ ବିସର୍ଜନ କରିଥିବା ପଶ୍ଚିମ ଓଡ଼ିଶାର ପ୍ରଥମ ମହିଳା ଶହୀଦ ଗୁରୁବାରୀ ମେହେରଙ୍କ ସହିତ ସମ୍ପୁର୍ଣ୍ଣ ଜଡ଼ିତ ରହିଥିଲେ । ତାଙ୍କର ଅବଦାନ ଏ ମାଟି ପାଇଁ ଚିରନମସ୍ୟ ହୋଇ ରହିଥାଉ ।
ପୂର୍ବତନ ଅଧ୍ୟକ୍ଷ ତଥା ବିଶିଷ୍ଟ ଐତିହାସିକ ଡ଼ଃ ରାମ ପ୍ରସାଦ ମିଶ୍ରଙ୍କ ବିୟୋଗରେ ସ୍ଥାନୀୟ ସିଦ୍ଧାର୍ଥ ଡିଗ୍ରୀ କଲେଜ ଇତିହାସ ବିଭାଗ ତରଫରୁ ଗୁରୁବାର ଏକ ଶୋକସଭା ଅନୁଷ୍ଟିତ ହୋଇଥିଲା ଏଥିରେ ଯୋଗଦେଇଥିବା ଅତିଥି, ଉପସ୍ଥିତ ଛାତ୍ରଛାତ୍ରୀ ମାନେ ସ୍ବର୍ଗତ ମିଶ୍ରଙ୍କ ଫଟୋଚିତ୍ର ଉପରେ

ପୁଷ୍ପମାଲ୍ୟ ଅର୍ପଣ କରି ତାଙ୍କ ଆତ୍ମାର ସଦଗତି ପାଇଁ ୨ମିନିଟ ନୀରବ ପ୍ରାର୍ଥନା କରିଥିଲେ । ରାଜନୀତି ବିଜ୍ଞାନ ବିଭାଗ ମୁଖ୍ୟ ରୁଦ୍ର ନାରାୟଣ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଟିତ ଶୋକସଭାରେ ଇତିହାସ ବିଭାଗ ମୁଖ୍ୟ ଗୋପାଳକୃଷ୍ଣ ଦାଶ ଯୋଗଦେଇ ସ୍ବର୍ଗତ ମିଶ୍ରଙ୍କ ଜୀବନୀ ଓ କୃତୀ ଉପରେ ଆଲୋକପାତ କରିଥିଲେ । ଅଧ୍ୟାପିକା ଦୀପ୍ତିରାଣୀ ସ୍ୱାଇଁ ଡ଼ଃ ମିଶ୍ରଙ୍କ ଶୈବଧର୍ମ,ଶାକ୍ତଧର୍ମ, ଯୋଗିନୀ ଓ ତନ୍ତ୍ର ପରମ୍ପରା, ଚଉଷଠି ଯୋଗିନୀକୁ ନେଇ ପ୍ରକାଶିତ ବିଭିନ୍ନ ଲେଖା ଓ ସଂଦର୍ଭ ଉପରେ ଉପସ୍ଥିତ ଛାତ୍ରଛାତ୍ରୀ ମାନଙ୍କୁ ଅବଗତ କରିଥିଲେ ।