11-Feb-2025

ବଲାଙ୍ଗିର,- ଅସମ୍ପୁର୍ଣ୍ଣ ପ୍ରକଳ୍ପକୁ ପୂର୍ବତନ ସରକାର ଭୋଟ ଲୋଭରେ ଉଦ୍‌ଘାଟନ କଲେ । ଲୋକଙ୍କ ବୃହତ୍ତର ସ୍ୱାର୍ଥକୁ ଦେଖି ବିସ୍ତାପିତମାନେ ଅନେକ ସମସ୍ୟା ଥିଲେ ହେଁ ଚୁପ ରହିଲେ । ପ୍ରଶାସନ ଓ ବିଭାଗୀୟ ଅଧିକାରୀମାନେ ସବୁ ସମାଧାନର ପ୍ରତିଶୃତି ଦେଇଥିଲେ କିନ୍ତୁ ଆଜି ପର୍ଯ୍ୟନ୍ତ ବିସ୍ତାପିତଙ୍କ ସମସ୍ୟା ଯଥା ପୁର୍ବଂ ତଥା ପରମ ରହିଛି । ଏପରି ସ୍ଥିତିରେ ଯଦି ବର୍ତ୍ତମାନର ସରକାର ଓ ପ୍ରଶାସନ ପୂର୍ବରୁ ଥିବା ସମସ୍ୟା ଗୁଡିକର ସମସ୍ୟା ସମାଧାନ ନ କରେ ତେବେ ବିଭିନ୍ନ ପୁର୍ନର୍ବାସ କଲୋନିରେ ରହୁଥିବା  ବିସ୍ତାପିତମାନେ ଆନ୍ଦୋଳନମୁହାଁ ହେବେ ବୋଲି ଆଜି ଝାଙ୍କରପାଲି ସ୍ଥିତ ଲୋୟର ସୁକତେଲ ପୁର୍ନର୍ବାସ କଲୋନିରେ ଲୋକଙ୍କ ସମସ୍ୟାକୁ ନେଇ ଆଲୋଚନା ପରେ ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ର ନିଜ ପ୍ରତିକ୍ରିୟାରେ କହିଛନ୍ତି । ସେ ଏହାକୁ ନେଇ ଆହୁରି ମଧ୍ୟ କହିଛନ୍ତି ଯେ ସେ ବିଧାୟକ ଥିଲାବେଳେ ତତ୍‌କାଳିନ ପ୍ରଶାସନ ଏବଂ ପ୍ରକଳ୍ପ ଯନ୍ତ୍ରୀମାନେ ପୁର୍ନର୍ବାସ ଓ ଥଇଥାନକୁ ନେଇ ଅନେକ ପ୍ରତିଶୃତି ଦେଇଥିଲେ । ଯାହାକି ଆଜି ପର୍ଯ୍ୟନ୍ତ ସମାଧାନ ହୋଇନାହିଁ । ଯଦି ବି କିଛି ହୋଇଛି ସେଥିରେ ଦୁର୍ନିତି ହୋଇଥିବାର ଲୋକେ ଅଭିଯୋଗ କରୁଛନ୍ତି । ଉଦାହରଣସ୍ୱରୁପ ଝାଙ୍କରପାଲି ପୁର୍ନର୍ବାସ କଲୋନି ଲୋକଙ୍କ ପାଇଁ ୧୦ ଲକ୍ଷ ଟଙ୍କାର ଅନୁଦାନରେ ବଲାଙ୍ଗିର ସଦର ବ୍ଲକ ପ୍ରଶାସନ ତରଫରୁ ଏକ ପୋଖରୀ ଖୋଳାଯାଇଛି । ଯେଉଁ ଥିରେ କି ଏହା ସିଂହଭାଗ ଅନୁଦାନ ବାଟମାରଣା କରି ଦୁର୍ନିତି ହୋଇଥିବା ସ୍ପଷ୍ଟ ଜଣାପଡୁଛି ବୋଲି ଅଭିଯୋଗ ଆସୁଛି । ଅଧିକାରୀଙ୍କୁ ଅଭିଯୋଗ କଲେ ମଧ୍ୟ କୌଣସି କାର୍ଯ୍ୟନୁଷ୍ଠାନ

ହେଉନାହିଁ ବୋଲି ଲୋକେ ଅଭିଯୋଗ କରୁଛନ୍ତି । ଛୋଟ ଛୋଟ ଛୁଆମାନଙ୍କ ପାଇଁ ଏକ ପ୍ରାଥମିକ ବିଦ୍ୟାଳୟ ବହୁ ଦିନରୁ ଦାବି ହେଉଛି । ପ୍ରଶାସନ ଓ ପ୍ରକଳ୍ପ ଅଧିକାରୀ ସ୍କୁଲ ପାଇଁ ସମ୍ମତି ପ୍ରଦାନ କରୁଥିଲେ ହେଁ ଦୁଇ ବର୍ଷ ହେଲା ସେ ସ୍କୁଲ ହୋଇନଥିବାରୁ ଛୋଟ ଛୋଟ ଛୁଆମାନେ ପାଠ ପଢିବା ପାଇଁ ଘୋର ଅସୁବିଧାର ସମ୍ମୁଖିନ ହେଉଛନ୍ତି । ଆଜି ପର୍ଯ୍ୟନ୍ତ ସ୍ଥାୟୀ ପିଇବା ପାଣି ଓ ଅନ୍ୟାନ୍ୟ ବ୍ୟବହାର ପାଇଁ ପାଣି ବନ୍ଦୋବସ୍ତ ହୋଇପାରିନାହିଁ । ଏପରି କି କିଛି ବିସ୍ତାପିତଙ୍କ ମୁଣ୍ଡପିଛା ହେଉ କି ଫଳନ୍ତି ବୃକ୍ଷ ର କ୍ଷତିପୁରଣ ଆଜି ପର୍ଯ୍ୟନ୍ତ ମିଳିନାହିଁ । ଏପରି ଅବ୍ୟବସ୍ଥାରେ ପୁର୍ନର୍ବାସ କଲୋନିରେ ବିସ୍ତାପିତମାନେ ଅସହାୟ ଅବସ୍ଥାରେ ପଡିରହିଛନ୍ତି । ତେଣୁ ଏପରି ପରିସ୍ଥିତି ଜାରି ରହେ ତେବେ ଆଗାମୀ ଦିନରେ ସମସ୍ତ ବିସ୍ତାପିତମାନେ ପୁଣି ଏକଜୁଟ ହୋଇ ଆନ୍ଦୋଳନମୁହାଁ ହେବେ ବୋଲି ଶ୍ରୀ ମିଶ୍ର ଙ୍କ ଆଗରେ ବିସ୍ତାପିତମାନେ ବିଷୋଦଗାର କରିଛନ୍ତି । ଆଜିର ଏହି ଆଲୋଚନା ସମୟରେ ଶ୍ରୀ ମିଶ୍ରଙ୍କ ସହ ପୂର୍ବତନ ଜିଲ୍ଲା ପରିଷଦ ସଭ୍ୟ ଶ୍ରୀଧର ବାରିକ, ସରପଂଚ ସଂଜୟ ଗଡତ୍ୟା, ଡା. ରାଧାକାନ୍ତ ଭୋଇ, ଭରତ ସାହୁ, ମୀନକେତନ ଚାନ୍ଦ, ବିଷ୍ଣୁ ଛତ୍ରିଆ ସମେତ ଅନେକ ଗ୍ରାମବାସୀ ଉପସ୍ଥିତ ଥିଲେ ।