03-Nov-2020

ଭଦ୍ରକ (ଭଦ୍ରକ ରୁ ଦୀପକ କୁମାର ଷଡଙ୍ଗୀ ଙ୍କ ରିପୋର୍ଟ)ରାଜ୍ୟ ସରକାର ଆଗାମୀ ୧୬ ତାରିଖରୁ ରାଜ୍ୟରେ ଥିବା ସ୍କୁଲ କଲେଜରେ ୯ମ ଶ୍ରେଣୀରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କ ନିମିତ୍ତ ପାଠପଢା ଆରମ୍ଭ କରିବାକୁ ଚିନ୍ତା କରୁଥିବା ବେଳେ ଜିଲ୍ଲାରେ ଏହା କିପରି ସଫଳ ହୋଇ ପାରିବ ସେ ନେଇ ଜିଲ୍ଲାପାଳମାନେ ଏକ ଖସଡା ପ୍ରସ୍ତୁତ କରୁଛନ୍ତି । ଏହି ପରିପ୍ରେକ୍ଷୀରେ ଭଦ୍ରକ ଜିଲ୍ଲାରେ ଥିବା ଯୁକ୍ତ ୨ କଲେଜ ଗୁଡିକରେ ପାଠପଢା ଆରମ୍ଭ କରିବାକୁ ଚିନ୍ତା ନେଇ ଜିଲ୍ଲାପାଳ ଡ. ଜ୍ଞାନ ଦାସ, ଅତିରିକ୍ତ ଜିଲ୍ଲାପାଳ (ସାଧାରଣ) ଶ୍ୟାମଭକ୍ତ ମିଶ୍ର, ଉପଜିଲ୍ଲାପାଳ ପୀତାମ୍ବର ସାମଲ ଆଜି ଯୁକ୍ତ ୨ କଲେଜର ଅଧ୍ୟକ୍ଷମାନଙ୍କ ସହ ଏକ ବୈଠକରେ ବିସ୍ତୃତ ଆଲୋଚନା କରିଥିଲେ । ପାଠପଢା ଆରମ୍ଭ କରିବାକୁ ସମସ୍ତ ଅଧ୍ୟକ୍ଷ ବୈଠକର ମତ ପ୍ରକାଶ କରିଥିଲେ । ଏ ନେଇ କଲେଜ ମାନଙ୍କରେ କୋବିଡ଼ ସୁରକ୍ଷା ବନ୍ଦୋବସ୍ତ କିପରି କରାଯିବ ସେ ନେଇ ଏକ ଖସଡା ପ୍ରସ୍ତୁତ କରି ଆସନ୍ତା ୭ ଦିନ ମଧ୍ୟରେ ଜିଲ୍ଲା ପ୍ରଶାସନକୁ ଦେବାକୁ ଜିଲ୍ଲାପାଳ ଡ. ଦାସ ଅଧ୍ୟକ୍ଷମାନଙ୍କୁ କହିଥିଲେ । କଲେଜ ଖୋଲିବା ପାଇଁ ହେଲେ ପ୍ରତିଟି କଲେଜର ପରିଚାଳନା ବିଭାଗ ଦ୍ୱାରା କଲେଜ ପରିସରକୁ ନିୟମିତ ବ୍ୟବଧାନରେ ସାନିଟାଇଜ କରିବେ, ଛାତ୍ରଛାତ୍ରୀ କ୍ଲାସରୁମ୍‌ରେ ବସିବା ସମୟରେ ଯେପରି ସାମାଜିକ ଦୂରତ୍ୱ ବଜାୟ ରହିବ, କଲେଜ ହତା ମଧ୍ୟକୁ ପ୍ରବେଶ ସମୟରେ କୋବିଡ଼ ଗାଇଡ ଲାଇନ ଅନୁଯାୟୀ ସମସ୍ତଙ୍କ ଆନୁସଂଗିକ ପରୀକ୍ଷା କରାଯାଇ ପ୍ରବେଶ କରିବାକୁ ଦିଆଯିବ, ଏହାର ପରିଚାଳନା ପାଇଁ କଲେଜ ପକ୍ଷରୁ ଜଣଙ୍କୁ କୋବିଡ଼ ପରିଚାଳନା ସ୍ୱତନ୍ତ୍ର ଦାୟିତ୍ୱ ପ୍ରଦାନ କରାଯିବ, କଲେଜ ମଧ୍ୟରେ ଛାତ୍ରଛାତ୍ର ଯେପରି ସାମାଜିକ ଦୂରତ୍ୱର ଉଲଂଘନ ନ କରନ୍ତି ସେଥିପ୍ରତି କଡା ନଜର ରଖାଯିବ, ପ୍ରତ୍ୟେକ ଛାତ୍ରଛାତ୍ରୀ, ଅଧ୍ୟାପକ ଅଧ୍ୟାପିକା, କର୍ମଚାରୀ ସମସ୍ତେ ବାଧ୍ୟତାମୂଳକ ଭାବେ ମାସ୍କ ପିନ୍ଧିବେ, କଲେଜ ପରିସର ଓ ଶ୍ରେଣୀଗୃହକୁ ସି.ସି.ଟି.ଭି. ପରିସରଭୁକ୍ତ କରାଯିବା ଆଦି ବିଭିନ୍ନ ଆନୁସଂଗିକ ପଦକ୍ଷେପ ଗୁଡିକ ବିଷୟରେ ଆଲୋଚନା କରିବା ସହ ଏହାର ପାଳନ ନିମନ୍ତେ କଲେଜ କିଭଳି ପଦକ୍ଷେପ ଗ୍ରହଣ କରିବ ସେ ବିଷୟରେ ଜିଲ୍ଲା ପ୍ରଶାସନକୁ ଅବଗତ କରାଇବାକୁ ବୈଠକରେ ନିର୍ଦ୍ଦେଶ ଦିଆ ଯାଇଥିଲା । ଏପରିକି କୋବିଡ଼ ଆଇନର ଉଲଂଘନ ହେଲେ ସଂପୃକ୍ତ କଲେଜ ବିରୁଦ୍ଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ବୈଠକରେ ଚେତାଇ ଦିଆଯାଇଥିଲା ।