30-Aug-2024

ସମ୍ବଲପୁର(ସଂଜୀବ ପାଣିଗ୍ରାହୀ)ସମ୍ବଲପୁର ସହରର ବିକାଶ ପ୍ରକଳ୍ପ ହେବା ସ୍ୱାଗତଯୋଗ୍ୟ, ହେଲେ ସହରର ମୁଖ୍ୟରାସ୍ତା, (ନେଲସନ ମଣ୍ଡେଲା ଛକରୁ ଧୂଚୁରାପଡା ଛକ) ଦୀର୍ଘ ୨କିମି ଲମ୍ବ ଫ୍ଲାଇଓଭର ନିର୍ମାଣ କରି ମୁଖ୍ୟ ରାସ୍ତାକୁ ସଂକୁଚିତ କରିଦେବା କେତେଦୂର ଠିକ ବୋଲି ସାମାଜିକ ଅନୁଷ୍ଠାନ 'ସକ୍ଷମ'ର ସଂଯୋଜକ ସୂର୍ଯ୍ୟ ପାଣିଗ୍ରାହୀ ଏକ ପ୍ରେସବିବୃତି ରେ କ୍ଷୋଭପ୍ରକାଶ କରିଛନ୍ତି l ଯେତେବେଳେ ଫ୍ଲାଇଓଭର ନିର୍ମାଣ କାର୍ଯ୍ୟ ଚାଲିଥିଲା ଦୀର୍ଘ ୨ ବର୍ଷ ସମ୍ବଲପୁରବାସୀ ଯାହା ହଇରାଣ ହୋଇଛନ୍ତି, ତାହା ନକହିବା ଭଲ l ହେଲେ ଫ୍ଲାଇଓଭର ନିର୍ମାଣ ସରିଲା ପରେ ଫ୍ଲାଇଓଭର ତଳେ ଯାତାୟାତ କରୁଥିବା ଲୋକେ ଯାହା ହଇରାଣ ହେଉଛନ୍ତି ତାହା ସମସ୍ତଙ୍କୁ ଜଣା l ସେହି ସମୟରେ ଜିଲ୍ଲା ପ୍ରଶାସନ ଫ୍ଲାଇଓଭର ର ଉଭୟ ପାର୍ଶ୍ଵରେ ଗମନାଗମନ ପାଇଁ ପ୍ରଶସ୍ତ ରାସ୍ତା ଦେବେ ବୋଲି ପ୍ରତିଶୃତି ଦେଇଥିଲେ ଯାହା ପାଣିର ଗାର ପାଲଟିଯାଇଛି ବୋଲି ଶ୍ରୀ ପାଣିଗ୍ରାହୀ ଅଭିଯୋଗ କରିଛନ୍ତି l ଶ୍ରୀ ପାଣିଗ୍ରାହୀ ପ୍ରକାଶ କରିଛନ୍ତି ଯେ ଚାରିଚକିଆ ଯାନ ବିଷୟ ଛାଡ଼ନ୍ତୁ ଦୁଇ ଚକିଆ ଯାନ ଗଲା ବେଳେ ମଧ୍ୟ ବେଳେବେଳେ ରାସ୍ତା ଜାମ ହେଉଥିବା ନଜରକୁ ଆସୁଛି l ସେଥିରେ ପୁଣି ସେହି ରାସ୍ତାରେ ସହରବାସୀଙ୍କ ସୁବିଧା ପାଇଁ "ମୋ ବସ" ଚଳାଚଳ ଚାଲିଛି l ପ୍ରାୟତଃ ଏହି ରାସ୍ତାରେ ଯାତାୟାତ ସମୟରେ ଅନେକ ସ୍ଥାନରେ  ଗାଡି ଅଟକି ଯାଉଛି, କେବେ କେଉଁଠି "ମୋ ବସ" ରାସ୍ତାରେ ଗଲାବେଳେ ଅଣନିଶ୍ୱାସୀ ହୋଇଯାଉଥିବା ଅନୁଭବ ହେଉଛି l ଏହି ସବୁ ସମସ୍ୟା ବିଷୟରେ ଦେଖି ଜାଣି ଜିଲ୍ଲା ପ୍ରଶାସନ ତଥା ମହାନଗର ନିଗମ ଓ ପୂର୍ତ୍ତ ବିଭାଗ ନୀରବଦ୍ରଷ୍ଟା ସାଜୁଥିବା ଦୁର୍ଭାଗ୍ୟଜନକ ବିଷୟ ବୋଲି ଶ୍ରୀ ପାଣିଗ୍ରାହୀ ଦୁଃଖ ପ୍ରକାଶ କରିଛନ୍ତି l
ଏହି ସବୁ ସମସ୍ୟାକୁ ଗୁରୁତ୍ୱର ସହ ବିଚାର ପୂର୍ବକ ନେଲସନ ମଣ୍ଡେଲା ଛକରୁ ପଣ୍ଡିତ ଲକ୍ଷ୍ମୀ ନାରାୟଣ ମିଶ୍ର ଛକ(ଜି.ଏମ. କଲେଜ ଛକ) ରାସ୍ତାକୁ ସହରବାସୀଙ୍କ ସୁଗମନାଗମନ ପାଇଁ ପ୍ରଶସ୍ତ କରାଯାଉ ବୋଲି ଶ୍ରୀ ପାଣିଗ୍ରାହୀ ଜିଲ୍ଲା ପ୍ରଶାସନ ପାଖରେ ଦାବୀ ଜଣାଇଛନ୍ତି l ଯଦ୍ୱାରା ସେ " ମୋ ବସ " ହେଉ କୁ ଅନ୍ୟ ଛୋଟ ବଡ଼ ଯାନ ହେଉ ସ୍ୱଚ୍ଛନ୍ଦରେ ଏହି ପ୍ରମୁଖ ରାସ୍ତା ରେ ଯାତାୟାତ କରିପାରିବ  ବୋଲି ମଧ୍ୟ୍ୟ ସମାଜସେବୀ ଶ୍ରୀ ପାଣିଗ୍ରାହୀ କହିଛନ୍ତି l