14-Feb-2025

ବରୀ(ରଞ୍ଜିତମହାନ୍ତି): ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ବରୀ ଅଞ୍ଚଳରେ କୋଟି କୋଟି ଟଙ୍କାର ନିର୍ମାଣ କାର୍ଯ୍ୟ ହେଉଛି ହେଲେ କାର୍ଯ୍ୟ ସରିବା ପୂର୍ବରୁ ଗୋଡ଼ି ଉଠି ଯାଉଛି। ଖବର ପ୍ରସାରଣ ହେଲେ କି ଗ୍ରାମବାସୀ ମାନେ ଅଭିଯୋଗ କଲେ ମଧ୍ୟ ଅଧିକାରୀ ମାନଙ୍କର ଖାତିର ନାହିଁ। ସରକାର ଗମନା ଗମନ ସୁବିଧା ଓ ଗ୍ରାମାଞ୍ଚଳକୁ ସଂଯୋଗି କରଣ ନିମନ୍ତେ ଅର୍ଥ ବରାଦ କରି ରାସ୍ତା ନିର୍ମାଣ କରିବାକୁ ପ୍ରୟାସ କରୁଛନ୍ତି। ମାତ୍ର ଦାୟିତ୍ୱରେ ଥିବା ଠିକାଦାର ଓ ବିଭାଗୀୟ ଅଧିକାରୀଙ୍କ ମଧୁ ଚନ୍ଦ୍ରିକା ଯୋଗୁଁ ରାସ୍ତା ନିର୍ମାଣ ନ ସରୁଣୁ ହୋଇ ଯାଉଛି ଖାଲ ଖମା। ଅନେକ ବିବାଦ ପରେ ପୁଣି ସମ୍ନାକୁ ଆସିଛି ଆଉ ଏକ ରାସ୍ତା ବରୀ ବ୍ଲକ ଅଧିନସ୍ଥ ରତ୍ନଗିରି ପଞ୍ଚାୟତ ଆଲିଆବାଦ ଠାରୁ ପଟଣା ହନୁମାନ ଛକ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ସଡ଼କ ଯୋଜନାରେ ନିର୍ମାଣ ହେଉଛି ରାସ୍ତା। ହେଲେ ନିର୍ମାଣ କାର୍ଯ୍ୟ ଅତି ନିମ୍ନ ମାନର ହେଉଥିବାରୁ କିଛି ସ୍ଥାନରେ ଭାଙ୍ଗି ରୁଜି ଗଲାଣି। ଯେଉଁଥିପାଇଁ କାର୍ଯ୍ୟକୁ ବିରୋଧ କରି ଗ୍ରାମବାସି ମାନେ ନିର୍ମାଣ କାର୍ଯ୍ୟ ବନ୍ଦ କରିଛନ୍ତି । ବିଶେଷ କରି ରାସ୍ତା ନିର୍ମାଣ କାର୍ଯ୍ୟରେ ପତଳା ବାଲି, ନିମ୍ନ ମାନର ଚିପ୍ସ, ବ୍ୟବହାର ହେବା, ଆବଶ୍ୟକ ମୁତାବକ କାର୍ଯ୍ୟରେ ପାଣି ଦିଆ ନ ଯିବା ଯୋଗୁ ରାସ୍ତାରୁ ଗୋଡ଼ି ଉଠୀଯିବା ଆଶଙ୍କା କରି ଗ୍ରାମବାସୀ ମାନେ କାର୍ଯ୍ୟ ବନ୍ଦ ରଖିଛନ୍ତି। ସରକାରୀ ନିୟମ ମୁତାବକ କାର୍ଯ୍ୟ ସମୟରେ ଦାୟିତ୍ୱରେ ଥିବା ଅଧିକାରୀ ମାନେ କାର୍ଯ୍ୟ ତଦାରଖ କରିବା କଥା। କିନ୍ତୁ କାର୍ଯ୍ୟ ହେଉଥିବା ବେଳେ ଏଠି କୌଣସି ଅଧିକାରୀ ତଦାରଖ କରିବାକୁ ଆସୁନାହାନ୍ତି। ଯାହାକୁ ନେଇ ଗ୍ରାମବାସୀ ମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ମାତ୍ର ଏହି କାର୍ଯ୍ୟର ବ୍ୟୟ ଅଟକଳ କେତେ ଏବଂ କେଉଁ କେଉଁ ସାମଗ୍ରୀ ବ୍ୟବହାର କରାଯାଇ କାର୍ଯ୍ୟ କରାଯିବ ତାହା ସୂଚନା ଫଳକରେ ଉଲ୍ଲେଖ ରହିବା କଥା। କିନ୍ତୁ ସୂଚନା ଫଳକ ଥିବା ବେଳେ ଏଥିରେ ବ୍ୟୟ ଅଟକଳର ମୂଲ୍ୟ ଏବଂ କେଉଁ କେଉଁ ପ୍ରକାର କାର୍ଯ୍ୟ କରାଯିବ ଉଲ୍ଲେଖ ନ ଥିବାରୁ ଦାୟିତ୍ୱରେ ଥିବା ଠିକାଦାର ଏଭଳି କାର୍ଯ୍ୟ କରୁଛନ୍ତି ବୋଲି ଗ୍ରାମବାସୀ ମାନେ ଅଭିଯୋଗ ହେଉଛି। ଗ୍ରାମବାସୀ ମାନଙ୍କ ଅଭିଯୋଗକୁ ଆଧାର କରି ବିଭାଗୀୟ କର୍ତ୍ତୃପକ୍ଷ ନିର୍ମାଣ କାର୍ଯ୍ୟକୁ ତଦାରଖ କରିବା ସହିତ ତଦନ୍ତ କରି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚିତ ରଞ୍ଜନ ଜେନା, ରାମ ଜେନା, ସୁମତି ଜେନା, ମୋହନ ଜେନା, କୈଳାସ ଜେନାଙ୍କ ସମେତ ବହୁ ଗ୍ରାମବାସୀ ଦାବି କରିଛନ୍ତି।