07-Jun-2023

ବିନିକା(ହିମାଂଶୁ ଶେଖର ପୁଟେଲ): ଜଣେ କର୍ତ୍ତବ୍ୟନିଷ୍ଠ ଆଦର୍ଶ ଶିକ୍ଷକ ନିଜର ସ୍ୱଷ୍ଠବାଦିତା ସଚ୍ଚୋଟତା ଓ ନିର୍ଭୀକତା ସତ୍ତ୍ବେ ବରାବର ପ୍ରଶାସନିକ ଆକ୍ରୋଶର ଶିକାର ହୋଇ ଏବେ ବାରଦୁଆର ଶୁଣ୍ଡିପିଣ୍ଡା ହେଉଥିବାର ସମ୍ବେଦନଶୀଳ ଖବର ବୁଦ୍ଧିଜୀବୀ ମହଲରେ ଆଲୋଚନାର ବିଷୟ ପାଲଟିଛି ।ଚାକିରୀରୁ ତାଙ୍କୁ ବହିଷ୍କୃତ କରାଯିବା ପରେ ସେ ମାନବିକ ଅଧିକାର କମିଶନର ଙ୍କ ଦ୍ୱାରସ୍ଥ ହୋଇଛନ୍ତି ।ହେଲେ ବିଭାଗୀୟ କର୍ତ୍ତୃପକ୍ଷ ଅଦ୍ୟାବଧି ନୀରବ ଦ୍ରଷ୍ଟା ସାଜିଥିବା ଜଣାପଡିଛି ।ଶିକ୍ଷକ ଜଣକ ହେଉଛନ୍ତି ପଣ୍ଡିତ କପିଳାସ ଚନ୍ଦ୍ର ଦାଶ । ଶ୍ରୀ ଦାଶ ନବେ ଦଶକରେ ପ୍ରଥମେ ଦୈନିକ ଖବରକାଗଜ ସମ୍ବାଦର ବିନିକା ପ୍ରତିନିଧି ଓ ପରେ ପ୍ରଜାତନ୍ତ୍ର ସାପ୍ତାହିକୀର ସୋନପୁର ଜିଲ୍ଲା ପ୍ରତିନିଧି ଭାବେ ଦୀର୍ଘ ବର୍ଷ ଧରି କାର୍ଯ୍ୟ କରିଥିଲେ ।ସେହି ସମୟରେ ତାଙ୍କ ରିପୋଟୀଙ୍ଗ ଦକ୍ଷତା ଓ ନିର୍ଭୀକତା ପାଇଁ ସେ ଜିଲ୍ଲାର ବୁଦ୍ଧିଜୀବୀ ମହଲରେ ଆଦରର ପାତ୍ର ହୋଇଥିଲେ । ବଂଧୁ ମାନଙ୍କ ଓ ପରିବାରର ଚାପରେ ସେ ରିପୋର୍ଟିଙ୍ଗ ଛାଡ଼ି ୧୯୯୬ ମସିହାରେ ପ୍ରାଥମିକ ଶିକ୍ଷକ ଭାବେ ନିଯୁକ୍ତି ପାଇଥିଲେ ।ସାକ୍ଷାତକାର ପରୀକ୍ଷାରେ ରାଜ୍ୟରେ ସର୍ବୋଚ୍ଚ ନମ୍ବର ରଖିଥିଲେ ।ସେ ପ୍ରଥମେ ବିନିକା ବ୍ଲକ ଅନ୍ତର୍ଗତ ସିଲାଟୀ ପ୍ରାଥମିକ ବିଦ୍ୟାଳୟରେ ଶିକ୍ଷକତା ଆରମ୍ଭ କରିଥିଲେ ।ମାତ୍ର ତାଙ୍କର ସ୍ୱଷ୍ଠବାଦିତା ଓ ନିର୍ଭୀକ ସମାଲୋଚନା ପାଇଁ ପ୍ରାରମ୍ଭରୁ ପ୍ରଶାସନିକ ଆକ୍ରୋଶର ଶିକାର ହୋଇଥିଲେ । ସୋନପୁର ଟ୍ରଷ୍ଟଫଣ୍ଡ ଦୁର୍ନୀତିର ସି.ବି.ଆଇ ତଦନ୍ତ ଦାବୀରେ ସୋନପୁର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସପ୍ତାହ ବ୍ୟାପି ଅନଶନରେ ବସିଥିଲେ ।