27-Oct-2025

(ମନୋରଞ୍ଜନ ତ୍ରିପାଠୀ)
ପଶ୍ଚିମ ଓଡ଼ିଶାର ଅଗ୍ରଣୀ ୱେବ୍ ଚେନାଲ ବିଗୁଲ ଟିଭିର ନୂଆଁଖାଇ ଭେଟଘାଟ ଓ ଚତୁର୍ଥ ବାର୍ଷିକ ଉତ୍ସବ ଧୁମ୍ ଧାମରେ ପାଳିତ ହୋଇଯାଇଛି । ସ୍ଥାନୀୟ ଟାଉନ୍ ହଲ୍ ଠାରେ ଆୟୋଜିତ ଏହି କାର୍ଯ୍ୟକ୍ରମରେ ନୃତ୍ୟ, ଗୀତ ସହ କବିତା ଆସର ଆୟୋଜିତ ହୋଇଥିଲା । ପ୍ରଥମାର୍ଦ୍ଧରେ ବଛା ବଛା କବି ଓ କବୟିତ୍ରୀ ମାନଙ୍କୁ ନେଇ ଏକ କବିତା ଆସର ଆୟୋଜିତ ହୋଇଥିଲା । ଏହି ଅବସରରେ ଆୟୋଜିତ ସାହିତ୍ୟ ସଭାରେ ଅତିରିକ୍ତ ଜିଲ୍ଲାପାଳ ଅଞ୍ଜଳୀନା ପ୍ରଧାନ ମୁଖ୍ୟ ଅତିଥିଭାବେ ଯୋଗଦେଇ ବିଗୁଲ୍ ଟିଭି ର ପ୍ରୟାସକୁ ଭୂୟସୀ ପ୍ରଶଂସା କରିଥିଲେ । ଅନ୍ୟମାନଙ୍କ ମଧ୍ୟରେ ସୋନପୁର ମହାବିଦ୍ୟାଳୟ ଓଡ଼ିଆ ବିଭାଗର ଅଧ୍ୟାପିକା ଡ଼ ଇତିଶ୍ରୀ ଦାସ, ପୂର୍ବତନ ପ୍ରାଧ୍ୟାପକ ଡ଼ ଜ୍ୟୋତିରଂଜନ ବହିଦାର, ଲେଖକ ତଥା ସମାଜସେବୀ ଡ଼ ଆର୍ତ୍ତତ୍ରାଣ ବାବୁ, ମହାନଦୀ ଧାରାର ପ୍ରତିଷ୍ଠାତା ପ୍ଲାବନ ମହାପାତ୍ର, ବଶିଷ୍ଠ ଶିକ୍ଷୟତ୍ରୀ ତଥା କବୟିତ୍ରୀ ସନ୍ତୋଷିନି ନନ୍ଦ ପ୍ରମୁଖ ମଞ୍ଚାସିନ ହୋଇ ନିଜ ନିଜ ବକ୍ତବ୍ୟ ରଖିଥିଲେ । ଏହି ସମାରୋହରେ ମୋଟ ୨୫ ଜଣ କବି ଓ କବୟିତ୍ରୀ କବିତା ପାଠ କରିଥିବାବେଳେ କବୟିତ୍ରୀ ଦେବଜାନୀ ମେଶୁଆ ସଂଯୋଜନା କରିଥିଲେ । ସେହିପରି ସନ୍ଧ୍ୟା କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ପୂର୍ବତନ ଲୋକ ସଭା ସାଂସଦ ତଥା କୋଶଲ ଟାଇଗର ବାଳଗୋପାଳ ମିଶ୍ର ଯୋଗଦେଇ ବୀଗୁଲ ଟିଭି ପଶ୍ଚିମ ଓଡ଼ିଶାର କଳା, ସଂସ୍କୃତି ଓ ପରମ୍ପରା ସହ ଲୋକଙ୍କ ସମସ୍ୟା କୁ ନେଇ ଖବର ପରିବେଷଣ କରିଥାଏ। ଯାହା ଏ ଅଞ୍ଚଳ ପାଇଁ ଅନେକ ମାତ୍ରାରେ ସହାୟକ ହୋଇ ପାରିଛି ବୋଲି କହିଥିଲେ । ଅନ୍ୟମାନଙ୍କ ମଧ୍ୟରେ ଜିଲ୍ଲା ଆରକ୍ଷୀ ଅଧିକ୍ଷକ ନାରାୟଣ ନାୟକ, ବରିଷ୍ଠ ସାମ୍ବାଦିକ ତଥା ଓଟିଭି ପଶ୍ଚିମ ଓଡ଼ିଶା ବ୍ୟୁରୋ ଚିପ ମନୋରଞ୍ଜନ ଯୋଶୀ ଯୋଗଦେଇ ବୀଗୁଲ୍ ଟିଭିର ଏଭଳି କାର୍ଯ୍ୟକ୍ରମକୁ ପ୍ରଶଂସା କରିଛନ୍ତି । ସେହିପରି ସମାଜସେବୀ ଅରବିନ୍ଦ ବାରିକ, ଵିଗୁଲ ଟିଭିର ପରିଚାଳନା ଅଧ୍ୟକ୍ଷ ସନ୍ତୋଷ କୁମାର ମିଶ୍ର, ଉପ ସଭାପତି ବଣ୍ଟୁ ଅଗ୍ରୱାଲ ପ୍ରମୁଖ ମଞ୍ଚାସୀନ ଥିଲେ । କାର୍ଯ୍ୟକ୍ରମର ସ୍ଵତନ୍ତ୍ର ଅତିଥିଭାବେ ଭୁବନେଶ୍ୱର ମଧ୍ୟ ନିର୍ବାଚନ ମଣ୍ଡଳୀର ବିଧାୟକ ଅନନ୍ତ ନାରାୟଣ ଜେନା, କେନ୍ଦ୍ରାପଡ଼ା ବିଧାୟକ ଗଣେଶ୍ୱର ବେହେରା ଓ ଖୋର୍ଦ୍ଧାର ପୂର୍ବତନ ବିଧାୟକ ରାକେଶ ସାହୁ ପ୍ରମୁଖ ଯୋଗଦେଇ ସାଂସ୍କୃତିକ ବାର୍ତ୍ତା ପ୍ରଦାନ କରିଥିଲେ । କାର୍ଯ୍ୟକ୍ରମକୁ ଅବିନାଶ ହୋତା ପରିଚାଳନା କରିଥିବାବେଳେ ଏହି ଅବସରରେ ବିଭିନ୍ନ କ୍ଷେତ୍ରରେ ପାରଦର୍ଶିତା ଅର୍ଜନ କରିଥିବା ବ୍ୟକ୍ତି ବିଶେଷଙ୍କୁ ସମ୍ବର୍ଦ୍ଧିତ କରାଯାଇଥିଲା । ପରେ ବିଭିନ୍ନ ବିଦ୍ୟାଳୟର ଛାତ୍ରୀ ମାନଙ୍କ ଦ୍ଵାରା ନୃତ୍ୟ ପରିବେଷିତ ହୋଇଥିଲା । ଶେଷରେ ଅଗ୍ରଣୀ ସାଂସ୍କୃତିକ ଅନୁଷ୍ଠାନ ରୁମ୍ କୁ ଝୁମାନା ଦ୍ବାରା ରଙ୍ଗା ରଙ୍ଗ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । କଣ୍ଠଶିଳ୍ପୀ ତଥା ସଙ୍ଗୀତଜ୍ଞ ଶାଶ୍ଵତ କୁମାର ତ୍ରିପାଠୀ, ପ୍ରଖ୍ୟାତ କଣ୍ଠଶିଳ୍ପୀ ଉମାକାନ୍ତ ବାରିକ, ଇଶ୍ୱରୀ ବେହେରା, ପୀତବାସ ଶତପଥୀ ପ୍ରମୁଖ ସଙ୍ଗୀତ ମାଧ୍ୟମରେ ବିଳମ୍ବିତ ରାତି ଯାଏଁ ଦର୍ଶକ ମାନଙ୍କୁ ଆକୃଷ୍ଟ କରି ରଖିଥିଲେ । ଏହି କାର୍ଯ୍ୟକ୍ରମରେ ସରୋଜ ପଧାନ, ରଞ୍ଜନ ହୋତା, ରାମହରି ସେଠୀ, ଉମାକାନ୍ତ ବାଘ, ନିରଞ୍ଜନ ଭୋଇ, ସମୀର ଭୋଇନା, ରଞ୍ଜନ ବାରିକ ପ୍ରମୁଖ ସହଯୋଗ କରିଥିଲେ ।