08-Jun-2023

ବ୍ରହ୍ମପୁର (ଝିଲ୍ଲି କୁମାରୀ ସାହୁ ): ବ୍ରହ୍ମପୁର ସହରରେ ବହୁ ସ୍ଥାନରେ ବିଦ୍ୟୁତ ଖୁଣ୍ଟଗୁଡ଼ିକ ବିପଦପୂର୍ଣ୍ଣ ଅବସ୍ଥାରେ ରହିଥିବା ବେଳେ ଉକ୍ତ ଖୁଣ୍ଟରେ ଥିବା ବିଦ୍ୟୁତ ତାର ଗୁଡ଼ିକ ଝୁଲି ରହିଛି। ଫଳରେ ଉକ୍ତ ରାସ୍ତା ଦେଇ ଯାଉଥିବା ବହୁ ଲୋକ, ପଶୁପକ୍ଷୀ ଉକ୍ତ ତାର ସଂସ୍ପର୍ଶରେ ଆସି ଜୀବନ ହାନି ଘଟିବା ସହ ବିପଦ ସୃଷ୍ଟି କରୁଛି। ଏପରିକି ବହୁ ଦୂର ଦୂରରେ ଖୁଣ୍ଟ ପୁତା ହୋଇଥିବାରୁ ତାର ଗୁଡ଼ିକ ଝୁଲି ରହିଛି। କେତେକ ସ୍ଥାନରେ ଦୁଇ ଖୁଣ୍ଟି ମଝିରେ ଥିବା ଗଛରେ ବିଦ୍ୟୁତ୍ ତାର ଗୁଡାଇ ହୋଇ ରହିଥିବା ବେଳେ କେତେବେଳେ ଯେ ବିଦ୍ୟୁତ୍ ପ୍ରଭାବିତ ହୋଇ ଗଛ ଦ୍ବାରା ଉକ୍ତ ରାସ୍ତା ଦେଇ ଯାଉଥିବା ଜୀବନ ପ୍ରତି ବିପଦର ସମ୍ଭାବନାକୁ ଏଡାଇ ଦିଆଯାଇନପାରେ । ପ୍ରକାଶ ଥାଉ କି ତଳ ଦିନେ ବିଦ୍ୟୁତ୍ ସଂସ୍ପର୍ଶରେ ଆସି ଏକ ମାଙ୍କଡ଼, ଦୁଇଟି ପକ୍ଷୀ, ଏକ ବାଛୁରୀ ବହୁ ଗାଇଙ୍କର ଜୀବନ ପ୍ରତି ବିପଦ ସୃଷ୍ଟି ହୋଇଥିବା ନଜିର୍  ରହିଛି। ବିଭାଗୀୟ କତ୍ତୃପକ୍ଷ ଏଥିପ୍ରତି ତୁରନ୍ତ ଦୃଷ୍ଟି ନଦେଲେ କେତେବଳେ ଯେ ମନୁଷ୍ୟ ଜୀବନ ଚାଲିଯିବ ତାହା କହିହେବନାହିଁ...। ଏହାକୁ ଦେଖିଲେ ସ୍ପଷ୍ଟ ଭାବରେ ଜଣା ପଡୁଛି ବିଦ୍ୟୁତ୍ ଶୁଳ୍କ ଆଦାୟରେ ପ୍ରାଥମିକତା ଦେଉଥିବା ଟି.ପି.ଏସ.ଓ.ଡି.ଏଲ୍ କମ୍ପାନୀ ବିପର୍ଯ୍ୟସ୍ତ ତଥା ବିପଦ ଜନକ ଅବସ୍ଥାରେ ଥିବା ଭିତ୍ତିଭୂମି ସଜାଡିବା ଦିଗରେ ଆଦୌ ଦୃଷ୍ଟି

ଦେଉ ନ ଥିବାର ପରିଲକ୍ଷିତ ହେଉଛି। ଏହାର ଏକ ନିଛକ ଉଦାହରଣ ଦେଖିବାକୁ ମିଳିଛି ସ୍ଥାନୀୟ ୱାର୍ଡ ନମ୍ବର ୨୬ ସ୍ଥିତ ନିଳକଣ୍ଠନଗର ୩ୟ ଓ ଏହାର ଆଖପାଖ ଗଳିରେ। ନିଳକଣ୍ଠ ନଗର ୩ୟ ଗଳିର ବିଦ୍ୟୁତ ଖୁଣ୍ଟ ଓ ୧୧କେଭି ତାର ଗୁଡିକ ଅତି ବିପଦଜନକ ଅବସ୍ଥାରେ ଥିବା ଦେଖାଦେଇଛି । ବିଭାଗୀୟ କର୍ତ୍ତୃପକ୍ଷ ଏହାର ପ୍ରତିକାର କରୁ ନଥିବାରୁ ସାହିବସିନ୍ଦାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ସାହିବସିନ୍ଦାଙ୍କ କହିବା ଅନୁଯାୟୀ କିଛି ବର୍ଷ ତଳେ କୌଣସି ଏକ ଭାରି ଯାନ ଧକ୍କାରେ ବିଦ୍ୟୁତ୍‍ ଖୁଣ୍ଟଟି ଢଳି ପଡ଼ିଥିଲା ଦୀର୍ଘ ଦିନ ବିତିିଯିବା ସତ୍ତ୍ୱେ ନୂତନ ଖୁଣ୍ଟ ଲଗାଇବାର ବ୍ୟବସ୍ଥା କରାଯାଇ ନାହିଁ। ଫଳରେ ବିପଦ ଜନକ ଅବସ୍ଥାରେ ଖୁଣ୍ଟଟି ଝୁଲି ରହିଛି । ସେହିଭଳି ନିଳକଣ୍ଠ ନଗର ୩ୟ ଗଳି ଛକରେ ଏକ ଇଲେକ୍ଟ୍ରିକ୍ କେବୁଲକୁ ବିଭିନ୍ନ ଜାଗାରେ ଯୋଇଣ୍ଟ କରି  ୨ଟି ନଡ଼ିଆ ଗଛରେ କଣ୍ଟା ଦେଇ ଟଙ୍ଗା ଯାଇଛି। ଏଭଳି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ଦୃଶ୍ୟ ଦେଖିଲେ ଧନଜୀବନ ହାନି ହେବାର ସମ୍ଭାବନାକୁ ଏଡାଇ ଦିଆଯାଇ ନପାରେ ବୋଲି ଅଞ୍ଚଳବାସୀ ଆଶଙ୍କା ପ୍ରକାଶ କରୁଛନ୍ତି। ସେହିଭଳି ୪ର୍ଥ ଗଳିରେ ବହୁ ଦୂର ଦୂରରେ ଖୁଣ୍ଟ ପୁତା ହୋଇଥିବାରୁ ତାର ଗୁଡ଼ିକ ଝୁଲି ରହିଛି। କୌଣସି ଅଘଟଣ ଘଟିବା ପୂର୍ବରୁ ବିଭାଗୀୟ କର୍ତ୍ତୃପକ୍ଷ ଏହାର ଆଶୁ ପ୍ରତିକାର ବ୍ୟବସ୍ଥା କରିବାକୁ ଅଞ୍ଚଳବାସୀ ଦାବୀ କରିଛନ୍ତି।