10-Feb-2025

ଲୋଇସିଂହା, (ପ୍ରେରଣା ଖବର) ଶିକ୍ଷା ବିଭାଗ ତରଫରୁ ତୃତୀୟ ଓ ପଞ୍ଚମ ଶ୍ରେଣୀ ସରକାରୀ ବୃତ୍ତି ପରୀକ୍ଷା  ହେବାର ଦୁଇମାସ ବିତି ଯାଏଥିଲେ ମଧ୍ୟ ଲୋଇସିଂହା ବ୍ଲକରେ ଅଦ୍ୟାବଧି ତାହାର ଫଳାଫଳ ବାହାରି ନ ଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଉଛି l ୨୦୨୩-୨୪ ଶିକ୍ଷାବର୍ଷ ସକାଶେ ତୃତୀୟ ଶ୍ରେଣୀ ପାଇଁ ଗତ ଡିସେମ୍ବର ୭ ରେ ଓ ପଞ୍ଚମ ଶ୍ରେଣୀ ପାଇଁ ନଭେମ୍ବର ୨୫ ରେ ବଲାଙ୍ଗୀର ଜିଲ୍ଲାର ସମସ୍ତ ବ୍ଲକରେ  ପରୀକ୍ଷା ଆୟୋଜିତ ହୋଇଥିଲା । ତେବେ ଜିଲ୍ଲାର ଅନ୍ୟ ବ୍ଲକ ଗୁଡିକରେ ପରୀକ୍ଷା ଫଳ ପ୍ରକାଶ ହୋଇ ସାରିଥିଲେ ସୁଦ୍ଧା ଲୋଇସିଂହା ବ୍ଲକରେ ଅଦ୍ୟାବଧି ତାହା ହୋଇପାରି ନାହିଁ । ପରୀକ୍ଷା ହେବାର ଦୁଇମାସ ବିତି ଯାଇଥିବା ବେଳେ ଫଳ ଘୋଷଣା ପାଇଁ ସମସ୍ତ ପ୍ରକ୍ରିୟା ସରି ଯାଇଥିଲେ ହେଁ କୌଣସି ଏକ ଅହେତୁକ କାରଣ ପାଇଁ ଫଳ ପ୍ରକାଶନରେ କର୍ତ୍ତୃପକ୍ଷ ବିଳମ୍ବ କରୁଛନ୍ତି, ତାହା ବୁଝାପଡୁ ନାହିଁ । ବିଭିନ୍ନ ବାହାନା ଦେଖାଇ କର୍ତ୍ତୃପକ୍ଷ ଫଳ ପ୍ରକାଶନରେ ବିଳମ୍ବ କରୁଥିବାରୁ ତାହାର ସ୍ୱଚ୍ଛତା ଓ ନିରପେକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏ ନେଇ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇବା ସହିତ ପରୀକ୍ଷା ଫଳ ଶିଘ୍ର ଘୋଷଣା କରିବାକୁ ଦାବି ହୋଇଛି । ଲୋଇସିଂହା ବିଇଓ ରୀନାକୁମାରୀ ବେହେରାଙ୍କୁ ଏ ବାବଦରେ ପଚାରିବାରେ ପ୍ରୋସେସରେ ଅଛି, ଶିଘ୍ର ପରୀକ୍ଷା ଫଳ ପ୍ରକାଶ ହେବ ବୋଲି ସୂଚନା ଦେଇଥିଲେ l