03-Oct-2020

ଟେନସା-୩/୧୦: (ସମୀର କୁମାର ପାଢ଼ୀ)  ସୁନ୍ଦରଗଡ ଜିଲ୍ଲା କୋଇଡା ବ୍ଲକ ର ପାଟମୁଣ୍ଡା ପଞ୍ଚାୟତ ର ପାଟୁଳି ଗ୍ରାମର ବଣ ପାହାଡ଼ ପର୍ବତ ଶିଖରରେ ଥିବା ଗହ୍ମେଇନାଳୀ ପଡା । ଉକ୍ତ   ଗହ୍ମେଇନାଳୀ ପଡାରେ ବସବାସ କରନ୍ତି ମୁଣ୍ଡା ସମ୍ପ୍ରଦାୟର୧୫ରୁ ୨୦ ଆଦିବାସୀ ପରିବାର ର ୧୦୦ରୁ ଉର୍ଦ୍ଧ୍ବ ଲୋକ। ଶିକ୍ଷା, ସ୍ୱାସ୍ଥ୍ୟ, ପାନୀୟ ଜଳ, ବିଦ୍ୟୁତ,ଗମନାଗମନ ଠାରୁ ଆରମ୍ଭ କରି ସବୁ କ୍ଷେତ୍ରରେ ଅବହେଳିତ ହୋଇ ରହିଛି।  କୋଇଡା ଖଣି ଅଞ୍ଚଳରୁ ରାଜ୍ୟ ସରକାର ହଜାର ହଜାର କୋଟି ଟଙ୍କା ରାଜସ୍ୱ ଆଦାୟ  ପାଉଥିବା ବେଳେ ଜିଲ୍ଲା ଖଣିଜ ପାଣ୍ଠି ରୁ  ଅଞ୍ଚଳର ବିକାଶ ନିମନ୍ତେ ଖର୍ଚ୍ଚ  ହେଉଛି କୋଟି କୋଟି ଟଙ୍କା ।ସେହିପରି ଗ୍ରାମର ଉନ୍ନତି ପାଇଁ ବ୍ଲକ ସ୍ତରରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଉଥିବା ବେଳେ ହେଲେ ଗହ୍ମେଇନାଳୀ ପଡା ପ୍ରତି ପ୍ରଶାସନ ର ନଜର ନାହିଁ ।  ସ୍ଵାଧିନତାର ୭୪ ବର୍ଷ ପରେ ମଧ୍ୟ ପହଁଚି ପାରିନି ବିକାଶର ଗାଡି କି କୌଣସି ପ୍ରଶାସନ ଅଧିକାରୀ ଙ୍କ ପାଦ । କୋଇଡା ବ୍ଲକ କାର୍ଯ୍ୟଳୟ ଠାରୁ ମାତ୍ର ୬ କିଲୋମିଟର ଗଲେ ପାଟମୁଣ୍ଡା ପଞ୍ଚାୟତ କାର୍ଯ୍ୟଳୟ । ପଞ୍ଚାୟତ କାର୍ଯ୍ୟଳୟରୁ  ୨ ରୁ ୩ କିଲୋମିଟର ଆଗକୁ ଗଲା ପରେ ପିଚୁ ରାସ୍ତା ଶେଷ ହୁଏ ଆଉ ସେହିଠାରୁ ଆରମ୍ଭ ହୁଏ ଗହ୍ମେଇନାଳୀ ପଡାକୁ ଯିବାକୁ  ବିପଦ ପୁନଃ ରାସ୍ତା ।ପୁଣି ୨ ରୁ ୩ କିଲୋମିଟର ଉକ୍ତ ରାସ୍ତା ରେ ଯିବା ପରେ ପଡେ ପାହାଡିଆ ଘାଟି ରାସ୍ତା ଯେଉଁଠି ପାଦରେ ଚାଲି ଚାଲି ଯିବା କାଠିକର ପାଠ  । ଦୁଇ ଚକିଆ, ଚାରି ଚକିଆ ଯାନ  ପଡା ପାଇଁ ସାତ ସ୍ୱପ୍ନ  । କିନ୍ତୁ ପ୍ରତ୍ୟେକ ଦିନ ଏହି କଚା ରାସ୍ତାରେ ବସ୍ତିର ୧୫ ରୁ ୨୦ ପରିବାର ଜୀବନ ବଞ୍ଚାଇବା ପାଇଁ ସଙ୍ଘର୍ଷ କରିଥାନ୍ତି । ଏମିତିକି ପଂଚାୟତ କାର୍ଯ୍ୟଳୟକୁ ଭତ୍ତା ଟଙ୍କା , ସରକାରୀ ଚାଉଳ ଗହମ ଆଣିବା ପାଇଁ ବୟସ୍କ ମହିଳା ପୁରୁଷ ଏହି ପାହାଡିଆ ପାଥୁରିଆ ରାସ୍ତା ଦେଇ ଗ୍ରାମପାୟତ କୁ  ଯିବା ଆସିବା କରିଥାନ୍ତି ।  