07-Jun-2023

ବ୍ରହ୍ମପୁର (ଝିଲ୍ଲି କୁମାରୀ ସାହୁ ): ଭୀଷ୍ମଗିରି ଉନ୍ନୟନ ପରିଷଦର ସାଧାରଣ ପରିଷଦ ବୈଠକ(ତା -୦୬-୦୬-୨୦୨୩ ରିଖ) ଦିନ ଭୀଷ୍ମଗିରି କଳିଙ୍ଗ ବୈଶ୍ୟ ସମାଜ ଗୃହରେ ଅନୁଷ୍ଠିତ ହୋଇ ଯାଇଛି  l ପରିଷଦର ସଭାପତି ପ୍ରଶାନ୍ତ କୁମାର ପାଠୀଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ସମ୍ପାଦକ ବୃନ୍ଦାବନ ପଣ୍ଡା ବୈଠକର ଆଭିମୁଖ୍ୟ ଜଣାଇବା ସହିତ ଏହା ମଧ୍ୟରେ ନିଆ ଯାଇଥିବା କାର୍ଯ୍ୟକ୍ରମ ସମ୍ପର୍କରେ ଅବଗତ କରାଇଥିଲେ l  

ଦୈନନ୍ଦିନ ଗ୍ରାମ ସଫେଇ, ଆବର୍ଜନା ଉଠାଇବା, ନାଳ ନର୍ଦମାର ପୁନଃରୁଦ୍ଧାର ଅଭାବରୁ ପାଣିଜମିବା କାରଣରୁ ଉତ୍ପନ୍ନ ପରିସ୍ଥିତି ଏବଂ ପାନୀୟ ଜଳର ସଙ୍କଟ ଆଦି ସମ୍ପର୍କରେ ସ୍ଥାନୀୟ ଗ୍ରାମ ପଂଚାୟତ ର ସ୍ଥାଣୁତାକୁ ନେଇ ଗଭୀର ଉଦବେଗ ପ୍ରକାଶ କରାଗଲା
ସେହିଭଳି ପଞ୍ଚାୟତର ଅପାରଗତାରୁ ଲୋକଙ୍କୁ ନିୟମିତ ଭତ୍ତା ମିଳିପାରୁ ନାହିଁ , ସେହିଭଳି ବିଧବା,ବାର୍ଦ୍ଧକ୍ୟ ଭତ୍ତା ଓ ଆବାସ ଯୋଜନା ପାଇବା ପାଇଁ ଅପେକ୍ଷାରତ ନୂତନ ହିତାଧିକାରୀ ଙ୍କୁ ସାମିଲ କରାଯାଇପାରୁ ନାହିଁ । ମନରେଗା କାମରେ ମିଛ ବିଲ କରି ଅର୍ଥ ହରିଲୁଟ ଚାଲିଥିବା ବିଷୟ ନେଇ ଉପସ୍ଥିତ ଗ୍ରାମବାସୀ ଓ ୱାର୍ଡ ସଭ୍ୟ ମାନେ ଗଭୀର ଉଦବେଗ ପ୍ରକାଶ କରିଥିଲେ।  ୧୯୭୨ ମସିହାରୁ ଭୀଷ୍ମଗିରି ଗ୍ରାମକୁ ପାଇପ ଯୋଗେ ପାନୀୟ ଜଳ ଯୋଗାଣ ବ୍ୟବସ୍ଥା କାର୍ଯ୍ୟକାରୀ ହୋଇ ଆସୁଥିଲା ବେଳେ ବର୍ଦ୍ଧିତ ଜନସଂଖ୍ୟାକୁ ଦୃଷ୍ଟିରେ ରଖି ୨୦୨୦ ମସିହାଠାରୁ ଦୁଇକୋଟି ଟଙ୍କା ବ୍ୟୟରେ ଏକ ଉନ୍ନତ ଯୋଜନା ପ୍ରସ୍ତୁତ ହୋଇ ସାରିଥିଲେ ମଧ୍ୟ ତାହା କାର୍ଯ୍ୟକାରୀ ହୋଇପାରୁ ନାହିଁ  ଫଳରେ ଲୋକେ ଘୋର ପାନୀୟ ଜଳ ସଙ୍କଟର ସମ୍ମୁଖୀନ ହେଉଛନ୍ତି। ଏଣୁ ଏ ସମ୍ପର୍କରେ ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କ ଦ୍ରୁଷ୍ଟି ଆକର୍ଷଣ କରା ଯାଇଥିଲେ ମଧ୍ୟ ଏଯାଏଁ ସେଥିରେ ସୁଧାର ଆସିପାରୁ ନାହିଁ , ଏଣୁ  ସୂଚନା ଅଧିକାର ଆଇନ ବଳରେ ସେ ସବୁ ତଥ୍ୟ ସଂଗ୍ରହ ପାଇଁ ସ୍ଥିର କରାଗଲା । ୧୯୮୮ ମସିହାରୁ ଭୀଷ୍ମଗିରି ଠାରେ ପ୍ରତିଷ୍ଠିତ ବାଳିକା ଉଚ୍ଚ ବିଦ୍ୟାଳୟର କୋଠା ବିପଦ ସଙ୍କୁଳ ଅବସ୍ଥାରେ ରହିଥିବା କାରଣରୁ ଏବଂ ଗତ ୨୦୨୦ ମସିହା ଠାରୁ ୧୫ ଲକ୍ଷ ଟଙ୍କା ବ୍ୟୟରେ ଏକ ନୂତନ କୋଠା ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ ତାକୁ ସଂପୂର୍ଣ୍ଣ କରିବାରେ ଅବହେଳା ଯୋଗୁଁ କେତେବେଳେ ଯେ ପିଲାଙ୍କ ମୃତ୍ୟୁର କାରଣ ହେବ ସେହି ଆଶଙ୍କାରେ ଅଭିଭାବକ ମାନେ କାଳାତିପାତ କରୁଛନ୍ତି। ସେହିଭଳି ବିଦ୍ୟାଳୟର ପରିଚାଳନା କମିଟିକୁ ୨୦୧୨ ମସିହାରୁ ଭାଙ୍ଗି ଦିଆ ଯାଇଥିଲେ ମଧ୍ୟ ତାହାର ପୁନର୍ଗଠନ କରାଯାଉନାହିଁ । ଫଳରେ ସେହି ଅନୁଷ୍ଠାନଟି ଏକ ପ୍ରକାର ଦୁର୍ଦିନରେ ଗତିକରୁଛି। 

