04-Nov-2025

ବିନିକା(ହିମାଂଶୁ ଶେଖର ପୁଟେଲ) ଗୋପପୁରେ ଗୋପୀ ବାଳକ ଓ ସୁଦାମା ସହିତ ମଜା ମଜଲିସରେ ଦିନ କାଟିଥିବା କୃଷ୍ଣ ଯେତେବେଳେ ନିଜ ଘର ଦ୍ବାରିକାକୁ ଗଲେ ସେତେବେଳେ ସାରା ଗୋପପୁର ବାସୀଙ୍କ ଆଖିରୁ ଅଶ୍ରୁ ନିଗୁଡ଼ି ଥିଲା ଏପରିକି ବୃକ୍ଷ ଲତା ପାହାଡ ମଧ୍ୟ ନିମିଷକ ମଧ୍ୟରେ ନିସ୍ତେଜ ହୋଇ ଆଖିରୁ ଲୁହ ଗଡେଇଥିଲେ ।ଗରିବ ବ୍ରାହ୍ମଣ ସୁଦାମା ବହୁ ଅନାଟନରେ ନିଜର ପରିବାର ପରିପୋଷଣ କରି ଆସୁଥିଲା ପତ୍ନୀ ସହିତ କଥାବାର୍ତ୍ତା ହୋଇ ମୈତ୍ର କୃଷ୍ଣ ଭଗବାନଙ୍କୁ ଭେଟିବା ପାଇଁ ସିଦ୍ଧାନ୍ତ କରିଥିଲା ଓ ବହୁ ଦୁଃଖ କଷ୍ଟରେ ଦ୍ବାରିକା ଯାଇ ପ୍ରଭୁ ଶ୍ରୀକୃଷ୍ଣଙ୍କ ସହିତ ଭେଟ ହୋଇଥିଲା ଆଦି ଅନେକ ପ୍ରସଙ୍ଗ ଉପରେ ଫୁଲମୁଠି ଠାରେ ଚାଲିଥିବା ସପ୍ତାହ ପାରାୟଣରେ ବ୍ୟାସ ଅଭିଷେକ ମିଶ୍ର ପୁଙ୍ଖାନୁପୁଙ୍ଖ ଭାବେ ଦେଖଣାହାରୀ ଭକ୍ତଙ୍କ ଠାରେ ଅବଗତ କରିଥିଲେ ।ଫଳରେ ଉପସ୍ଥିତ ଭକ୍ତମାନେ ଗରିବ ବ୍ରାହ୍ମଣ ସୁଦାମା ଉପାଖ୍ୟାନକୁ ମନଭରି ଉପଭୋଗ କରିବା ସହିତ ଯେତେବେଳେ ପ୍ରଭୁ ଶ୍ରୀକୃଷ୍ଣ ସୁଦାମାକୁ କୋଳେଇ ନେଇ ସେବା କରିଲେ ସେତେବେଳେ ପ୍ରଭୁଙ୍କ ଜୟାଗାନରେ ପାରାୟଣ ସ୍ଥଳ ପ୍ରକମ୍ପିତ ହୋଇଥିଲା।କିମ୍ବଦନ୍ତୀ ଅନୁଯାୟୀ ମୈତ୍ର ପ୍ରଭୁ କୃଷ୍ଣଙ୍କୁ ଭେଟି ଉପହାର ଦେବାପାଇଁ ସୁଦାମା କିଛି ମୁଠା ଚାଉଳ କପଡ଼ାରେ ଗଣ୍ଠି ପକାଇ ଦ୍ବାରିକା ଅଭିମୁଖେ ବାହାରିଥିଲେ ।