06-Jul-2023

ବୀରମହାରାଜପୁର, (ବିନୋଦ ପାଣ୍ଡେ) : ସୁବର୍ଣ୍ଣପୁର ଜିଲ୍ଲାକୁ '୫-ଟି' ସଚିବ ଭିକେ ପାଣ୍ଡିଆନ୍ ପରିଦର୍ଶନର‌ ଗୋଟିଏ ଦିନ ପରେ ଜିଲ୍ଲାର ବିଭିନ୍ନ ଅଞ୍ଚଳରେ ଥିବା କଲେଜ ଗୁଡ଼ିକର ଉନ୍ନତି କରଣ ପାଇଁ ମୁଖ୍ୟମନ୍ତ୍ରୀ ଆର୍ଥିକ ଅନୁଦାନ ପ୍ରଦାନରେ କରିଥିବା ଘୋଷଣା କରିଛନ୍ତି। ଜିଲ୍ଲାର ବୀରମହାରାଜପୁର ବ୍ଲକର ୩ଟି କଲେଜକୁ ମୁଖ୍ୟମନ୍ତ୍ରୀ ସ୍ବତନ୍ତ୍ର ସହାୟତା ଯୋଜନା ରୁ ଆର୍ଥିକ ଅନୁଦାନ ଘୋଷଣା କରାଯାଇଥିବା ଜଣାଯାଇଛି। ବ୍ଲକର ସୁବଳୟା  ହାୟର ସେକେଣ୍ଡାରୀ କଲେଜକୁ ୨୫ ଲକ୍ଷ , ଭୂତିଆପାଲି ପରମେଶ୍ବରୀ ଯୁକ୍ତ ଦୁଇ ହାୟର ସେକେଣ୍ଡାରୀ କଲେଜକୁ ୫୦ ଲକ୍ଷ ଅନୁଦାନ ପ୍ରଦାନ କରିଛନ୍ତି। ସେହିପରି ବୀରମହାରାଜପୁର ମହାବିଦ୍ୟାଳୟକୁ ୧ କୋଟି ଟଙ୍କା ଘୋଷଣା କରିଥିବା ବେଳେ  ସେଥିମଧ୍ୟରୁ ଯୁକ୍ତ ଦୁଇ ହାୟର ସେକେଣ୍ଡାରୀ କଲେଜକୁ ୫୦ ଲକ୍ଷ ଓ ଡିଗ୍ରୀ ହାୟର ସେକେଣ୍ଡାରୀ କଲେଜକୁ ୫୦ ଲକ୍ଷ  ଘୋଷଣା କରାଯାଇଛି। ଅନୁଦାନ ଅର୍ଥରେ କଲେଜ ପାଇଁ ସ୍ମାର୍ଟ କ୍ଲାସରୁମ, ବିଜ୍ଞାନ ପରୀକ୍ଷାଗାର, ପାନୀୟ ଜଳ ସୁବିଧା, ଇ- ଲାଇବ୍ରେରୀ, ଟଏଲେଟ୍ ଆଦି କାମ କରାଯିବ ବୋଲି ନିର୍ଦ୍ଦେଶ ଦିଆଯାଇଛି। ଉକ୍ତ କାର୍ଯ୍ୟ ନିର୍ମାଣ ହେଲେ  ବହୁ ଛାତ୍ରଛାତ୍ରୀ ଉପକୃତ ହୋଇପାରିବେ। କଲେଜ ଅଧ୍ୟକ୍ଷ, ଅଧ୍ୟାପକ, ଅଧ୍ୟାପିକା, ଛାତ୍ରଛାତ୍ରୀ, ପୂର୍ବତନ ଛାତ୍ରଛାତ୍ରୀ, ବୁଦ୍ଧିଜୀବୀ ଓ ଅଭିଭାବକ ମାନେ ମୁଖ୍ୟମନ୍ତ୍ରୀ ଓ ୫-ଟି ସଚିବଙ୍କୁ କୃତଜ୍ଞତା ଜଣାଇଛନ୍ତି।