18-May-2023

ତୁଷୁରା(ପ୍ରେରଣା ଖବର ): ଓଡିଶା ପବ୍ଲିକ୍ ସର୍ଭିସ୍ କମିଶନ୍ (ଓ.ପି.ଏସ୍.ସି) ମାଧ୍ୟମରେ ଅନୁଷ୍ଠିତ ଓଡିଶା ଏଜୁକେସନ୍ ସର୍ଭିସ୍ (ଓ.ଇ,ଏସ୍) ର ସାକ୍ଷାତକାରର ଫଳ ଗତ ମଙ୍ଗଳବାର ପ୍ରକାଶ ପାଇଛି। ଏଥିରେ ତୁଷୁରାର ସୁଶ୍ରୀ ନମିତାରାଣୀ ଭୋଇ ୧୪୪ ନଂ ରେଙ୍କ ରେ ଉତୀର୍ଣ୍ଣ ହୋଇ ଗୁଡଭେଲା ବ୍ଲକ୍ ପାଇଁ ଗୌରବ ଆଣି ଦେଇଛନ୍ତି। ସୁଶ୍ରୀ ଭୋଇ ବଲାଙ୍ଗିର ଜିଲ୍ଲା ଗୁଡଭେଲା ବ୍ଲକ୍ ଅନ୍ତର୍ଗତ ଦେଉଳଗୁଡି ଗ୍ରାମ ପଞ୍ଚାୟତ ର ମଧୁପର ଗ୍ରାମର ଶ୍ରୀ ଭକ୍ତ ରଞ୍ଜନ ଭୋଇ ଓ ଶ୍ରୀମତୀ ପଙ୍କଜିନୀ ଭୋଇଙ୍କ ସୁପୁତ୍ରୀ ଅଟନ୍ତି। ତାଙ୍କର ବାପା ଶ୍ରୀ ଭୋଇ ଦେଉଳଗୁଡି ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ତଥା ପୂର୍ବତନ ବ୍ଲକ ଶିକ୍ଷା ଅନୁନିରୀକ୍ଷକ (ସ୍କୁଲ୍ ଏସ୍.ଆଇ.) ଅଟନ୍ତି । ନମିତା ରାଣୀ ସରସ୍ବତୀ ଶିଶୁ ବିଦ୍ୟା ମନ୍ଦିର ତୁଷୁରାରେ ପ୍ରାଥମିକ ଶିକ୍ଷା ଲାଭ କରିଥିଲେ। ତୃତୀୟ ଓ ପଞ୍ଚମ ଶ୍ରେଣୀରେ ସରକାରୀ ମେଧାବୃତ୍ତି ପାଇ ବିଦ୍ୟାଳୟ ପାଇଁ ଗୌରବ ଆଣି ଦେଇଥିଲେ। ତତ୍ପରେ ଜବାହର ନବୋଦୟ ବିଦ୍ୟାଳୟ ବେଲପଡା ଠାରେ ଯୁକ୍ତ ଦୁଇ ପର୍ଯ୍ୟନ୍ତ ଶିକ୍ଷା ଲାଭ କରାଥିଲେ। ରାଜେନ୍ଦ୍ର ବିଶ୍ବବିଦ୍ୟାଳୟ ବଲାଙ୍ଗିର ଠାରେ ବିଜ୍ଞାନରେ ସ୍ନାତକ ଓ ସ୍ନାତକୋତ୍ତର ଶିକ୍ଷା ଲାଭ କରିଥିଲେ। ପରେ କଳାହାଣ୍ଡି ଜିଲ୍ଲା ଭବାନୀପାଟଣା ଠାରେ ବିଇଡି  ତାଲିମ ଗ୍ରହଣ କରିଥିଲେ। ସେ ଜଣେ ମେଧାବିନୀ ଛାତ୍ରୀ ଓ ଉଚ୍ଚାଭିଳାଷି ଥିଲେ ବୋଲି ତତ୍କାଳୀନ ଗୁରୁଜୀ ହେମନ୍ତ ଦାଶ କୁହନ୍ତି। ତୁଳସୀ ଦୁଇ ପତ୍ରରୁ ବାସିଲା ପରି ତାଙ୍କର ପ୍ରତିଭା ବାଲ୍ୟ କାଳରୁ ପ୍ରସ୍ଫୁଟିତ ହୋଇ ଉଠିଥିଲା। ନମିତା ରାଣୀ ନିଜ ସଫଳତାର ଶ୍ରେୟ ନିଜ ବାପା ମାଁ , ଗୁରୁଜୀ ଗୁରୁମା ଓ ଅଧ୍ୟାପକ ଅଧ୍ୟାପିକାଙ୍କୁ ଦେଇଛନ୍ତି। ସେ ବର୍ତ୍ତମାନ ସଇନ୍ତଳା ବ୍ଲକ୍ ଅନ୍ତର୍ଗତ କନ୍ଧକେଲ ଗାଁ ହାଇସ୍କୁଲ୍ ରେ ବିଜ୍ଞାନ ଶିକ୍ଷୟିତ୍ରୀ ଭାବେ କାର୍ଯ୍ୟରତ ଅଛନ୍ତି। ସେ ଓଇଏସ୍ ପାଇଥିବା  ଖବର ପ୍ରକାଶିତ ହେବା ପରେ ସମଗ୍ର ତୁଷୁରା ଅଞ୍ଚଳରେ ଖୁସିର ଲହରୀ ଖେଳି ଯାଇଥିଲା। ତାଙ୍କର ସାଙ୍ଗ ସାଥୀ, ବନ୍ଧୁବର୍ଗ, ଶୁଭେଚ୍ଛୁଙ୍କ ଠାରୁ ଶୁଭେଚ୍ଛାର ସୁଅ ଛୁଟିଥିଲା।