ବିଦ୍ୟୁତ ଆଲୋକ କ'ଣ ଜାଣନ୍ତି  ଏହି ପଡା ବାସୀ ।  ଅନ୍ଧାର  ଜଙ୍ଗଲ ରାସ୍ତା ରେ ବେଳେ ବେଳେ ହାତୀ ,ଭାଲୁ , ସରୀସୃପ ଙ୍କ କବଳରୁ ନିଜକୁ ବଞ୍ଚିବା  ପାଇଁ ପଡ଼ାବାସୀ କୁ ସବୁ ସମୟ ସଙ୍ଘର୍ଷ କରିବାକୁ ପଡ଼ିଥାଏ।       ଗହ୍ମେଇନାଳୀ ପଡା ରେ ଅଙ୍ଗନବାଡୀ କେନ୍ଦ୍ର ଓ ବିଦ୍ୟାଳୟ ନାହିଁ ଦୂରରେ ରାହିଥିବାରୁ ପଡାର  ଅଧିକାଂଶ ଶିଶୁ ଅଙ୍ଗନବାଡି ଏବଂ ବିଦ୍ୟାଳୟ ଦେଖିନଥିବା ଜଣାପଡିଛି । ଗହ୍ମେଇନାଳୀ ପଡା ବାସୀ ଙ୍କ କହିବା ଅନୁସାରେ ପାହାଡ଼ ଜଙ୍ଗଲ ରାସ୍ତା ହୋଇଥିବାରୁ ବନ୍ୟଜନ୍ତୁଙ୍କ ଭୟରେ ସେମାନଙ୍କ ପିଲାଙ୍କୁ ଅଙ୍ଗନବାଡି ଓ ବିଦ୍ୟାଳୟକୁ ଯାଆନ୍ତି ନାହିଁ । ଅନ୍ୟପଟେ  ଗହ୍ମେଇନାଳୀ ପଡା ଟି ପର୍ବତ ଶିଖରରେ ରହି ଥିବାରୁ ପାନୀୟ ଜଳର କୌଣସି ସୁବିଧା ନାହିଁ ।ପଡ଼ାବାସୀ ବିଶୁଦ୍ଧ ପାଣି ଟୋପାଏ ପାଇଁ ପାହାଡ ଜଙ୍ଗଲ ଡେଇଁ ଦୁଇ କିଲୋମିଟର ଏକ ଝରଣା ରୁ ପାଣି ଆଣି  ପାନୀୟ ଜଳ ଭାବେ ବ୍ୟବହାର କରିଥାନ୍ତି ।ଏହି ଝରଣା ପାଣି ବ୍ୟବହାର କରି  ବିଭିନ୍ନ ସମୟରେ ରୋଗରେ ପଡ଼ିଥାନ୍ତି ବୋଲି ପଡା ଵାସୀମାନେ ଅଭିଯୋଗ କରିଛନ୍ତି ।ସବୁଠାରୁ ବଡ଼ କଥା ହେଉଛି ଏଠାରେ ବସବାସ କରୁଥିବା ଅଧିକାଂଶ ପରିବାର ର ଶିଶୁ ମାନଙ୍କ ଶରୀର ଗଠନ ଦେଖିଲେ ଅପପୃଷ୍ଟି  ଯେମିତି ପ୍ରତ୍ୟେକ ପରିବାରରେ କବାଟ ଠକ ଠକ କରୁଥିବା ଅନୁମାନ କରି ହେଉଛି । ନିଜର ପରିବାର ପ୍ରତିପୋଷଣ କରିବା ପାଇଁ ନିକଟରେ ଥିବା ଖଣି ଖାଦାନରେ ଦିନ  ମଜୁରୀୟା କାମ କରି ଚଳିଥାନ୍ତି । କରୋନା ମହାମାରୀ କାଳରେ ନିଜର ଜୀବିକା ହରେଇ ଶେଷରେ ଜଙ୍ଗଲ ଜାତ ଦ୍ରବ୍ୟ ସଂଗ୍ରହ କରି ଜୀବନ ବିତାଉଛନ୍ତି ।  ଯାହା ଫଳରେ ପଡ଼ାରେ ଅଧିକାଂଶ ଶିଶୁଙ୍କ ପାଖରେ ପୁଷ୍ଟି ହୀନତା ଥିବା ପରି  ଦେଖାଯାଉଛନ୍ତି ।   ଗହ୍ମେଇନାଳୀ ପଡା ରେ ବାସ କରୁଥିବା ପ୍ରତ୍ୟେକ ଲୋକ ଯେପରି ହାଡ଼ କଙ୍କାଳ  ପରି ପଡିରହିଛନ୍ତି । ଯଦି ତୁରନ୍ତ ଏହି  ଗହ୍ମେଇନାଳୀପଡାକୁ ସରକାରୀ ସୁବିଧା ନ ପହଞ୍ଚେ ତାହେଲେ ଖୁବ୍ ଶୀଘ୍ର ଏ ଗହ୍ମେଇନାଳି ପଡାର ଚିହ୍ନ ବର୍ଣ୍ଣ ଲିଭିଜିବ ବୋଲି ଅନୁମୟ କରାଯାଉଛି ।