01-Jun-2023

ସିନ୍ଧେକେଲା (ଅନୀଲ କୁମାର ତ୍ରିପାଠୀ ): ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ସିନ୍ଧେକେଲା ପଞ୍ଚାୟତ ମୁଖ୍ୟାଳୟର ସନ୍ତୋଷ ବଛାଙ୍କ ପୁଅ (୨୩) ବାବୁଲାଲ ବଛା ନିଜ ପରିବାର ପ୍ରତିପୋଷଣ ପାଇଁ ତିନିମାସ ତଳେ କାମ କରିବାକୁ ସୁଦୁର ମୁମ୍ବାଇ ଯାଇଥିଲେ। ମୁମ୍ବାଇ ର ଭୋଲ ବାଡା ପାରେଲ ମାର୍ଗ ନିକଟସ୍ଥ ଏକ ବିଲ୍ଡିଂ କାମରେ ନିୟୋଜିତ ହୋଇଥିଲେ। ସବୁ ଠିକଠାକ ଚାଲିଥିଲା କିନ୍ତୁ କିଛିଦିନ ତଳେ

ତାଙ୍କୁ ସାମାନ୍ଯ ଜ୍ବର ହୋଇଥିଲା। ସେ ସ୍ଥାନିୟ ଡାକ୍ତରଙ୍କ ଠାରେ ଚିକିତ୍ସିତ ହୋଇଥିଲେ ପରେ ଟିକିଏ ସୁସ୍ଥ ଲାଗିବାରୁ ପୁଣି କାମ କରିବା ପାଇଁ ଯାଇଥିଲେ। ହେଲେ ସେଠାରେ ହିଁ ହଠାତ ଅସୁସ୍ଥ ହୋଇ ପଡିବାରୁ ତାଙ୍କ ସହ କାମ କରୁଥିବା ଲୋକେ ତାଙ୍କୁ ସ୍ଥାନିୟ ଡାକ୍ତରଖାନାରେ ଭର୍ତ୍ତି କରିଥିଲେ। କିନ୍ତୁ ଚିକିତ୍ସାଧିନ ଅବସ୍ଥାରେ ୨୬ ତାରିଖ ଶୁକ୍ରବାର ତାଙ୍କର ମୃତ୍ୟୁ ଘଟିଥିଲା। ମୃତ୍ୟୁ ପରେ ତାଙ୍କ ଘର ଲୋକଙ୍କୁ ଫୋନରେ ଏ ବିଷୟରେ ସୁଚିତ କରାଯାଇଥିଲା। ହେଲେ ବାବୁଲାଲ ର ବାପା ମଧ୍ଯ ହାଇଦ୍ରାବାଦ କୁ କାମ କରିବାପାଇଁ ଯାଇଥିବା ଯୋଗୁଁ ଘରେ କେବଳ ବାବୁଲାଲ ର ମାଁ ,  ସ୍ତ୍ରୀ ଓ ତିନିବର୍ଷର ଏକ ଶିଶୁକନ୍ୟା ଥିବା ଓ ଅର୍ଥ ଅଭାବ ବାଧକ ହେଉଥିବାରୁ କାମ କରୁଥିବା ଠିକାଦାର ଙ୍କୁ ଫୋନରେ ଶବ ପଠାଇ ଦେବା ପାଇଁ ନେହୁରା ହୋଇଥିଲେ। ସେଠାରେ ଓଡିଆ ତଥା ସିନ୍ଧେକେଲା ଅଞ୍ଚଳର ଶ୍ରମିକମାନଙ୍କ କଥା ରଖି କାମ କରାଉଥିବା ମାଲିକ ଶବ ବ୍ୟବଚ୍ଛେଦ କରାଯିବା ପରେ ମୁମ୍ବାଇ

ରୁ ଟିଟିଲାଗଡ ଟ୍ରେନ ଯୋଗେ ଶବ ପଠାଇଥିଲେ। ଟିଟିଲାଗଡ ରୁ ଆମ୍ବୁଲାନ୍ସ ସାହାଯ୍ଯରେ ଶବ ଆଣି ସୋମବାର ରାତିରେ ଶବ ଦାହ କରା ଯାଇଥିଲା। ଏହି ସମୟରେ ତାଙ୍କ ବନ୍ଧୁ ପରିଜନ ଓ ପରିବାରବର୍ଗ ଉପସ୍ଥିତ ଥିଲେ। ପ୍ରକାଶ ଥାଉକି ବାବୁଲାଲ ହିଁ ପରିବାର ପ୍ରତିପୋଷଣ ର ମୁଖ୍ଯ ଥିବାବେଳେ ଏବେ ଏହି ଗରିବ ପରିବାର ଉପରେ ଚଡକ ପଡିଥିବା ସଦୃଶ ହୋଇଛି। ତେଣୁ ଜିଲ୍ଲା ପ୍ରଶାସନ ଏ ପରିବାର ପ୍ରତି ସାହାଯ୍ଯ ପ୍ରଦାନ କରିବାକୁ ସ୍ଥାନିୟ ଲୋକେ ଦାବି କରିଛନ୍ତି।