31-Dec-2022

ବଲାଙ୍ଗୀର(ପ୍ରେରଣା ଖବର): ଭୁବନେଶ୍ଵରର ଉତ୍କଳ ରଙ୍ଗମଞ୍ଚ ଠାରେ ତ୍ରିଭଙ୍ଗ କଳା ନିକେତନର ଅଖିଳ ଭାରତୀୟ ନୃତ୍ୟ, ସଙ୍ଗୀତ ଓ ଚିତ୍ରାଙ୍କନ ଉତ୍ସବରେ କଳା ସମର୍ପଣ ସମ୍ମାନରେ ସମ୍ମାନିତ ହୋଇଛନ୍ତି ବଲାଙ୍ଗୀରର ତେଲିଗୋଠ ପଡାର ଜ୍ୟୋତିରେଖା ତ୍ରିପାଠୀ (ପିଙ୍କି)। ତାଙ୍କ ମାଁ ସୁଭାସିନୀ ଓ ବାପା ପୂର୍ଣ୍ଣଚନ୍ଦ୍ରଙ୍କ ପ୍ରେରଣା ଓ ଉତ୍ସାହ ଯଥେଷ୍ଟ ଅବଦାନ ରହିଥିବା କହନ୍ତି ଜ୍ୟୋତିରେଖା । ପିଲାଟି ଦିନରୁ ନୃତ୍ୟ ପ୍ରତି ଆକର୍ଷିତ ହୋଇ ପ୍ରଥମେ ରାଧାରାଣୀ ସାଂସ୍କୃତିକ ଅନୁଷ୍ଠାନରୁ ନୃତ୍ୟ ଶିକ୍ଷା ଆରମ୍ଭ କରିଥିଲେ। ପରେ ପରେ 'ପଞ୍ଚମ' ଓ 'ସ୍ୱରଝାଙ୍କର' ବଲାଙ୍ଗୀର ତଥା ଗୁରୁ ଶ୍ରୀ ସର୍ବେଶ୍ଵର ସାହୁଙ୍କ ତତ୍ତ୍ଵାବଧାନରେ ଓଡ଼ିଶୀ ନୃତ୍ୟ ଶିକ୍ଷା କରି  'ସଙ୍ଗୀତ ନାଟକ ଏକାଡେ଼ମୀ' ଭୁବନେଶ୍ୱର ରୁ ନୃତ୍ୟ ଶାସ୍ତ୍ରୀ ଓ ଚଣ୍ଡିଗଡ ପ୍ରାଚୀନ

କଳାକେନ୍ଦ୍ରରୁ ନୃତ୍ୟ 'ବିଷାରଦ' ରେ ଉତ୍ତୀର୍ଣ୍ଣ ହୋଇଛନ୍ତି। ସମ୍ବଲପୁର ବିଶ୍ୱବିଦ୍ୟାଳୟରୁ ବଲାଙ୍ଗୀର ଜିଲ୍ଲାର ପ୍ରଥମ ଓଡିଶୀ ନୃତ୍ୟଶିଳ୍ପୀ ଭାବେ ସେ ୨୦୧୨ ମସିହାରେ ପ୍ରଦର୍ଶନ କଳା (ଓଡ଼ିଶୀ ନୃତ୍ୟ) ରେ ସ୍ନାକୋତ୍ତର ଓ ଉତ୍କଳ ବିଶ୍ୱବିଦ୍ୟାଳୟରେ ଭୁବନେଶ୍ୱରରୁ ଏମ୍ ଫିଲ୍ ଡିଗ୍ରୀ (ଓଡ଼ିଶୀ) ଲାଭ କରିଛନ୍ତି l ସେ ଓଡ଼ିଶାର ବିଭିନ୍ନ ଲୋକ ମହୋତ୍ସବ, ବରଗଡ଼ ଧନୁଯାତ୍ରା, କଟକ ବାଲିଯାତ୍ରା ଓ ରାବଣ ପୋଡିରେ ଅଂଶ ଗ୍ରହଣ କରି ଉଚ୍ଚପ୍ରଶଂସିତ ହୋଇ ପ୍ରମାଣପତ୍ର ପାଇଛନ୍ତି । ଏହା ସହିତ ୨୦୦୯, ୨୦୧୦, ୨୦୧୧ ରାଜ୍ୟସ୍ତରୀୟ ଯୁବ ମହୋତ୍ସବ ଓ ୨୦୧୦ ମସିହାରେ ଜାତୀୟ ଯୁବ ମହୋତ୍ସବରେ ଅଂଶଗ୍ରହଣ କରିବାର ସୁଯୋଗ ପାଇଛନ୍ତି। ଭୁବେଶ୍ବର ଓ ଭବାନୀପାଟଣା ଦୂରଦର୍ଶନ କେନ୍ଦ୍ର କାର୍ଯକ୍ରମରେ ମଧ୍ୟ ଅଂଶଗ୍ରହଣ କରି ଉଚ୍ଚ ପ୍ରଶଂସିତ ହୋଇଛନ୍ତି। ନୃତ୍ୟ ପରିବେଷଣରେ 'ଅକ୍ଷର' ଅନୁଷ୍ଠାନ ତରଫରୁ √ ଅଶୋକ ରଥ କଳିକା ସମ୍ମାନ ଓ ଭୁବନେଶ୍ବର ସ୍କାର୍ଟ ତରଫରୁ ମଧ୍ୟ ୨୦୦୮ ରେ ସମ୍ମାନିତ ହୋଇଛନ୍ତି। ୨୦୨୨ ଅକ୍ଟୋବରରେ ସେ ଭୁବନେଶ୍ୱରର 'ନିର୍ଝରା' ଅନୁଷ୍ଠାନ ତରଫରୁ ଓଡ଼ିଶୀ ନୃତ୍ୟ ପରିବେଷଣ କରି ନୃତ୍ୟମଣି ସମ୍ମାନ ପାଇଛନ୍ତି।