ଦିନ ପରେ ରାତି ଏହିପରି ଅନେକ ଦିନ ବିତିଗଲା ଘଞ୍ଚ ଜଙ୍ଗଲ,ଅବାଡୁଆ ଖାବୁଡ଼ା ରାସ୍ତାରେ ସୁଦାମା ବାଡ଼ି ଟିଏ ଧରି କୃଷ୍ଣ ଜପ କରି ଆଗକୁ ଚାଲିଥାନ୍ତି। ହେଲେ ଦ୍ବାରିକା ଆସିନଥାଏ। ଥକ୍କା ମେଣ୍ଟାଇ ଥାନ୍ତି ଠିକ ଏତିକି ବେଳେ ଜଣେ ବ୍ରାହ୍ମଣ (ଯିଏ କି ପ୍ରଭୁ ଶ୍ରୀକୃଷ୍ଣ ମାୟା ରୂପରେ)ତାଙ୍କ ପାଖକୁ ଆସି ସବୁ ବୁଝିଥାନ୍ତି ଏବଂ ରାସ୍ତା ଦେଖାଇ ଦ୍ବାରିକା ନଗରୀକୁ ନେଇଥାନ୍ତି ।ସୁଦାମା ଦ୍ବାରିକା ପହଞ୍ଚିବା ପରେ ପ୍ରଭୁ ଶ୍ରୀକୃଷ୍ଣ ସେଠାରୁ ଅନ୍ତର୍ଦ୍ଧାନ ହୋଇ ଯାଆନ୍ତି ।ଯାହାକି ସୁଦାମା ବ୍ରାହ୍ମଣଙ୍କୁ ଆଉ ଖୋଜି ପାହାନ୍ତି ନାହିଁ । ସୁଦାମା ଦ୍ବାରିକା ନଗରୀ ମୁଖ୍ୟ ପ୍ରବେଶ ପଥ ପହଞ୍ଚିବା ପରେ ସେଠାରେ ରାଜାଙ୍କ କର୍ତ୍ତବ୍ୟରେ ନିୟୋଜିତ ପ୍ରହରୀ ଛାଡ଼ି ନଦେବାରୁ ସୁଦାମା କୃଷ୍ଣଙ୍କୁ ଭେଟି ନପାରି ଫେରି ଯାଉଥିବା ବେଳେ ନିଜେ ଶ୍ରୀକୃଷ୍ଣ ରାଜ ପ୍ରସାଦରୁ ଦୌଡ଼ି ଦୌଡ଼ି ସୁଦାମାଙ୍କୁ ଅଟକାଇ କୋଳେଇ ଧରି ରାଜ ପ୍ରସାଦକୁ ଆଣି ତାଙ୍କର ସେବା କରିଥାନ୍ତି ।ପ୍ରକୃତ ପକ୍ଷେ ଏପରି ମୈତ୍ର ସ୍ଥାପନ କରିବା ହିଁ ଜୀବନର ଲକ୍ଷ୍ୟ ହାସଲରେ ସହାୟକ ହୋଇଥାଏ।ଦ୍ଵାପର ଯୁଗର ସୁଦାମା ଭଳି ଆଜି ଗ୍ରାମର ଶୁଶ ମିଶ୍ର ସୁଦାମା ବେଶରେ ସଜ୍ଜିତ ହୋଇ ଗ୍ରାମ ପରିକ୍ରମା ପୂର୍ବକ ବହୁ ଦୁଃଖ କଷ୍ଟରେ କୃଷ୍ଣଙ୍କୁ ଭେଟିବା ପାଇଁ ଦ୍ବାରିକା ଗମନ କରିଥିଲେ । ପାରାୟଣରେ ସୁଦାମାଙ୍କ ଚରିତ୍ରର  ବିଷୟ ବସ୍ତୁ ଉପରେ ଅବଗତ ହେବା ସହିତ ସୁଦାମା ଭୂମିକାରେ ଅଭିନୟ କରିଥିବା ଶୁଶ ମିଶ୍ରଙ୍କ  ଉଚ୍ଚକୋଟୀର ଅଭିନୟ ଶୈଲୀକୁ ଶ୍ରଦ୍ଧାଳୁ ଭକ୍ତମାନେ ପ୍ରଶଂସା କରିଥିଲେ ।ଏହି ଅବସରରେ ଉପସ୍ଥିତ ସମସ୍ତ ଶ୍ରଦ୍ଧାଳୁଙ୍କୁ ପ୍ରସାଦ ସେବନରେ ଆପ୍ୟାୟିତ କରାଯାଇଥିଲା।