12-May-2023

ବଲାଙ୍ଗିର (ଦେବାଶିଷ ବହିଦାର ): ଆଜି ସନ୍ଧ୍ୟାରେ ବଲାଙ୍ଗିର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷ ଠାରେ ଚଳିତ ବର୍ଷ ବଲାଙ୍ଗିର ରେ ରଥଯାତ୍ରା ଓ ବାହୁଡାଯାତ୍ରା ପାଳନ ସମ୍ପର୍କିତ ଏକ ପ୍ରସ୍ତୁତି ବୈଠକ ଅତିରିକ୍ତ ଜିଲ୍ଲାପାଳ ଲମ୍ବୋଦର ଧରୁଆ ଙ୍କ ଅଧ୍ୟକ୍ଷତାରେ  ଅନୁଷ୍ଠିତ ହୋଇଯାଇଛି । ଏହି ବୈଠକରେ ବଲାଙ୍ଗିର ଉପ ଜିଲ୍ଲାପାଳ ତଥା ଦେବୋତ୍ତର କାର୍ଯ୍ୟନିର୍ବାହୀ ଅଧିକାରୀ କୁମାର ନାଗଭୂଷଣ ,ଉପଖଣ୍ଡ ଆରକ୍ଷୀ ଅଧିକାରୀ ତୋଫାନ ବାଗ ,ବଲାଙ୍ଗିର ତହସିଲଦାର ଡ଼ ପୁଷ୍ପାଞ୍ଜଳି ପଣ୍ଡା ,ଡିଏସପି ଡିଆଇବି ତପନ କୁମାର ରଥ ,ବଲାଙ୍ଗିର ଟାଉନ ଥାନା ର ଭାରପ୍ରାପ୍ତ ଅଧିକାରୀ, ଶ୍ରୀ ଗୋପାଳଜୀ ମନ୍ଦିର ରଥ ,ରାଜବାଟୀ ମନ୍ଦିର ରଥ,ଜଗନ୍ନାଥ ପଡା ମନ୍ଦିର ରଥ ,ସାହାଣୀ ମନ୍ଦିର ରଥ,ଚାନ୍ଦ ମନ୍ଦିର ରଥ କମିଟି, ମାଉସୀ ମାଁ ମନ୍ଦିର କମିଟି  ର ସଦସ୍ୟ ମାନଙ୍କ ସମେତ ଜଙ୍ଗଲ   ,ଓଡିଶା ଜଙ୍ଗଲ  ଉନ୍ନୟନ ନିଗମ, ପୂର୍ତ୍ତ ,ଜନସ୍ୱାସ୍ଥ୍ୟ ,ପୌର ନିର୍ବାହୀ ଅଧିକାରୀ, ସ୍ୱାସ୍ଥ୍ୟ ,ସୂଚନା ଓ ଲୋକ ସମ୍ପର୍କ  ଆଦି ବିଭାଗର ଅଧିକାରୀ ମାନେ ଉପସ୍ଥିତ ଥିଲେ । ବୈଠକ ପ୍ରାରମ୍ଭରେ ଅତିରିକ୍ତ ଜିଲ୍ଲାପାଳ ଶ୍ରୀ ଧରୁଆ ସମସ୍ତଙ୍କୁ ସ୍ଵାଗତ କରିବା ସହ ଚଳିତ ବର୍ଷର ରଥଯାତ୍ରା ଓ ବାହୁଡାଯାତ୍ରା ଯେପରି ଶାନ୍ତି ଶୃଙ୍ଖଳା ଓ ସୁଚାରୁରୂପେ ସମାପନ ହେବ ସେଥିନିମନ୍ତେ ମନ୍ଦିର କମିଟି ତଥା ସମ୍ପୃକ୍ତ ବିଭାଗୀୟ ଅଧିକାରୀ ମାନଙ୍କ ସହଯୋଗ କାମନା କରିଥିଲେ । ବଲାଙ୍ଗିର ଉପ ଜିଲ୍ଲାପାଳ ତଥା ଦେବୋତ୍ତର କାର୍ଯ୍ୟନିର୍ବାହୀ ଅଧିକାରୀ ଶ୍ରୀ  ନାଗଭୂଷଣ ବୈଠକର ଆଲୋଚ୍ୟ ବିଷୟ ଉପସ୍ଥାପନ କରିବା ସହ ତା ୨୦॰୦୬॰ ୨୦୨୩ ରଥଯାତ୍ରା ଠାରୁ ତା ୨୮॰ ୦୬॰ ୨୦୨୩ ବାହୁଡାଯାତ୍ରା ପର୍ଯ୍ୟନ୍ତ ବଲାଙ୍ଗିର ଠାରେ ସମସ୍ତ ରୀତିନୀତି ଓ କାର୍ଯ୍ୟକ୍ରମ ଗୁଡିକ ଶାନ୍ତି ଶୃଙ୍ଖଳା ଓ ସୁଚାରୁରୂପେ ପାଳନ କରିବାକୁ ସମସ୍ତଙ୍କ ସହଯୋଗ କାମନା କରିଥିଲେ । ବୈଠକରେ ଚଳିତ

