21-Mar-2025

ବଲାଙ୍ଗୀର(ପ୍ରେରଣା ଖବର)-ଦୁର୍ନିତୀମାମଲାରେ ଛନ୍ଦିହୋଇ ୧୭ବର୍ଷ ଧରି ଫେରାର ଥିବା ଲୋୟରସୁକତେଲ ଜଳସେଚନ ପ୍ରକଲ୍ପର ପୂର୍ବତନ ସ୍ୱତନ୍ତ୍ର ଭୂ-ଅର୍ଜନ ଅଧିକାରୀ ବିନୟକୁମାର ଗଡନାୟକଙ୍କୁ ଆଜି ଭିଜିଲାନ୍ସ ବିଭାଗ ଗିରଫ କରିଛି । ଭିଜିଲାନ୍ସ ବିଭାଗର ଏକ ସ୍ୱତନ୍ତ୍ର ଟିମ ଆଜି ତାଙ୍କ ଢେଙ୍କାନାଳ ଜିଲ୍ଲାର ପର୍ଜଙ୍ଗଥାନା କଙ୍କଡାସୋଡା ଗାଁର ପୈତୃକଘରୁ ଗିରଫ କରିଛି । ତାଙ୍କ ନାମରେ ପ୍ରାୟ ୧୨ଟି ଦୁର୍ନିତୀମାମଲା ରହିଛି । ତାଙ୍କ ନାମରେ ସୁକତେଲ ପ୍ରକଲ୍ପର କିଛି ବିସ୍ଥାପିତଙ୍କ ଜମିକ୍ଷତିପୂରଣ ଓ ଥଇଥାନ ରାଶି ଦେବାରେ ଅର୍ଥ ହେରଫେର କରିଥିବା ଅଭିଯୋଗ ହୋଇଥିଲା । ଏନେଇ ଖୋତତାଡ ଚାଲି ଥିବା ବେଳେ ଗିରଫଦାରୀକୁ ଏଡାଇ ସେ ଦୀର୍ଘ ୧୭ବର୍ଷ ହେଲା ଫେରାର ରହିଥିଲେ । ସେ ବଲାଙ୍ଗୀର ଲୋୟରସୁକତେଲ ପ୍ରକଲ୍ପରେ ପ୍ରାୟ ୧୦ବର୍ଷ ପର୍ଯ୍ୟନ୍ତ ସ୍ୱତନ୍ତ୍ର ଭୂ-ଅର୍ଜନ ଅଧିକାରୀ ରହିଥିବା ସମୟରେ ଚୁଡାପାଲିର ଏକ ପରିବାରକୁ ଅହେତୁକ ଅନୁକମ୍ପା ଦେଖାଇ ପ୍ରାୟ ୭୪ଲକ୍ଷ ଟଙ୍କା ବେଆଇନ ଭାବରେ ପ୍ରଦାନ କରିଥିଲେ । ସେହି ଗାଡିବାବଦକୁ ଓ କଇଣ୍ଡାପାଲିର କିଛି ଲୋକଙ୍କୁ ବିନାଅନୁମୋଦନରେ କ୍ଷତିପୂରଣ ବଣ୍ଟନ କରିଥିବା ଭଳି ସଂଗୀନ ଅଭିଯୋଗ ରହିଛି । ପ୍ରାୟ ୧୨ଟି ଦୁର୍ନିତୀ ମାମଲାରେ ତାଙ୍କ ନାମରେ ଭିଜିଲାନ୍ସ ବିଭାଗ ଚାର୍ଜସିଟ ଦେଇଛି ଓ ବଲାଙ୍ଗୀର ଭିଜିଲାନ୍ସ କୋର୍ଟରେ ସେହି ମାମଲା ଚାଲିଛି ।  ୨୦୦୮ ମସିହାରୁ ସେ  ଦୁର୍ନିତୀମାମଲାରେ ଛନ୍ଦିହୋଇ ଫେରାର ଥିଲେ । ଭିଜିଲାନ୍ସ ଏନେଇ ୬୧/୨୦୦୮,୬୬/୨୦୧୦,୬୭/୨୦୧୦,୬୮/୨୦୧୦,୬୯/୨୦୧୦,୭୦/୨୦୧୦,୭୧/୨୦୧୦,୭୨/୨୦୧୦,୭୩/୨୦୧୦,୪୭/୨୦୧୧,୬୯/୨୦୧୨ ଏବଂ ୪୦/୨୦୧୩ ମାମଲା ରୁଜୁ ହୋଇଛି । ଆଜି ଭିଜିଲାନ୍ସ ତାଙ୍କୁ ଗିରଫ କରି ବଲାଙ୍ଗୀରରେ ଭିଜିଲାନକୋର୍ଟର ସ୍ୱତନ୍ତ୍ର ଜଜଙ୍କ ପାଖରେ ହାଜର କରାଇଛି ବୋଲି ଭିଜିଲାନ୍ସ ବିଭାଗ ସୂତ୍ରରୁ ସୂଚନା ମିଳିଛି । ପ୍ରକାଶ ଯେ,ବରିଷ୍ଠ ଓଏଏସ ଅଧିକାରୀ ବିନୟକୁମାର ଗଡନାୟକ ବଲାଙ୍ଗୀର ଲୋୟରସୁକତେଲ ପ୍ରକଲ୍ପରେ ୧୯୯୮ ମସିହାରୁ ୨୦୦୭ ମସିହା ପର୍ଯ୍ୟନ୍ତ ସ୍ୱତନ୍ତ୍ର ଭୂ-ଅର୍ଜନ ଅଧିକାରୀ ଭାବରେ କାମ କରୁଥିଲେ । ସେହି ସମୟ ମଧ୍ୟରେ ଲୋୟରସୁକତେଲ ପ୍ରକଲ୍ପ ଅଞ୍ଚଳରେ ଜମି କିଣାବିକା କରାଇ କିଛି ଲୋକଙ୍କୁ ଧରି ବିସ୍ଥାପିତଙ୍କ ଜମିକ୍ଷତିପୂରଣ ବଣ୍ଟନରେ ମହାଦୁର୍ନିତୀ କରାଇଥିଲେ । ଦୁର୍ନିତୀନିବାରଣ ବିଭାଗ ପାଖରେ ଅଭିଯୋଗ ହେଲାପରେ ଏହାର ଖୋଲତାଡ କରାଯାଇଥିଲା । ଶେଷରେ ଗିରଫ ଭୟରେ ଶ୍ରୀ ଗଡନାୟକ ଫେରାର ହୋଇଯାଇଥିଲେ ।