21-Mar-2025

ଆମ ଉତ୍ତରପିଢୀ ପାଇଁ ଜଙ୍ଗଲ ଓ ପରିବେଶକୁ ସୁରକ୍ଷିତ କରିବାକୁ ପଡିବ-ଜିଲ୍ଲାପାଳ

ବଲାଙ୍ଗୀର(ପ୍ରେରଣା ଖବର)-ଆଜି ବଲାଙ୍ଗୀର ବନଖଣ୍ଡ କାର୍ଯ୍ୟାଳୟର ସଭାକକ୍ଷରେ ବିଶ୍ୱବନଦିବସ ପାଳିତ ହୋଇଯାଇଛି । ବଲାଙ୍ଗୀର ବନବିଭାଗର ଏସିଏଫ ଜିତେନ୍ଦ୍ର ସାହୁଙ୍କ ସଭାପତିତ୍ୱ ଓ ଅର୍ଜୁନ ସାହୁଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବଲାଙ୍ଗୀର ଜିଲ୍ଲାପାଳ ଗୌରବସୀବାଜୀ ଇସଲୱାର,ସମ୍ମାନୀତ ଅତିଥି ଭାବରେ କେନ୍ଦୁଲିଫ ଡିଭିଜନର ଡିଏଫଓ ଶ୍ରୀମତୀ ଅନୀତା ରାୟ,ରାଜ୍ୟପ୍ରଦୂଷଣ ନୀୟନ୍ତ୍ରଣବୋର୍ଡର ବଲାଙ୍ଗୀର ଆଞ୍ଚଳିକ ଅଧିକାରୀ ଶ୍ରୀମତୀ ବବିତା ସିଂ, ଜିଲ୍ଲା ପ୍ରାଣୀ ଚିକିତ୍ସା ଅଧିକାରୀ ଅଂଜନ ଦାସ ଓ ମୁଖ୍ୟବକ୍ତା ଭାବରେ ପଥରଚେପା ଆଦର୍ଶ ବିଦ୍ୟାଳୟର ଅଧ୍ୟକ୍ଷ କ୍ଷମାନିଧି ଝାଙ୍କର ପ୍ରମୁଖ ଯୋଗଦେଇ ଥିଲେ । ଏହି ଅବସରରେ ଆଜିର ବିଷୟବସ୍ତୁ ଜଙ୍ଗଲ ଓ ଖାଦ୍ୟ ଶୀର୍ଷକ ଉପରେ ଆଲୋଚନା ହୋଇଥିଲା । ଜଙ୍ଗଲରୁ ଆମେ ସମସ୍ତେ ପ୍ରତ୍ୟକ୍ଷ ହେଉ ବା ପରୋକ୍ଷରେ ଖାଦ୍ୟ ପାଉଛୁ । ଆଗାମୀ ଭବିଷ୍ୟତରେ ଜୀବଜଗତକୁ ବଞ୍ଚାଇବାକୁ ହେଲେ ଜଙ୍ଗଲକୁ ମଧ୍ୟ ସେହି ପରିମାଣରେ ସୁରକ୍ଷିତ କରିବାକୁ ପଡିବ ବୋଲି ଅତିଥିଗଣ ମତବ୍ୟକ୍ତ କରିଥିଲେ । ଜିଲ୍ଲାପାଳ ଶ୍ରୀ ଇସଲୱାର ତାଙ୍କ ବକ୍ତବ୍ୟରେ କହିଲେ ଯେ, ଜଙ୍ଗଲକୁ ଆମେ ଉତ୍ତରାଧିକାରୀ ସୂତ୍ରରେ ପାଇନାହୁଁ । ଏହାକୁ ଆମେ ଉତ୍ତରପିଢୀ ପାଇଁ ସୁରକ୍ଷିତ ରଖିବାକୁ ଉଧାରୀ ସୂତ୍ରରେ ପାଇଛୁ । ତେଣୁ ଆମ ସମସ୍ତଙ୍କର ଦାୟୀତ୍ୱ ରହିଛି ଜଙ୍ଗଲକୁ ସୁରକ୍ଷିତ ରଖିବା । ଜଙ୍ଗଲ ନଥିଲେ ପରିବେଶ ସନ୍ତୁଳନ ହରାଇବ ଓ ନାନାପ୍ରକାର ବିତ୍ପାତ ହେବ । ବିଶ୍ୱରେ ଖାଦ୍ୟସଂକଟ ଦେଖା ଦେବ । ତେଣୁ ଜଙ୍ଗଲର ସୁରକ୍ଷା ପ୍ରତି ସମସ୍ତେ ଧ୍ୟାନ ଦେବାକୁ ପଡିବ ବୋଲି ଜିଲ୍ଲାପାଳ କହିଥିଲେ । ମୁଖ୍ୟବକ୍ତା ଶ୍ରୀ ଝାଙ୍କର ତାଙ୍କ ବକ୍ତବ୍ୟରେ ଫୁଡଚେନ ବିଷୟରେ ଆଲୋଚନା କରି ଥିଲେ । ଭଗବାନ ପରିବେଶକୁ ଏଭଳି ଭାବରେ ତିଆରିଛନ୍ତି ଯେ,ପ୍ରତ୍ୟେକ ଜୀବଜନ୍ତୁ,କିଟପତଙ୍ଗ,ବୃକ୍ଷଲତାର ଉପଯୋଗିତା ରହିଛି । ସମସ୍ତେ ସମସ୍ତଙ୍କ ଉପରେ ନିର୍ଭରଶୀଳ ରହିଛନ୍ତି । ତୃଣଭୋଜି ପ୍ରାଣୀ ଘାସ ଖାଏ ଓ ସେହି ପ୍ରାଣୀଙ୍କୁ ମାଂଶାସୀ ଜୀବମାନେ ଖାଇଥାନ୍ତି । ପକ୍ଷୀମାନେ ଛୋଟଛୋଟ କିଟପତଙ୍ଗ ଙ୍କୁ ଖାଇଥାନ୍ତି ଫଳରେ ପରିବେଶରେ ଏକ ସନ୍ତୁଳନ ରହିଥାଏ । ଜଙ୍ଗଲ ଉପରେ ପ୍ରାୟତଃ ସମସ୍ତେ ନିର୍ଭରଶୀଳ । ତେଣୁ ଜଙ୍ଗଲସୁରକ୍ଷାକୁ ସମସ୍ତେ ଧ୍ୟାନ ଦେବାର ଆବଶ୍ୟକତା ରହିଛି । ଆଜି ଆଉ ପ୍ଲାକାର୍ଡ ଧରି ରାସ୍ତାରେ ଛିଡାହୋଇ ପ୍ରଦର୍ଶନ କରିବାର ସମୟ ନାହିଁ କେବଳ ବ୍ୟାପକ ବୃକ୍ଷରୋପଣ କରାଇ