ବର୍ଷ ଶ୍ରୀ ଗୋପାଳଜୀ ମନ୍ଦିର ପାଇଁ ଏକ ନୂତନ ରଥ ତିଆରି ସକାଶେ ଆଲୋଚନା କରାଯାଇ ଏଥି ନିମନ୍ତେ ଆବଶ୍ୟକ କାଠ ର ବ୍ୟବସ୍ଥା କରିବାକୁ  ଓଡିଶା ଜଙ୍ଗଲ   ଉନ୍ନୟନ ନିଗମ ଅଧିକାରୀ ଙ୍କୁ ଅନୁରୋଧ କରାଯାଇଥିଲା । ଏତଦବ୍ୟତୀତ ସାହାଣୀ ମନ୍ଦିର ,ଜଗନ୍ନାଥ ମନ୍ଦିର,ରାଜବାଟୀ ମନ୍ଦିର ଓ ଚାନ୍ଦ ମନ୍ଦିର ରଥ ର ମରାମତି କାର୍ଯ୍ୟ କରିବାକୁ ମନ୍ଦିର କମିଟି କର୍ମକର୍ତ୍ତାଙ୍କୁ ଅନୁରୋଧ କରାଯାଇଥିଲା । ବୈଠକରେ  ଶ୍ରୀ ଗୋପାଳଜୀ ମନ୍ଦିର ,ସାହାଣୀ ମନ୍ଦିର ,ଜଗନ୍ନାଥ ମନ୍ଦିର,ରାଜବାଟୀ ମନ୍ଦିର ଓ ଚାନ୍ଦ ମନ୍ଦିର ରଥ ଯାତ୍ରା ନିମନ୍ତେ ମହାପ୍ରଭୁ ଙ୍କ ପହଣ୍ଡି ନିମନ୍ତେ ସମୟ ନିର୍ଘଣ୍ଟ ସହ ରଥ ଯାଉଥିବା ରାସ୍ତା ସମ୍ପର୍କରେ ସବିଶେଷ ଆଲୋଚନା କରାଯାଇଥିଲା । ରଥଯାତ୍ରା ଓ ବାହୁଡା ଯାତ୍ରା ଦିନ ରଥ ଯାଉଥିବା ରାସ୍ତା ମାନଙ୍କରେ ବିଜୁଳି ତାର ,ଟେଲିଫୋନ ତାର ଓ କେବୁଲ ଯେପରି ବାଧା ନହେବ ସେଥିପ୍ରତି ଯତ୍ନବାନ ହେବାକୁ ବିଭାଗୀୟ ଅଧିକାରୀ ମାନଙ୍କୁ ନିର୍ଦ୍ଦେଶ ଦିଆଯାଇଥିଲା । ସହରର ସମସ୍ତ ରାସ୍ତାଘାଟକୁ ପରିଷ୍କାର ରଖିବା ସହ ରଥ ଯାଉଥିବା ରାସ୍ତା ମାନଙ୍କରେ ଖାଲ ଢିପ ଗୁଡିକୁ ଯଥାଶୀଘ୍ର ମରାମତି କରିବାକୁ ବିଭାଗୀୟ ଅଧିକାରୀ ମାନଙ୍କୁ ନିର୍ଦ୍ଦେଶ ଦିଆଯାଇଥିଲା । ସହରର ମୁଖ୍ୟ ରାସ୍ତା ମାନଙ୍କରେ ଥିବା ଅଚଳ ମରକ୍ୟୁରୀ ଲାଇଟ ର ମରାମତି କରି ସଚଳ କରିବା ଏବଂ ସମସ୍ତ ମନ୍ଦିର ମାନଙ୍କର ପରିସର କୁ ସଫା ସୁତୁରା ,ବ୍ଲିଚିଂ ପାଉଡର ଏବଂ ଫିନାଇଲ ସିଂଚନ ର ବ୍ୟବସ୍ଥା କରିବାକୁ ବଲାଙ୍ଗିର ପୌର ପରିଷଦ ର ନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିଲା । ଏତଦ ବ୍ୟତୀତ ଯାତ୍ରା ସମୟରେ ମନ୍ଦିର ଗୁଡିକରେ ପାନୀୟ ଜଳ ଯୋଗାଣ ,ଶାନ୍ତି ଶୃଙ୍ଖଳା ଓ ଟ୍ରାଫିକ ବ୍ୟବସ୍ଥା ,ରଥ ଯାତ୍ରା ଓ ବାହୁଡା ଯାତ୍ରା ର ଧାରା ବିବରଣୀ ,ଭଜନ ସନ୍ଧ୍ୟା ଆୟୋଜନ ,ଅଗ୍ନିଶମ ସେବା ,ଆଶୁ ଚିକିତ୍ସା ବ୍ୟବସ୍ଥା ସମ୍ପର୍କରେ ଆଲୋଚନା କରାଯାଇଥିଲା । ରଥଯାତ୍ରା ଓ ବାହୁଡାଯାତ୍ରା ଦିନ ରଥ ପରିଚାଳନା ନିମନ୍ତେ ମନ୍ଦିର କମିଟି ଓ ବିଭିନ୍ନ ସରକାରୀ ଅଧିକାରୀ ମାନଙ୍କୁ ଦାୟିତ୍ଵ ପ୍ରଦାନ କରାଯାଇଥିଲା । ବୈଠକରେ ଆଠଗାଁ ଜଗନ୍ନାଥ ମନ୍ଦିର ରଥଯାତ୍ରା ସମ୍ପର୍କରେ ମଧ୍ୟ ଆଲୋଚନା କରାଯାଇଥିଲା । ବୈଠକ ଶେଷରେ ବଲାଙ୍ଗିର ଉପ ଜିଲ୍ଲାପାଳ ତଥା ଦେବୋତ୍ତର କାର୍ଯ୍ୟନିର୍ବାହୀ ଅଧିକାରୀ ଶ୍ରୀ  ନାଗଭୂଷଣ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।