22-Mar-2023

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ସହରରେ ଜଣେ ମାନସିକ ଭିନ୍ନକ୍ଷମ ମହିଳାଙ୍କ ମହନୀୟ କାର୍ଯ୍ୟ ପାଇଁ ବିଭିନ୍ନ ମହଲରେ ଚର୍ଚ୍ଚା ହେଉଛି।‌ ସାଧାରଣରେ ମହିଳାଙ୍କ ପରିଚୟ ହେଲା ସେ ଜଣେ ମାନସିକ ଭିନ୍ନକ୍ଷମ (ସ୍ଥାନୀୟ ଭାଷାରେ' ବାଉରୀ')।‌ ତେବେ ଉକ୍ତ ମହିଳା ଜଣ ଏକାକୀ ବିଗତ ଦଶ/ ବାର ବର୍ଷ ହେଲା ନିଜ ଇଚ୍ଛାରେ ଓ ନିରଳ ଭାବେ ବୀରମହାରାଜପୁର ମୁଖ୍ୟ ଛକ ଠାରେ ରହିଆସୁଅଛି।‌ ପ୍ରତ୍ୟେକ ଦିନ ଉକ୍ତ ଛକ ସହ ବିଭିନ୍ନ ସ୍ଥାନର ପରିବେଶକୁ ପରିଷ୍କାର ପରିଚ୍ଛନ୍ନ ରଖିବା ଭଲି ମହନୀୟ କାର୍ଯ୍ୟ କରି ଚାଲିଛନ୍ତି। ଯାହାକି ଜଣେ ପ୍ରତ୍ୟକ୍ଷଦର୍ଶୀ ହିଁ ବିଶ୍ଵାସ କରି ପାରିବ। ପ୍ରଭାବଶାଳୀ ଲୋକେ ରାସ୍ତାରୁ ପତ୍ରଟିଏ ଗୋଟେଇଲେ ତାହା ବ୍ୟାପକ ଭାବେ ପ୍ରଚାରିତ ହୋଇଥିବା ବେଳେ ଉକ୍ତ ମହିଳାଙ୍କ ଏଭଲି  ଉତ୍ସର୍ଗୀକୃତ ପରିବେଶ ପ୍ରେମ କିନ୍ତୁ କାହା ଦୃଷ୍ଟିରେ ପଡେ ନାହିଁ। ଉକ୍ତ ମହିଳା ଜଣକ ପ୍ରତିଦିନ ଭୋର ସକାଳୁ ବୀରମହାରାଜପୁର ମୁଖ୍ୟ ଛକ ଚର୍ତୁପାଶ୍ୱ , ବ୍ଳକ, ତହସିଲ କାର୍ଯ୍ୟାଳୟ ସମ୍ମୁଖ ସମେତ ଆଖପାଖ ୩୦/୪୦ ଟି ଦୋକାନ ଆଗରେ ସଫେଇ କରିଥାନ୍ତି। ଏଥି ସହ ଆର୍ବଜନା ସବୁକୁ ଏକାଠି କରି ନିଆଁରେ ପୋଡ଼ି ଥାନ୍ତି। ଖରା , ବର୍ଷା,ଶୀତ, ବର୍ଷର ସବୁ ସମୟରେ ଏହା ତାଙ୍କର ଏକ ମିଶନ ଭଲିଆ ନିତିଦିନିଆ କାମ। ଏହି କାର୍ଯ୍ୟ ପାଇଁ କାହାଠାରୁ କିଛି ପ୍ରତିଦାନର ବି ଆଶା ରଖନ୍ତି ନାହିଁ। ତାଙ୍କ କର୍ମକୁ ଦେଖି ଯିଏ ଯାହା କିଛି ଖାଇବାକୁ ଦେଲେ ତାହା

ଖାଇ ଶାନ୍ତିରେ ରୁହନ୍ତି। ସର୍ବଦା ନିରବ ରହିବା ସହ ଅଣଓଡ଼ିଆ ଭାଷା ରେ କଥାବାର୍ତ୍ତା ହେଉଥିବା ଶୁଣୁବାକୁ ମିଲେ। ବିଭିନ୍ନ ସମୟରେ ସ୍ଥାନୀୟ କିଛି ସହୃଦୟ ବ୍ୟକ୍ତି ତାଙ୍କୁ ଶାଢ଼ୀ, ଶୀତବସ୍ତ୍ର ତଥା କିଛି ଆର୍ଥିକ ସହାୟତା କରିଥାନ୍ତି। ଅଧିକାଂଶ ସମୟରେ ମୁଖ୍ୟ ଛକ ନିକଟରେ ଥିବା ଏଟିଏମ କେନ୍ଦ୍ର ଠାରେ ଆଶ୍ରୟ ନିଅନ୍ତି। କେଉଁ ଏକ ଖିଆଲି ମନ ନେଇ କିମ୍ବା ନିଜ ଆତ୍ମସନ୍ତୋଷ୍ଟି ପାଇଁ ବହୁ ବର୍ଷ ହେଲା ସଂପୃକ୍ତ ମହିଳା ଜଣକ ଉତ୍ସର୍ଗୀକୃତ ଭାବେ ଏଭଳି ସଫେଇ କାର୍ଯ୍ୟରେ ଲାଗିଛନ୍ତି।