19-Oct-2025

ବୀରମହାରାଜପୁର, (ବିନୋଦ ପାଣ୍ଡେ ): ଜୀବନର ଶ୍ରେଷ୍ଠ ଭାବନାର ପରିପ୍ରକାଶ ହେଉଛି ସାହିତ୍ୟ। ସମାଜର ଦର୍ପଣ ହେଉଛି ସାହିତ୍ୟ। ସାହିତ୍ୟ ଜୀବନଦର୍ଶନ ଶିଖାଏ । ଜୀବନକୁ ଆଲୋକିତ କରେ ସାହିତ୍ୟ। ସେହିପରି ଏକ ଜାତିର ପରିଚୟ ହେଉଛି ଭାଷା। ଭାଷା ବଞ୍ଚିଲେ ସାହିତ୍ୟ ବଞ୍ଚିବ। ସାହିତ୍ୟ, ସମାଜ ଓ ସଂସ୍କୃତି ନଥିଲେ ଜୀବନ ନିରର୍ଥକ। ରବିବାର କଳ୍ପନା ସାହିତ୍ୟ, ସଂସ୍କୃତି ଓ ସାମାଜିକ ପରିଷଦ, କଟକର ସୁବର୍ଣ୍ଣପୁର ଜିଲ୍ଲା ଶାଖା ଆନୁକୁଲ୍ୟରେ ବୀରମହାରାଜପୁର ମହାବିଦ୍ୟାଳୟର କନଫରେନ୍ସ ହଲ୍ ପରିସରରେ ଆଞ୍ଚଳିକ ସାହିତ୍ୟ ଉତ୍ସବ ଅନୁଷ୍ଠିତ ହୋଇଯାଇଛି। କଳ୍ପନା ସାହିତ୍ୟ, ସଂସ୍କୃତି ଓ ସାମାଜିକ ପରିଷଦର ସାଧାରଣ ସମ୍ପାଦକ ଡ. ଗୋପାଳଚନ୍ଦ୍ର ଜେନାଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ବରିଷ୍ଠ ପ୍ରଧ୍ୟାପକ ତଥା ଅଧ୍ୟକ୍ଷ ଡ. ହିମାଂଶୁ ଶେଖର ପାଢୀ ମୁଖ୍ୟ ଅତିଥି ଭାବରେ ଯୋଗଦେଇଥିଲେ । ସେହିପରି ଓଡ଼ିଆ ଭାଷା ଓ ସାହିତ୍ୟ ବିଭାଗର ଅଧ୍ୟାପିକା ଯାମିନୀ ଦାଶ ମୁଖ୍ୟବକ୍ତା, ସିଦ୍ଧାର୍ଥ ସ୍ନାତକ ମହାବିଦ୍ୟାଳୟ, ବିନିକାର ଅଧ୍ୟକ୍ଷ ଡ. ଧୀରେନ୍ଦ୍ର କୁମାର ନାୟକ ସମ୍ମାନିତ ଅତିଥି ଭାବରେ ଯୋଗଦେଇଥିଲେ। ସାହିତ୍ୟ ଉତ୍ସବର ପ୍ରଥମ ଭାଗରେ ସାଧାରଣ ଅଧିବେଶନ ଅନୁଷ୍ଠିତ ହେବା ସହିତ ସାହିତ୍ୟ ଆଲୋଚନା ହୋଇଥିଲା। ଏହି ଅବସରରେ ସୁଧୀର କୁମାର ବିଶ୍ଵାଳଙ୍କୁ କଳ୍ପନା ସାମ୍ବାଦିକ ଗୈାରବ ସମ୍ମାନରେ ସମ୍ମାନିତ କରାଯାଇଥିବା ବେଳେ ଯୁଗଳ କିଶୋର ମିଶ୍ର ଓ ରାଧାକାନ୍ତ ବାଘଙ୍କୁ କଳ୍ପନା ସାମ୍ବାଦିକ ସୈାରଭ ସମ୍ମାନରେ ସମ୍ମାନିତ କରାଯାଇଥିଲା। ସେହିପରି ବିନୋଦ କୁମାର ପାଣ୍ଡେଙ୍କୁ କଳ୍ପନା ସାମ୍ବାଦିକ ଭାସ୍କର ସମ୍ମାନରେ ସମ୍ମାନିତ କରାଯାଇଥିଲା। ସ୍ବର୍ଣ୍ଣପ୍ରଭା ମହାପାତ୍ର, ଲକ୍ଷ୍ମୀନାରାୟଣ ସାହୁ ଓ ଯାମିନୀ ଦାଶଙ୍କୁ କଳ୍ପନା ସାହିତ୍ୟ ସମ୍ମାନରେ ସମ୍ମାନିତ କରାଯାଇଥିବା ବେଳେ ଶୁଭ୍ରାଂଶୁ ଶେଖର ପାଢୀଙ୍କୁ କଳ୍ପନା ଭାଷା ଗଙ୍ଗୋତ୍ରୀ ସମ୍ମାନରେ ସମ୍ମାନିତ କରାଯାଇଥିଲା। ଡ. ହିମାଂଶୁ ଶେଖର ପାଢୀ, ଲଲିତା ନାୟକ ଓ ମନୋଜ ମଞ୍ଜରୀ ଦେଓଙ୍କୁ କଳ୍ପନା ସାରସ୍ବତ ସମ୍ମାନରେ ସମ୍ମାନିତ କରାଯାଇଥିଲା। ଅଧ୍ୟାପିକା ଡ. ବନ୍ଦିତା ବିଶ୍ବାଳ ସଭା ସଂଯୋଜନା କରିଥିବା ବେଳେ ଅଧ୍ୟାପକ ସଞ୍ଜୟ ପ୍ରଧାନ ଧନ୍ୟବାଦ ଅର୍ପଣ କରିଥିଲେ। ଦ୍ବିତୀୟ ଭାଗରେ କବିତା ପାଠୋତ୍ସବ ଅନୁଷ୍ଠିତ ହୋଇଥିଲା।