03-Jun-2023

ବଲାଙ୍ଗିର (ପ୍ରେରଣା ଖବର ): ବାଲେଶ୍ବର ବାହାନାଗା ଷ୍ଟେସନ ନିକଟରେ  ଚେନ୍ନାଇ-ହାୱଡା କରମଣ୍ଡଳ ଏକ୍ସପ୍ରେସ ମିଶି ତିନୋଟି ଟ୍ରେନ ଦୁର୍ଘଟଣାଗ୍ରସ୍ତ ହେବାରୁ ବହୁ ସଂଖ୍ୟାରେ ଯାତ୍ରୀ ମୃତ୍ୟୁବରଣ କରିଥିବା ବେଳେ ବିପୁଳ ସଂଖ୍ୟାରେ ଯାତ୍ରୀ ଆହତ ହୋଇଥିବା ଖବର ଶୁଣି ବଲାଙ୍ଗିର ସ୍ବେଚ୍ଛାସେବୀ ସଂଗଠନ ଅତ୍ୟନ୍ତ ବ୍ୟଥିତ ଓ ମର୍ମାହତ ପ୍ରକାଶ କରିଛି। ଏହି ଛାତିଥରା ଟ୍ରେନ ଟ୍ରାଜେଡିରେ ମୃତ୍ୟୁବରଣ କରିଥିବା ଯାତ୍ରୀ ମାନଙ୍କର ଆତ୍ମାର ଶାନ୍ତି ଓ

ସତଗତି କାମନା ସହିତ ଆହତ ହୋଇ ଚିକିତ୍ସିତ ହେଉଥିବା ସମସ୍ତ ଯାତ୍ରୀଙ୍କ ଆଶୁ ଆରୋଗ୍ୟ କାମନା କରି ବଲାଙ୍ଗିର ସ୍ବେଚ୍ଛାସେବୀ ସଂଗଠନ ଦ୍ୱାରା ଆଜି ସନ୍ଧ୍ୟାରେ ବଲାଙ୍ଗିର ସହରସ୍ଥିତ ମାଁ ପାଟଣେଶ୍ବରୀ ଦେବୀ ମନ୍ଦିରରେ ସମୂହ ଦୀପଦାନ କରାଯାଇଥିଲା। ଏହି ଦୁର୍ଘଟଣାରେ ମୃତାହତ ଓ

ଆହତ ହୋଇଥିବା ସମସ୍ତ ପରିବାରବର୍ଗଙ୍କ ଧୈର୍ଯ୍ୟ ଓ ସାହସ ବଢାଇବା ନିମନ୍ତେ ଏହି ସମୂହ ଦୀପଦାନରେ ବଲାଙ୍ଗିର ସ୍ବେଚ୍ଛାସେବୀ ସଂଗଠନର ସଦସ୍ୟ ସଦସ୍ୟାଙ୍କ ସହିତ ବଲାଙ୍ଗିର ପୌର ପରିଷଦର ଅଧ୍ୟକ୍ଷା ଲିକା ସାହୁ ଉପସ୍ଥିତ ରହିଥିଲେ। ବଲାଙ୍ଗିର ସ୍ବେଚ୍ଛାସେବୀ ସଂଗଠନର ସଦସ୍ୟ ରୂପକ କୁମାର ପ୍ରଧାନଙ୍କ ନେତୃତ୍ୱରେ ଗୋଟିଏ ଟିମ ଦୁର୍ଘଟଣାସ୍ଥଳରେ ରହି ରାତିତମାମ ଉଦ୍ଧାର କାର୍ଯ୍ୟରେ ଯଥାସମ୍ଭବ ସହଯୋଗ ଜାରି ରଖିଥିବା ସୂଚନା ଦିଆଯାଇଛି।