ଏହି ସବୁ ବିଷୟକୁ ନେଇ ଏକ ପ୍ରତିନିଧି ଦଳ ସ୍ଥାନୀୟ ସରପଞ୍ଚଙ୍କ ସହିତ ସାକ୍ଷାତ କରି ଗ୍ରାମ ପଞ୍ଚାୟତକୁ ସୁପରିଚାଳନା ଦିଗରେ କାର୍ଯ୍ୟ କରିବାକୁ ଆଲୋଚନା କରାଯିବାକୁ ସ୍ଥିର ହେଲା ଏବଂ ପରବର୍ତୀ ବୈଠକରେ ଉନ୍ନୟନ ପରିଷଦର କଳେବରକୁ ବୃଦ୍ଧି କରି ଆବଶ୍ୟକ ସ୍ଥଳେ ଆନ୍ଦୋଳନାତ୍ମକ କାର୍ଯ୍ୟ ପନ୍ଥା ଗ୍ରହଣ କରିବାକୁ ସ୍ଥିର କରାଯାଇଥିଲl। 
  ଏହି ବୈଠକରେ ଭୀଷ୍ମଗିରି ଉନ୍ନୟନ ପରିଷଦର କର୍ମକର୍ତ୍ତା ଓ ୱାର୍ଡ ସଭ୍ୟଙ୍କ ସମେତ ପୂର୍ବତନ ସରପଞ୍ଚ ରାଜେନ୍ଦ୍ର ପ୍ରସାଦ ପାଠୀ, ପ୍ରଫୁଲ୍ଲ କୁମାର ମହାନ୍ତି, ପୀତାମ୍ବର ଗୌଡଙ୍କ ସମେତ

ମହେନ୍ଦ୍ର କୁମାର ପଣ୍ଡା, ନିରଞ୍ଜନ ମହାନ୍ତି, ଶୁଭେନ୍ଦୁ କୁମାର ପାଢୀ, ସିମାଞ୍ଚଳ ଗୌଡ, ରମେଶ ଚନ୍ଦ୍ର ପାଠୀ, ସନ୍ତୋଷ କୁମାର ପଟ୍ଟନାୟକ, ବିଜୟ କୁମାର ଗୌଡ,ବି ଶିବ ପ୍ରସାଦ ପୃଷ୍ଟି, ପ୍ରକାଶ ଚନ୍ଦ୍ର ସେଠି, ବାଦ୍ରି ସୁକୁଟା, ଏନ ମଙ୍ଗଳା, ପୀତବାସ ରଥ, ମୃତ୍ୟୁଞ୍ଜୟ ପଣ୍ଡା, ନାଏବ ସରପଞ୍ଚ  ବାଦ୍ରି ଚନ୍ଦ୍ରମଣୀ,ୱାର୍ଡ ସଭ୍ୟା ଶ୍ରୀମତୀ ଅମୂଲ୍ୟ କୁମାରୀ ଦାସ,ଅଜୟ କୁମାର ପଣ୍ଡା,ବି ଲବ କୁମାର ପୃଷ୍ଟି ପ୍ରମୁଖ ଆଲୋଚନାରେ ସକ୍ରିୟ ଅଂଶଗ୍ରହଣ କରିଥିଲେ।