20-Mar-2023

ବଲାଙ୍ଗିର,-ବଲାଙ୍ଗୀର ଜିଲ୍ଲା ବଡମାଳ ଗୋଲାବାରୁଦ କାରଖାନାର ବହୁମୁଖି ସଭାଗୃହଠାରେ ଆଇଏନଟିୟୁସି ଟ୍ରେଡୁନିୟନର ଜିଲ୍ଲାସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି । ଆଇଏନଟିୟୁସିର ଜିଲ୍ଲା ସଭାପତି କୃଷ୍ଣଚନ୍ଦ୍ର ସାହୁଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ଆଇଏନଟିୟୁସିର ରାଜ୍ୟଶାଖା ସଭାପତି ତଥା ରାଷ୍ଟ୍ରୀୟଶାଖାର ଉପସଭାପତି ପୂର୍ବତନ ରାଜ୍ୟସଭା ସାଂସଦ ଡ.ରାମଚନ୍ଦ୍ର ଖୁଣ୍ଟିଆ ଯୋଗଦେଇ ଦେଶରେ ସରକାରୀ ଓ ରାଷ୍ଟ୍ରାୟତ୍ତ ଉଦ୍ୟୋଗର କର୍ମଚାରୀଙ୍କୁ ପୁରୁଣାପେନସନ ନୀତି ଲାଗୁକରିବାକୁ ଦାବି କରିଛନ୍ତି । ଏହି ଅବସରରେ ସେ କହିଛନ୍ତି ଯେ,ଦେଶରେ ମୋଦୀ ସରକାର ଆସିଲା ପରେ ଶ୍ରମିକ/କର୍ମଚାରୀ ମାରଣ ନୀତି ଚାଲିଛି । ରାଷ୍ଟ୍ରାୟତ୍ତ ଉଦ୍ୟୋଗଗୁଡିକରୁ କର୍ମଚାରୀ ଛଟେଇ କରାଯିବା ସହିତ ବେଆଇନ ଭାବରେ ଘରୋଇକରଣ କରାଯାଉଛି । ଏହାକୁ ଡ.ଖୁଣ୍ଟିଆ ତୀବ୍ରସମାଲୋଚନା କରିବା ପୁରୁଣା ପେନସନ ବଦଳରେ ନୂଆ ପେନସନ ନୀତି ଲାଗୁକରି କର୍ମଚାରୀଙ୍କୁ ତାଙ୍କର ନ୍ୟାର୍ଯ୍ୟଅଧିକାରରୁ ବଞ୍ଚିତ କରାଯାଉଛି ବୋଲି କହିଛନ୍ତି । କଂଗ୍ରେସଶାସିତ ରାଜ୍ୟ ଯଥା ରାଜସ୍ଥାନ,ଛତିଶଗଡ,ଝାରଖଣ୍ଡ ଓ ହିମାଚଲପ୍ରଦେଶରେ ପୁରୁଣା ପେନସନ ନୀତିକୁ ପୁଣି ଲାଗୁକରାଯାଇଛି । ସେହିପରି  ରାୟପୁରରେ ଜାତୀୟକଂଗ୍ରେସର ଅଧିବେସନରେ ପୁରୁଣା ପେନସନ ଲାଗୁକରିବାକୁ କଂଗ୍ରେସଦଳ ପ୍ରସ୍ତାବ ମଧ୍ୟ ପାରିତ କରିଛି ବୋଲି କହିଥିଲେ । ଏହି ଅବସରରେ ଡ.ଖୁଣ୍ଟିଆ ବଡମାଳ ଗୋଲାବାରୁ କାରଖାନାର ୬୩୦ ଜମିହରା ପରିବାରକୁ ତୁରନ୍ତ କାରଖାନାରେ ନିୟୋଜିତ କରିବାକୁ ସାଧାରଣ ପରିଚାଳକଙ୍କ ସହିତ ଆଲୋଚନା କରିଥିଲେ । ଏହା ସହିତ ସ୍ଥାନୀୟ ଶ୍ରମିକଙ୍କୁ ପ୍ରଧାନ୍ୟଦେଇ କାରଖାନାରେ କାମ କରାଇବା ଓ କର୍ମଚାରୀଙ୍କୁ ପୁରୁଣା ପେନସନ ଦେବାକୁ ଦାବି କରିଥିଲେ । ଏହି ବୈଠକରେ ପୂର୍ବତନ ମନ୍ତ୍ରୀ ସୁରେନ୍ଦ୍ର ସିଂଭୋଇ,କିଶୋରଚନ୍ଦ୍ର ଜେନା,ମଦନମୋହନ ଧଳ,ନିର୍ମଳ ସାମଲ,ପ୍ରଣତୀ ମିଶ୍ର,ଧରଣୀ ସ୍ୱାଇଁ,କେଦାର ବାରିକ,ସଂନ୍ଦୀପ ବଗର୍ତ୍ତି ପ୍ରମୁଖ ମଞ୍ଚାସୀନ ଥିଲେ ଓ ଉଦବୋଧନ ଦେଇଥିଲେ ।