24-Dec-2022

ଗଣିଆ(ବିଜଯ ଲଷ୍ମୀ ରାଉତ) ଗଣିଆ ବ୍ଳକ ଅନ୍ତର୍ଗତ ଆଡକଟା ଠାରେ ଥିବା ବନମାଳୀ ବାରିକି ରିଜିଓନାଲ ଡିଗ୍ରୀ ମହାବିଦ୍ୟାଳୟ ପରିସରରେ ଯୁକ୍ତ ଦୁଇ ଏବଂ ତିନି କଳା ଏବଂ ବିଜ୍ଞାନ ଉଭୟ ଶ୍ରେଣୀର ନୂତନ ଛାତ୍ର ଛାତ୍ରୀଙ୍କୁ ସ୍ବାଗତ ଏବଂ ବିଦାୟକାଳୀନ ସମ୍ବର୍ଦ୍ଧନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ମହାବିଦ୍ୟାଳୟର ଅଧ୍ୟକ୍ଷ ସଞ୍ଜୟ କୁମାର ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉକ୍ତ ବୈଠକରେ ମୁଖ୍ୟ ଅତିଥି ଭାବେ ବିଧାୟକ ରମେଶ ଚନ୍ଦ୍ର ବେହେରା ଯୋଗ ଦେଇଥିବା ବେଳେ ଅନ୍ୟ ମାନଙ୍କ ମଧ୍ୟରେ ବ୍ଳକ ଅଧ୍ୟକ୍ଷା ଝୁନା ଜେନା, ପୂର୍ବତନ ବ୍ଳକ ଅଧ୍ୟକ୍ଷ ଶେଷଦେବ ସ୍ବାଇଁ, କନ୍ଧମାଳ ସାଂସଦଙ୍କ ଜିଲ୍ଲା ପ୍ରତିନିଧି ସଦାଶିବ ମିଶ୍ର, ସରପଞ୍ଚ ସୁଭାଷିନୀ ବାରିକି, ଅବସରପ୍ରାପ୍ତ ପ୍ରଫେସର ଗୋପିନାଥ ସାହୁ, ଅବସରପ୍ରାପ୍ତ ପ୍ରଫେସର କୁଳମଣି ବାରିକି, ପରିଚାଳନା କମିଟିର ସଭାପତି କାଶିନାଥ ବାରିକ, ଶିକ୍ଷାବିତ୍ ବାମନ ଚରଣ ବାରିକି ପ୍ରମୁଖ ଉପସ୍ଥିତ ଥିଲେ । ନୂତନ ଛାତ୍ର ଛାତ୍ରୀଙ୍କୁ ଫୁଲ ଚନ୍ଦନ ଦେଇ ନୂତନ ଛାତ୍ର ଛାତ୍ରୀ ସମ୍ବର୍ଦ୍ଧିତ କରିଥିଲେ । ମହାବିଦ୍ୟାଳୟ ତରଫରୁ ଅତିଥି ମାନଙ୍କୁ ଉପଢୌକନ ଦେଇ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା । ଛାତ୍ର ଛାତ୍ରୀ ମାନେ ସେମାନଙ୍କର ଅଭିଭାଷଣରେ ଖେଳପଡିଆ,କମନରୁମ୍,ପରିଶ୍ରାଗାର ନିର୍ମାଣ କରିବାକୁ ଅତିଥି ମାନଙ୍କର ଦୃଷ୍ଟି ଆକର୍ଷଣ କରିଥିଲେ । ଛାତ୍ରୀ ରୋମାଲିନ କରଙ୍କର ଅଭିଭାଷଣରେ ଅତିଥି ମାନେ ଅଭିଭୂତ ହୋଇ ତାଙ୍କୁ ସମ୍ବର୍ଦ୍ଧିତ କରିଥିଲେ । ଅଳସୁଆ, ଲଜ୍ଜା ଏବଂ ଭୟ ତ୍ୟାଗ କଲେ ଜଣେ ଭଲ ଛାତ୍ର ହୋଇପାରିବ ବୋଲି ଅତିଥି ମାନେ ମତବ୍ୟକ୍ତ କରିଥିଲେ । ମହାବିଦ୍ୟାଳୟରେ ଥିବା ସମସ୍ୟା ଗୁଡିକ ଖୁବ୍ ଶିଘ୍ର ସମାଧାନ କରିବାକୁ ଚେଷ୍ଟା କରିବେ ବୋଲି ବିଧାୟକ ଘୋଷଣା କରିଥିଲେ । ଛାତ୍ର ଛାତ୍ରୀ ମାନଙ୍କ ଦ୍ଵାରା ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।