ପଦକ୍ଷେପ ନେବାର ଆବଶ୍ୟକତା ରହିଛି ବୋଲି ଶ୍ରୀ ଝାଙ୍କର କହିଥିଲେ । ସେହିପରି କେଏଲ ଡିଏଫଓ ଶ୍ରୀମତୀ ଅନିତା ରାୟ ଓ  ପ୍ରଦୁଷଣନୀୟନ୍ତ୍ରଣ ବୋର୍ଡର ଅଞ୍ଚଳିକ ଅଧିକାରୀ ବବିତା ସିଂ ପରିବେଶ ସହିତ ଜଙ୍ଗଲର ସଂମ୍ପର୍କ ବିଷୟରେ ମତ ରଖିଥିଲେ । ଏହି ଅବସରରେ ଜଙ୍ଗଲ ଓ ପରିବେଶ ସୁରକ୍ଷା ପାଇଁ କାମ କରିଥିବା ଦେଓଗାଁ ରେଞ୍ଜର ତେଣ୍ଟୁଳିଖୁଣ୍ଟି ଆଦର୍ଶବିଦ୍ୟାଳୟ,ହରିଶଙ୍କର ରେଞ୍ଜର ତେଲେନପାଲି ସରକାରୀ ନୋଡାଲ ଉଚ୍ଚପ୍ରାଥମିକ ବିଦ୍ୟାଳୟ,ଟିଟିଲାଗଡ ରେଞ୍ଜର ଦେସିଲ ଏସଏସଡି ହାଇସ୍କୁଲ,ସଦରବ୍ଲକର ଚିକଲବାହାଲ ଗ୍ରାପ,ଖପ୍ରାଖୋଲର ନାନ୍ଦୁପଲା ଗ୍ରାପ ଓ ତୁରେକେଲା ବ୍ଲକର ଢୋଲମାନ୍ଦଲ ଗ୍ରାପକୁ ମାନପତ୍ର ଓ ଅର୍ଥରାଶି ଦିଆଯାଇ ପୁରସ୍କୃତ କରାଯାଇଥିଲା । ସଭାପତିତ୍ୱ କରୁଥିବା ଏସିଏଫ ଜିତେନ୍ଦ୍ର ସାହୁ ଜିଲ୍ଲାର ଜଙ୍ଗଲର ସ୍ଥିତି ବିଷୟ ସହିତ ବିଶ୍ୱବନଦିବସର ବିଷୟବସ୍ତୁ ଉପରେ ସୂଚନା ଦେଇଥିବା ବେଳେ ଶେଷରେ ଏସିଏଫ ମାନସରଂଜନ ବେହେରା ଧନ୍ୟବାଦ ଅର୍ପଣ କରିଥିଲେ । ଏହି କାର୍ଯ୍ୟକ୍ରମରେ ଜିଲ୍ଲାର ବନସୁରକ୍ଷା ସମିତିଗୁଡିକର କର୍ମକର୍ତ୍ତା ଓ ବନବିଭାଗର ଅଧିକାରୀ ତଥା କର୍ମଚାରୀଗଣ ଯୋଗଦେଇଥିଲେ ।