ସାମ୍ବାଦିକତାରୁ ସମ୍ପୁର୍ଣ୍ଣ ସନ୍ନ୍ୟାସ ନେଇ ନପାରି ପରୋକ୍ଷ ଭାବରେ ଗଣତନ୍ତ୍ରର ଚତୁର୍ଥ ସ୍ତମ୍ବ ପାଇଁ କାର୍ଯ୍ୟ କରି କେତେକ ଦୁର୍ନୀତିଖୋର ବ୍ୟକ୍ତିଙ୍କ ନିଦ ହଜାଇ ଦେଇଥିଲେ ।ସେହିପରି କେତେକ କୁଚକ୍ରୀ ଗୋଷ୍ଠିର ଚକ୍ରାନ୍ତରେ ମାନସିକ ଚାପଗ୍ରସ୍ତ ହୋଇପଡ଼ିଲେ ।ବର୍ଷାଧିକ କାଳ ସେ ମାନସିକ ସ୍ଵାସ୍ଥ୍ୟ ପାଇଁ ଚିକିତ୍ସାଧୀନ ହେବା ହେତୁ କର୍ତ୍ତବ୍ୟ କାର୍ଯ୍ୟରେ ଯୋଗଦେଇ ପାରିନଥିଲେ । ଏବେ ସେ ସମ୍ପୂର୍ଣ ସୁସ୍ଥ ଓ ସୁସ୍ଥତାର ପ୍ରମାଣପତ୍ର ଦାଖଲ କରିଛନ୍ତି। ବିନିକା ଗୋଷ୍ଟି ଶିକ୍ଷା ଅଧିକାରୀ ଗଣେଶ କିଶାନ ତାଙ୍କୁ ଚାକିରୀରୁ ବହିସ୍କୃତ କରିଛନ୍ତି ।ପ୍ରଶାସନର ଅବିଚାର ବିରୁଦ୍ଧରେ ଶ୍ରୀ ଦାଶ ମାନ୍ୟବର ଉଚ୍ଚ ନ୍ୟାୟାଳୟର ଦ୍ୱାରସ୍ଥ ହୋଇଥିଲେ । ଏହାର ବିଚାର କରି ମାନ୍ୟବର ଅଦାଲତ ତାଙ୍କୁ ତିନି ମାସ ଭିତରେ ତାଙ୍କ ଆବେଦନ ମୁତାବକ ପୁନଃ ନିଯୁକ୍ତି ଦିଆଯିବାକୁ ନିର୍ଦ୍ଦେଶ ଦେଇଥିଲେ ।ହେଲେ ତିନି ମାସ ପୁରି ଯାଇଥିଲେ ମଧ୍ୟ ଏୟାବତ ତାଙ୍କୁ ନିଯୁକ୍ତି ମିଳିନାହିଁ । ଯାହା ଫଳରେ ସେ ବର୍ତ୍ତମାନ ମାନବିକ ଅଧିକାର କମିଶନଙ୍କ ଦ୍ୱାରସ୍ଥ ହୋଇଛନ୍ତି। ଦୀର୍ଘ ସାତ ବର୍ଷ ହେଲା ଶ୍ରୀ ଦାଶ ଦରମା କିମ୍ବା ଅନ୍ୟ କୌଣସି ସରକାରୀ ସହାୟତା ପାଇ ନଥିବା ଜଣାପଡିଛି ।ସୂଚନା ଯୋଗ୍ୟ ଯେ ଶ୍ରୀ ଦାଶ ଯେତେବେଳେ ଗଙ୍ଗାଧର ମେହେର ଓ ରାଜେନ୍ଦ୍ର କଲେଜ ଠାରେ ଅଧ୍ୟୟନ କରୁଥିଲେ ସେହି ସମୟରେ କଲେଜ ତରଫରୁ ଆୟୋଜିତ ଅନେକ ତର୍କ ଓ ପ୍ରବନ୍ଧ ପ୍ରତିଯୋଗିତାରେ ପ୍ରଥମ ସ୍ଥାନ ଅଧିକାର କରିଥିଲେ ।ନିଜ ବ୍ୟକ୍ତିତ୍ୱର ଅନେକ ଆଲୋକମୟ ଦିଗ ଥିବା ସତ୍ତ୍ବେ ସେ ଏବେ ଅଫିସ ରୁ ଅଫିସ ଦୋୖଡି ନୟାନ୍ତ ହେଉଛନ୍ତି ।ତୁରନ୍ତ ତାଙ୍କୁ ପୁନଃ ନିଯୁକ୍ତି ଦିଆଯାଇ ଯୋଗ୍ୟ ପ୍ରତିଭାଙ୍କୁ ସମ୍ମାନ ଦେବାକୁ ଅଞ୍ଚଳବାସୀଙ୍କ ତରଫରୁ ଦାବୀ ହେଉଛି ।