11-Mar-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ଼ ଜିଲ୍ଲା ଅନ୍ତର୍ଗତ ଭଟଲି ବ୍ଲକର ବିଭିନ୍ନ ଗାଁରୁ ଶତାଧିକ କୃଷକ   ଲୋ ଭୋଲ୍ଟେଜ୍ ଓ ପାୱାର୍ କଟ୍ ସମସ୍ୟା  ନେଇ ବିଦ୍ଯୁତ ଉପଖଣ୍ଡ ଅଧିକାରୀ ଭଟଲି ଙ୍କ ଅଫିସ୍ ଘେରାଉ କରି ଏକ ଲିଖିତ ଦାବି ପତ୍ର ପ୍ରଦାନ କରାଯାଇଥିଲା  । ଏସ.ଡି.ଓ ଙ୍କ ଅନୁପସ୍ଥିତିରେ ଇଲେକ୍ଟ୍ରିକାଲ ଜେ.ଇ ଦାବି ପତ୍ର ଗ୍ରହଣ କରିବା ସହିତ ଚାଷୀମାନଙ୍କ ସହିତ ଆଲୋଚନା କରିଥିଲେ। ଜଳସେଚନର କୌଣସି ସୁବିଧା ନଥିବାରୁ ଏହି ଅଞ୍ଚଳର କୃଷକମାନେ ଗଭୀର ନଳକୂପ ଉପରେ ନିର୍ଭର କରି କୃଷିକାର୍ଯ୍ଯ କରି ନିଜ ଜୀବିକା ନିର୍ବାହ କରୁଛନ୍ତି। କିନ୍ତୁ ଚଳିତ ବର୍ଷ କ୍ରମାଗତ ବିଜୁଳି କାଟ, ଲୋ ଭୋଲ୍ଟେଜ୍ ଏବଂ ପାୱାର କଟ୍ ଯୋଗୁଁ ଧାନ ଫସଲ ନଷ୍ଟ ହେବା ସହିତ ପନିପରିବା ଫସଲ ନଷ୍ଟ ହେବାକୁ ଯାଉଛି। ଦିନକୁ ଛଅ ରୁ ଆଠ ଘଣ୍ଟା ପାୱାର କଟ୍ ହେଉଥିବା ବେଳେ ଲୋ ଭୋଲ୍ଟେଜ୍ କାରଣରୁ ଗଭୀର ନଳକୂପ ରୁ ପାଣି ବାହାରୁ ନାହିଁ। ଅନେକ ଚାଷୀଙ୍କ ମୋଟର ପୋଡିଯାଉଛି। ଫଳରେ ଚାଷ ଜମି ଫାଟି ଧାନ ଫସଲ ନଷ୍ଟ ହେବାକୁ ଯାଉଛି। ଏପରି ପରିସ୍ଥିତିରେ ଯଦି କୌଣସି ଚାଷୀର ବିଜୁଳି ସମସ୍ୟା ଜନିତ ଫସଲ ନଷ୍ଟ ହୁଏ ତାହେଲେ ବିଭାଗ ଦାୟୀ ରହିବେ ବୋଲି ଲିଖିତ ଅଭିଯୋଗ କରାଯାଇଛି। ଏହି କାର୍ଯ୍ୟକ୍ରମରେ ଜୟ କିସାନ ଆନ୍ଦୋଳନର ଜିଲ୍ଲା ସଭାପତି ସୁଶୀଲ କୁମାର ସାହୁ, ସାଧାରଣ ସଂପାଦକ ହର ବଣିଆଁ , ବ୍ଲକ ସଂପାଦକ ମିନିଷ୍ଟର ବାରିକ, ବିଜୟ ପ୍ରଧାନ, ଜନ୍ମେଜୟ ଠାକୁର, ଅକ୍ଷୟ ପ୍ରଧାନ, ଭରତ ଚନ୍ଦ୍ର ନାୟକ, ରେବତି କାନ୍ତ ବେହେରା, ନିତ୍ଯାନନ୍ଦ ସାହୁ ଉପସ୍ଥିତ ଥିଲେ।