24-Dec-2022

ରେଢ଼ାଖୋଲ (ଅନିଲ କୁମାର ପୃଷ୍ଟି ) ସମ୍ବଲପୁର ଜିଲ୍ଲା ରେଢ଼ାଖୋଲ  ସହରର କଲେଜ ଛକ ନିକଟରେ ବସୁଥିବା ଶନିବାର ସାପ୍ତାହିକ ବଜାରରୁ ସକାଳ ୧୧ ଟା ସମୟରେ ସହରର ଜଣେ ବ୍ୟବସାୟୀ ପୁରୁଷୋତ୍ତମ ଅଗ୍ରୱାଲଙ୍କ ଠାରୁ ମୋବାଇଲ ଚୋରି କରି ଫେରାର ମାରୁଥିବା ବେଳେ ସେମାନଙ୍କୁ ରେଢ଼ାଖୋଲ ପୋଲିସ ଗୋଡେଇ ଗୋଡେଇ ଧରି ଗିରଫ କରିଛି। ସୂଚନାଯୋଗ୍ୟ ଯେ ସହରର ଜଣେ

ବ୍ୟବସାୟୀ ପୁରୁଷୋତ୍ତମ ଅଗ୍ରୱାଲ ଶନିବାର ସାପ୍ତାହିକ ବଜାରକୁ ଯାଇଥିଲେ। ସେ ପରିବା କିଣୁଥିବା ବେଳେ ଆଗ ପକେଟ୍ ରେ ତାଙ୍କର ମୋବାଇଲକୁ ରଖିଥିଲେ। ଚୋର ମାନେ ପକେଟ୍ ରୁ ମୋବାଇଲକୁ ଚୋରି କରି ରେଢ଼ାଖୋଲ ସହର ପଟକୁ ଆସିଥିଲେ। ଚୋରି ହୋଇଥିବା ନେଇ ପୁରୁଷୋତ୍ତମ ଅଗ୍ରୱାଲ ପୋଲିସକୁ ଖବର ଦେଇଥିଲେ। ଖବର ପାଇ ରେଢ଼ାଖୋଲ ପୋଲିସ ଗୋଟିଏ ଚୋରକୁ ଗୋଡେଇ ଗୋଡେଇ ଖନ୍ଦାଢ଼ିପ ସ୍ଥିତ ଷ୍ଟେଟ୍ ବ୍ୟାଙ୍କ ନିକଟରେ କାବୁ କରିଥିଲେ। ଅନ୍ୟ ଜଣେ ଟ୍ରେନରେ ଫେରାର ହେବାପାଇଁ ଟିକେଟ କାଟି ଟ୍ରେନକୁ ଅପେକ୍ଷା କରୁଥିବା ବେଳେ ରେଢ଼ାଖୋଲ ରେଲୱେ ଷ୍ଟେସନ ପ୍ଳାଟଫର୍ମରୁ ଚଢ଼ାଉ କରି କାବୁ କରିଥିଲେ। ଏବଂ ଚୋରି ହୋଇଥିବା ମୋବାଇଲକୁ ମଧ୍ୟ ଉଦ୍ଧାର କରିଥିଲେ। ଉଭୟଙ୍କୁ ପୋଲିସ ଗିରଫ କରି ଘଟଣାର ତଦନ୍ତ ଜାରି ରଖିଥିବା ଜଣାପଡିଛି।