08-Jul-2023

କଣ୍ଟାବାଞ୍ଜି(ଆନନ୍ଦ ମୋଟେ ): ବଲାଙ୍ଗୀର ବନବିଭାଗ ଅଧୀନସ୍ଥ ଗୁରୁତ୍ୱପୂର୍ଣ୍ଣ କଣ୍ଟାବାଞ୍ଜି ରେଞ୍ଜ୍ ରେ ଜଣେ ଗାର୍ଡରୁ ପଦୋନ୍ନତି ପାଇ ପାଇ ଆସି ଡେପୁଟିରେଞ୍ଜରରୁ ରେଞ୍ଜର ହୋଇଥିବା ବାରମ୍ବାର ଦୁର୍ନୀତିଅଭିଯୁକ୍ତ ଅଧିକାରୀଙ୍କୁ ଦୀର୍ଘ ପ୍ରାୟ ୫ ବର୍ଷପରେ ଆଉ କେତେବର୍ଷ ବଦଳି କରା ନଯାଇ ଅବସ୍ଥାପିତ କରି ରଖାଯାଇଥିବ ବୋଲି ଜନସାଧାରଣଙ୍କ ପକ୍ଷରୁ ପ୍ରଶ୍ନ ପଚରାଯାଇଛି ବିଭାଗୀୟ ମନ୍ତ୍ରୀ ତଥା ଡିଏଫଓଙ୍କ ସମେତ ଅନ୍ୟାନ୍ୟ ପଦାଧିକାରୀମାନଙ୍କୁ । ଉଲ୍ଲେଖନୀୟ ଯେ ଏହି ଅଧିକାରୀ ଜଣକ ପାଟଣାଗଡ କେନ୍ଦୁପତ୍ର ଡିଭିଜନର ଧଣ୍ଡାମୁଣ୍ଡା - ଶାନ୍ତିପୁର କେନ୍ଦୁପତ୍ର ରେଞ୍ଜ୍ ରେ ରେଞ୍ଜର ଥିଲାବେଳେ ଫଡିପୋଡି ସମେତ ବିଭିନ୍ନ ଗୁରୁତର ଅଭିଯୋଗ ଓ ଅନିୟମିତତାକୁ ଚପାଇ ଦିଆଯାଇଥିଲା । ଏହାପୂର୍ବରୁ ତାଙ୍କ ବିରୋଧରେ ଅନ୍ୟତ୍ର ଅନ୍ୟାନ୍ୟ ଅନିୟମିତତାର ଅଭିଯୋଗମାନ ବି ଥିଲା । ତେବେ ସେ କଣ୍ଟାବାଞ୍ଜି ପରି ବନବିଭାଗର ମୂଲ୍ୟବାନ୍ ଶାଗୁଆନ୍ ପ୍ଲାଣ୍ଟେସନ୍ ରହିଥିବା ଏବଂ ବେଆଇନ୍ କାଠଚୋରି ନିମନ୍ତେ କୁଖ୍ୟାତ କଣ୍ଟାବାଞ୍ଜି ରେଞ୍ଜ୍ ରେ ପ୍ରଥମେ ଡେପୁଟି ରେଞ୍ଜର ଓ ପରେ ପୁଣି ସେଇଠି ରେଞ୍ଜର ଭାବରେ ଅବସ୍ଥାପିତ କରି ରଖାଯାଇ ଆସିଛି । ତାଙ୍କ ବିରୁଦ୍ଧରେ କିଛିଦିନତଳେ ପୂର୍ବତନ ଡିଏଫଓଙ୍କ ଅମଳରେ ଏକ ଦଶଚକିଆ ଡମ୍ଫର୍ ରେ ତାଙ୍କ ଉପସ୍ଥିତିରେ ବେଲପଡା- କଣ୍ଟାବାଞ୍ଜି ରାସ୍ତାର କାନୁଟ୍ ନିକଟରେ ଖୋଦ୍ ଡିଏଫଓ ଯାଇ ଖଇରକାଠ ଚୋରାଚାଲାଣକୁ ଧରିଥିଲେ । ଏକ ଆନ୍ତଃରାଜ୍ୟ କାଠମାଫିଆଙ୍କ ସହ ମିଶି ସେ ମଧ୍ୟ ଏହି ରାକେଟରେ ଜଡିତ ରହିଥିବା ଅଭିଯୋଗ ସତ୍ତ୍ୱେ ଏହା ତାଙ୍କରି ହେପାଜତ୍ ରେ ଦିଆଯାଇଥିଲା ଓ ଶେଷରେ ଦଫାରଫା କରିଦିଆଯାଇଥିଲା । ଏହାପରେ ତୁରେକେଲା ବିଟ୍ ର ମହୁଲପାଟି ନିକଟରେ ଖବର ପାଇ ଲାଠୋର ରେଞ୍ଜର ଧରି ତାଙ୍କୁ ଏକ ଖଇରଚୋରାକାଠ ଭର୍ତ୍ତି ଟ୍ରାକ୍ଟରକୁ ତାଙ୍କୁ ହସ୍ତାନ୍ତର ପରେ ତାହାର ମଧ୍ୟ ଦୃଢ କାର୍ଯ୍ୟାନୁଷ୍ଠାନ ହୋଇ ନଥିବା ଶୁଣିବାକୁ ମିଳିଥିଲା । ଏହାସହିତ ସଲଣ୍ଡିର ବୃକ୍ଷରୋପଣ ଯୋଜନାରେ ତାଙ୍କର ଅନିୟମିତତାର ସମ୍ପୃକ୍ତି ଗଣମାଧ୍ୟମରେ ଲୋକଲୋଚନକୁ ଆସିଥିଲା । ଏହିପରି ତାଙ୍କ ବିରୁଦ୍ଧରେ ବହୁ ଅଭିଯୋଗକୁ ଡିଏଫଓ ନୀତିଶକୁମାର ନଜରଅନ୍ଦାଜ୍ କରିଦେଉଥିବା ଚର୍ଚ୍ଚା ହୋଇଆସୁଛି । ଏଣୁ ଜାଣିଶୁଣି ଏଠାରେ କାଠଚୋରିକୁ ସୁହାଇବା ସହିତ କୋଟି କୋଟି ଟଙ୍କାର ମନରେଗା , ମୋ ଜଙ୍ଗଲ ଯୋଜନା , କାମ୍ପା ଇତ୍ୟାଦି ବିଭିନ୍ନ ସରକାରୀଯୋଜନାରେ ବାଟମାରଣାକୁ ସୁଗମ କରି ତାଙ୍କ ମୁଣ୍ଡରେ ଅଠାବୋଳିଦେବାକୁ ବିଭାଗର ବଡପଣ୍ଡା ଓ ଅସାଧୁ ତଳିଆ ବନକର୍ମଚାରୀଙ୍କ ଅବାଧ ଦୁର୍ନୀତି ନିମନ୍ତେ ତାଙ୍କୁ ଏଠାରେ ଥାପନା କରାଯାଇଥିବା ଲୋକେ ଆଲୋଚନା କରୁଛନ୍ତି ।