27-Aug-2024

ବଲାଙ୍ଗିର(ପ୍ରେରଣା ଖବର): ସ୍ଥାନୀୟ ଭଗବତୀ ନଗର ଶ୍ୟାମାଶ୍ୟାମ ସତ୍‌ସଙ୍ଗ, ବଲାଙ୍ଗୀର ଶାଖା ତରଫରୁ ପବିତ୍ର ଜନ୍ମାଷ୍ଟମୀ ମହୋତ୍ସବ ଓ ସତ୍‌ସଙ୍ଗର ୨୭ତମ ବାର୍ଷିକୋତ୍ସବ ଆନନ୍ଦଉଲ୍ଲାସର ସାହ ପାଳିତ ହୋଇଯାଇଛି । ସକାଳ ୯ଟାରୁ କାର୍ଯ୍ୟକ୍ରମ ପ୍ରାର୍ଥନା, ଆରତୀ, ବନ୍ଦନା ଓ କୀର୍ତ୍ତନ ଆରମ୍ଭ ହୋଇଥଲା । ମଧ୍ୟରାତ୍ରୀ ରେ ଶ୍ରୀକୃଷ୍ଣଙ୍କ ଜନ୍ମୋତ୍ସବ ସହ ପ୍ରଭୁଙ୍କୁ ଗଙ୍ଗାଜଳ ଓ କ୍ଷୀରେ ସ୍ନାନ କରାଯାଇଥିଲା । ପରେ ଏକ ସୁସଜ୍ୱିତ ଦୋଳିରେ ପୂଜାମଣ୍ଡପକୁ ଅଣାଯାଇଥିଲା । ଏଥିରେ ଶତାଧିକ ଶ୍ରଦ୍ଧାଳୁ ଭକ୍ତ ମଣ୍ଡଳୀ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ । ସୁଦୁର କେସିଙ୍ଗା, ମଦନପୁର ରାମପୁର, ଲୋଇସିଂହା, ଟିଟିଲାଗଡ଼, ତରଭା, ତୁଷୁରା ଆଦି ଅଂଚଳରୁ ଅନେକ ସତ୍‌ସଙ୍ଗୀ ଭକ୍ତ ଯୋଗ ଦେଇଥିଲେ । ଜଗଦଗୁରୁ ଶ୍ରୀକୃପାଳଜୀ ମହାରାଜଙ୍କ ମୁଖ୍ୟ ଆଶ୍ରମ ବୃନ୍ଦାବନ ପ୍ରେମ ମନ୍ଦିର, କୃପାଳୁଧାମ୍ ଭକ୍ତି ମନ୍ଦିର ଓ ବର୍ଷାନା କୀର୍ତ୍ତି ମନ୍ଦିରରୁ ପ୍ରସାରିତ ଜନ୍ମାଷ୍ଟମୀ ର ସିଧାପ୍ରସାରଣ ବଡପର୍ଦ୍ଦାରେ ପ୍ରସାରିତ ହୋଇଥିଲା । ଏହି ଅବସରରେ  ସତ୍‌ସଙ୍ଗ ତରଫରୁ ସାଂସ୍କୃତିକ କାର୍ଯ୍ୟକ୍ରମ, ଫେନ୍ସି ଡ୍ରେସ୍ ଓ ଶ୍ରୀକୃଷ୍ଣଙ୍କ ଫଟୋ ପ୍ରତିଯୋଗିତା ଅନୁଷ୍ଠିତ ହୋଇଥିଲା । ଏଥିରେ ଅଂଶଗ୍ରହଣ କରିଥିବା ଶିଶୁ କଳାକାର କୁମାରୀ ଅଂଶୀତା ଦାସ ପ୍ରଥମ ପୁରସ୍କାର ପାଇଥିଲେ । ସତ୍‌ସଙ୍ଗ ତରଫରୁ ଦିବସବ୍ୟାପୀ ପ୍ରସାଦସେବନର ବ୍ୟବସ୍ଥା କରାଯାଇଥିଲା । ଆସନ୍ତାକାଲି ସତ୍‌ସଙ୍ଗ ତରଫରୁ ନନ୍ଦୋତ୍ସବ ପାଳିତ ହେବାର ସୂଚନା ମିଳିଛି ।