17-Oct-2021

ଲୋଇସିଂହା, (ବିନୋଦ କୁମାର ଦୀପ) ବଲାଙ୍ଗୀର ଜିଲା ଲୋଇସିଂହା ବ୍ଲକ ରତାଖଣ୍ଡି ପଞ୍ଚାୟତ ଅନ୍ତର୍ଗତ ଫଲସାମାଲ ଗାଁରେ କିଡନୀ ରୋଗ କାୟା ବିସ୍ତାର କରିବାରେ ଲାଗିଛି l ଏହି ଗ୍ରାମରେ ଗତ ଚାରିବର୍ଷ ମଧ୍ୟରେ ସାତ ଜଣଙ୍କ କିଡନୀ ରୋଗରେ ମୃତ୍ୟୁ ହୋଇଥିବା ବେଳେ ଆହୁରି ଅନେକ ବ୍ୟକ୍ତି ଚିକିତ୍ସିତ ହେଉଛନ୍ତି l
ଦୁଇ ୱାର୍ଡ ବିଶିଷ୍ଟ ଫଲସାମାଲ ଗ୍ରାମର ମୋଟ ଜନସଂଖ୍ୟା ପ୍ରାୟ ୭ ଶହ ପାଖାପାଖି । ଗତ ଚାରିବର୍ଷ ତଳେ ଗ୍ରାମର ଦିନ ବରିହା(୫୫) ଙ୍କ କିଡନୀ ରୋଗରେ ମୃତ୍ୟୁ ହୋଇଥିଲା । ତାଙ୍କ ପରେ ରୁକ୍ମଣୀ ଭୁଏ(୫୦), ମନବୋଧ ବିଶ୍ୱାଳ(୫୫), ଭ୍ରମର ବୁଡେକ(୬୦), କାଳିନ୍ଦ୍ରୀ ଭୁଏ(୬୦), ଭାଗବତ ପଧାନ(୫୫), ବିନାୟକ ବିଶ୍ୱାଳ(୪୦) ପ୍ରମୁଖଙ୍କ ଏହି ରୋଗରେ ମୃତ୍ୟୁ ହୋଇଥିଲା । ବର୍ତ୍ତମାନ ଗ୍ରାମର ଗୁଲାପି ଭୁଏ(୪୫), ଶାନ୍ତିଲତା ବିଶ୍ୱାଳ(୫୫), ଯଦୁମଣି ବରଗେ ଙ୍କ ସମେତ ଆହୁରି ୪/୫ ଜଣଙ୍କ ଅବସ୍ଥା ଶୋଚନୀୟ ହୋଇପଡିଛି । ଜଣକ ପରେ ଜଣେ ଏହି ରୋଗରେ ଆକ୍ରାନ୍ତ ହୋଇ ମୃତ୍ୟୁ ମୁଖରେ ପଡୁଥିବା ବେଳେ ଗ୍ରାମବାସୀ ଆତଙ୍କିତ ଅବସ୍ଥାରେ ଅଛନ୍ତି । ଗ୍ରାମର ଗୁଲାପି ଭୁଏ ଶଯ୍ୟାଶାୟୀ ଅବସ୍ଥାରେ ଥିବାବେଳେ କିଡନୀ ରୋଗାକ୍ରାନ୍ତ ଶାନ୍ତିଲତା ବିଶ୍ୱାଳ ମାତ୍ର ମାସକ ତଳେ ନିଜର ପୁଅକୁ ଏହି ରୋଗରେ ହରାଇଛନ୍ତି । ଏହି ଗ୍ରାମରେ କିଡନୀ ସମସ୍ୟା ସୃଷ୍ଟି ହେବାର କାରଣ ଓ ନିରାକରଣ ଦିଗରେ ଦିଗରେ ସ୍ୱାସ୍ଥ୍ୟ ବିଭାଗ ଦୃଷ୍ଟି ଦେଉନଥିବା ବେଳେ ଏହି ସମସ୍ୟା ଦିନକୁ ଦିନ ଗୁରୁତର ହେଉଛି । ସ୍କୁଲ ଓ ଅଙ୍ଗନବାଡି ପରିସର ମଧ୍ୟରେ ଥିବା ନଳକୁପକୁ ମିଶାଇ ଗ୍ରାମରେ ମୋଟ ୮ ଟି ନଳକୂପ ରହିଥିବା ବେଳେ ଗ୍ରାମକୁ ଅଦ୍ୟାବଧି ପାଇପ ଯୋଗେ ପାନୀୟ ଜଳ ଯୋଗାଣ ହୋଇ ପାରିନାହିଁ । ଗ୍ରାମରେ ଥିବା ନଳକୂପ ଗୁଡିକର ପାଣି ଯାଞ୍ଚ କରାଯିବା ସହିତ ମାଗଣାରେ ସମସ୍ତଙ୍କ ସ୍ୱାସ୍ଥ୍ୟ ପରୀକ୍ଷା କରାଯିବାକୁ ଦାବି କରିଛନ୍ତି ସ୍ଥାନୀୟ ବାସିନ୍ଦା ବିଦ୍ୟାସାଗର ନାଏକ । 
ଅପରପକ୍ଷରେ ଫଲସାମାଲ ଗ୍ରାମରେ କିଡନୀ ରୋଗ ବ୍ୟାପୁଥିବା ନେଇ ଲୋଇସିଂହା ସ୍ୱାସ୍ଥ୍ୟ ବିଭାଗ ନିକଟରେ କୌଣସି ସୂଚନା ନ ଥିବା ଜଣାଯାଇଛି । ବଲାଂଗୀର ଜିଲ୍ଲା ସ୍ୱାସ୍ଥ୍ୟ ବିଭାଗ ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି l