30-May-2023

କଣ୍ଟାବାଞ୍ଜି (ଆନନ୍ଦ ମୋଟେ ): ଗାଁ ରାସ୍ତା ପାଇଁ ଅନେକ ଥର ପ୍ରଶାସନକୁ ଗୁହାରି କଲେ । ପଂଚାୟତ ଠାରୁ ବ୍ଲକ ଯାଏ ସମସ୍ତଙ୍କୁ ନିଜ ଗାଁ ରାସ୍ତା ତିଆରି  ପାଇଁ କହିବା ପରେ ମଧ୍ୟ ରାସ୍ତା ତିଆରି ହେଲା ନାହି । ହେଲେ ଶେଷରେ ଗାଁ ଲୋକ ମିଶି ରାସ୍ତା କାମ ଆରମ୍ଭ  କରିଛନ୍ତି । ତୁରେକେଲା ବ୍ଲକ ବେହେରେନସିଲେଟ ଗାଁର ନାଏକପଡା । ୩୦୦ ଜନସଂଖ୍ୟା ବିଶିଷ୍ଟ ଏହି ଗାଁରେ ପ୍ରାୟ ଅନୁସୂଚିତ ଜାତି ଏବଂ ଜନ ଜାତିର ଲୋକ ବସବାସ କରନ୍ତି । ଏହି ପଡାକୁ ଯିବାକୁ ଭଲ ରାସ୍ତା ନାହି । ବିଶେଷ କରି ବର୍ଷା ଦିନରେ ଲୋକଙ୍କୁ ଯିବା ଆସିବା ପାଇଁ ଅନେକ ଅସୁବିଧାର ସମ୍ମୁଖୀନ  ହେବାକୁ ପଡିଥାଏ । ଖାଲଖମା କାଦୁଅ ରାସ୍ତାରେ ଲୋକେ ଯିବା ଆସିବା ପସନ୍ଦ କରନ୍ତି ନାହି । ସହର ପାଖ ଗାଁ ହୋଇଥିଲେ ମଧ୍ୟ ଏହି ନାଏକପଡାକୁ ଆମ୍ବୁଲାନ୍ସ ଯିବାକୁ ମଧ୍ୟ ଅମଙ୍ଗ ହୋଇଥାଏ । ବାଧ୍ୟ ହୋଇ ରୋଗୀଙ୍କୁ ମୁଖ୍ୟ ରାସ୍ତା ନିଆଯାଇଥାଏ । ସେଠାରୁ ଆମ୍ବୁଲାନ୍ସ ଡାକ୍ତରଖାନା ନେଇ ଯାଇଥାଏ । ଅନେକ ସମୟରେ ନିର୍ବାଚିତ ପ୍ରତିନିଧି ଗାଁ କୁ ଆସୁଥିବା ବେଳେ କେମିତି ରାସ୍ତା ଉପରେ ତାଙ୍କ ଦ୍ରୁଷ୍ଟି ପଡୁନାହି ବୋଲି ଗାଁ ଲୋକ କହିଥାନ୍ତି । ଅନେକ ସମୟରେ ଭଲ ରାସ୍ତା ପାଇଁ ଗାଁ ଲୋକ  ଆନ୍ଦୋଳନ ମଧ୍ୟ କରିଥିବା ବେଳେ ରାସ୍ତା ହେଇଯିବ ବୋଲି ପ୍ରଶାସନ ପ୍ରତିଶ୍ରୁତି ଦେଇ ଆଜିଯାଏ ରାସ୍ତା ତିଆରି  କରିନାହି ।

ସେମାନଙ୍କ ମୁହଁ ରୁ

ପାନ ନାଏକ , ନାଏକପଡା ବାସିନ୍ଦା – ଏହି ରାସ୍ତା ପାଇଁ ବିଶେଷ କରି ମହିଳା ମାନେ ଅନେକ ଅସୁବିଧାର ସମ୍ମୁଖୀନ ହୋଇଥାନ୍ତି । ଗର୍ଭବତୀ ମହିଳାଙ୍କୁ ଡାକ୍ତରଖାନା ନେବା ସମୟରେ ରାସ୍ତାରେ କାଦୁଅ ଖାଲ ଥିବା ଯୋଗୁ ଅନେକ ଥର ଆମ୍ବୁଲାନ୍ସ ଫସି ରହିଛି । ପୁଅ ଝିଅ ମାନେ ବର୍ଷା ଦିନରେ ପାଠ ପଢି ମଧ୍ୟ ଯାଇ ପାରନ୍ତି ନାହି । ଏନେଇ ଆମେ କଣ୍ଟାବାଞ୍ଜି ତହସିଲ ଅଫିସ ସମ୍ମୁଖରେ ଧାରଣା ଦେଇଥିଲୁ ହେଲେ ପ୍ରଶାସନ ପ୍ରତିଶ୍ରୁତି ପରେ ମଧ୍ୟ ରାସ୍ତାର ଦେଖାନାହି ।

ଧୁବଳେ ନାଏକ , ନାଏକପଡା ବାସିନ୍ଦା – ରାସ୍ତା ପାଇ ଆମେ ବାରମ୍ବାର ସରପଞ୍ଚ, ପ୍ରଶାସନିକ ଅଧିକାରୀଙ୍କୁ ମଧ୍ୟ କହିଛୁ । ହେଲେ ରାସ୍ତା ତିଆରି କରାଯାଉନାହି । ଏଭଳି ଦିନରେ ରାସ୍ତାରେ ଯିବା ଆସିବା କଷ୍ଟ ହୋଇଥାଏ ବର୍ଷା ଦିନର କଥା କହିବା ଆଉ କଣ । କାଦୁଅ ପଚପଚ ରାସ୍ତା ଦେଇ ଆମେ ଯିବାକୁ ଆସିବା କରିଥାଉ । କଣ୍ଟାବାଞ୍ଜି ସହର ପାଖରେ ଏବଂ ପଞ୍ଚାୟତକୁ ମଧ୍ୟ ଏହି ରାସ୍ତା ଦେଇ ଆମେ ଯାଇଥାଉ । ଏକମାତ୍ର ରାସ୍ତା ବୋଲି ଆମେ ବାଧ୍ୟ ହୋଇ ଏହି ରାସ୍ତାରେ ହି ଯିବା ଆସିବା କରିଥାଉ ।

ଦେବ ନାଏକ ,  ନାଏକପଡା ବାସିନ୍ଦା – ନିର୍ବାଚନ ସମୟରେ ନେତା ମାନେ ଆସି ଆମକୁ ଅନେକ ପ୍ରତିଶ୍ରୁତି ଦେଇଥାନ୍ତି ।ପ୍ରତିଶ୍ରୁତି ଭିତରେ ରାସ୍ତା ମଧ୍ୟ ତିଆରି କରାଯିବ ବୋଲି କହିଥାନ୍ତି । ହେଲେ ନିର୍ବାଚନ ସାରିଲା ପରେ କାହାରି ଦେଖାମିଲେ ନାହି । ଯଦି ନେତା ଗାଁ କୁ ଆସନ୍ତି ତେବେ ରାସ୍ତା କଥା ଭୁଲିଯାଇଥାନ୍ତି । ରାସ୍ତା ପାଇ ଗାଁ ଲୋକ ହଇରାଣ ହେବ ଯୋଗୁ ଶେଷରେ ଗାଁରେ ଏକ ବୈଠକ କରି ଗାଁ ରାସ୍ତା ନିଜେ ତିଆରି କରିବା ପାଇଁ ଆମେ ନିଷ୍ପତ୍ତି ନେଇ ରାସ୍ତା ତିଆରି କରୁଛି । ଦେଖାଯାଉ ପ୍ରଶାସନ ଦେବେ ଚେଇବ ।ଦେବାଶିଷ ସାମଲ , ବିଡିଓ , ତୁରେକେଲା -  ପୂର୍ବରୁଏହା ଆମ ନଜରରେ ନଥିଲା ଏବେ ମୁଁ ସରପଞ୍ଚ ସହ କଥା ହେଲି ଏହି ରାସ୍ତା ପାଇ ପ୍ରସାବ ଦିଆନ୍ତୁ ଆମେ ପଞ୍ଚାୟତ ପାଣ୍ଠି ରୁ କରିବା । ରାସ୍ତା କେମିତି ହୋଇ ପାରିବ ସେନେଇ ପଦକ୍ଷେପ ନିଆଯିବ ।