04-Dec-2025

ବଲାଙ୍ଗିର(ପ୍ରେରଣା ଖବର): ରାଜ୍ୟସରକାର ଇତିମଧ୍ୟରେ ୩୦ଟି ନୂତନ ବିଜ୍ଞାପିତ ଅଞ୍ଚଳ ପରିଷଦ(ଏନ୍ ଏ ସି ) ଓ ୮ ଟି ମୁ୍ନିସିପାଲିଟି ଗଠନ କରିଥିବା ତଥ୍ୟ ସୂଚନା ଅଧିକାର  କର୍ମୀ  ହେମନ୍ତ କୁମାର ପଣ୍ଡାଙ୍କୁ  ପ୍ରଦାନ କରିଛନ୍ତି । ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ନିର୍ବାଚନ ଶାଖା ପକ୍ଷରୁ ପ୍ରଦାନ କରାଯାଇଥିବା ତଥ୍ୟକୁ ଆଧାର କରି ପଣ୍ଡା କହିଛନ୍ତି ଯେ, ନୂତନ ୩୦ଟି ଏନ୍ ଏ ସି ଓ ୮ଟି ମୁ୍ନିସିପାଲିଟି  ଗଠନ କରାଯାଇଥିବା କଥା ସରକାର ଘୋଷଣା କରିଥିଲେ ମଧ୍ୟ ୪ଟି ଏନ ଏ ସି ଓ ୧ ଟି ମୁ୍ନିସିପାଲିଟି ପାଇଁ ଅଧିସୂଚନା ଜାରୀ କରାଯାଇ ନଥିବା ଜଣାଯାଇଛି। ସୂଚନା ଅଧିକାର ତଥ୍ୟକୁ ଆଧାର କରି ପଣ୍ଡା କହିଛନ୍ତି ଯେ, ପୌର ଆଇନ ୧୯୫୦ ଅନୁଯାୟୀ ଗତ ୧୬ ଅଗଷ୍ଟ ଦିନ ୧୨ଟି ନୂତନ ଏନଏସି ଯଥା ପାଲଲହଡା, ସିମୂଳିଆ, ବସ୍ତା, ତିହିଡି, ଧୂସୁରି, ବେତନଟି, ବାଙ୍ଗିରିପୋଷି, ଚିତ୍ରଡା, ବିଷମକଟକ, ବାମରା, ରେଙ୍ଗାଲି, ବୀରମହାରାଜପୁର ପାଇଁ ସରକାରୀ ଅଧିସୂଚନା ଜାରି କରିଥିବା ବେଳେ ୧ ସେପ୍ଟେମ୍ବର ଦିନ ୧୩ଟି ଯଥା – ସୋହେଲା, ସାଲେପୁର, ବଡମ୍ବା, ନରସିଂହପୁର, ଗଁଦିଆ, ଜଗନ୍ନାଥପ୍ରସାଦ, ପାତ୍ରପୁର, ନର୍ଲା, ଜୟପାଟଣା, ଟାଙ୍ଗି, ବରିଗୁମ୍ମା ଓ ୨ଟି ମୁ୍ନିସିପାଲିଟି ପୋଲସରା, କରଞିଆ ଗଠନ ପାଇଁ ଅଧିସୂଚନା ଜାରୀ କରିଥିଲେ । କପ୍ତିପଦା ଏନ ଏ ସି ପାଇଁ ୮ ସେପ୍ଟେମ୍ବର ଦିନ, ନୂତନ ମୁ୍ନିସିପାଲିଟି ଆସ୍କା ପାଇଁ ୧୭ ସେପ୍ଟେମ୍ବର, କବିସୂର୍ଯ୍ୟନଗର ୧୦ ଅକ୍ଟୋବର, ଭଞନଗର ୧୪ ଅକ୍ଟୋବର, ବୌଦ୍ଧଗଡ ୧୬ ଅକ୍ଟୋବର, ଛତ୍ରପୁର ପାଇଁ ଯଥାକ୍ରମେ ୩୦ ଅକ୍ଟୋବର ଦିନ ରାଜ୍ୟ ସରକାର ଅଧିସୂଚନା ଜାରୀ କରିଥିଲେ । ଅଧିସୂଚନାରେ ସମ୍ପୃକ୍ତ ଏନ ଏ ସି ଓ ମ୍ୟୁନିସିପାଲିଟି ଅଞ୍ଚଳରେ ସାମିଲ ହେବାକୁ ଥିବା ରାଜସ୍ୱ ଗ୍ରାମ ଗୁଡିକୁ ଚିହ୍ନଟ କରାଯାଇ ସାମିଲ କରିବା ପାଇଁ ପ୍ରସ୍ତାବ ରଖା ଯାଇଛି । କିନ୍ତୁ ବଲାଙ୍ଗିର ଜିଲ୍ଲାର ଲୋଇସିଂହା, ଯାଜପୁରର ଚଣ୍ଡିଖୋଲ, ନୁଆପଡା ଜିଲ୍ଲାର ସିନାପାଲି, କୋମନା, ମୟୁରଭଞ ଜିଲ୍ଲାର ଯଶିପୁର ଏନ ଏ ସି ଏବଂ ନୁଆପଡାର ଖରିଆର ରୋଡ ମୁ୍ୟନିସିପାଲିଟି ଗଠନ ପାଇଁ ଅଧିସୂଚନା ଜାରୀ କରାଯାଇନଥିବା ତଥ୍ୟରୁ ଜଣା ପଡିଛି ବୋଲି ସୂଚନା କର୍ମୀ ପଣ୍ଡା କହିଛନ୍ତି । ନୁଆପଡା ନିର୍ବାଚନ ପ୍ରକ୍ରିୟା ସମାପ୍ତ ହୋଇଥିଲେ ମଧ୍ୟ କେତେକ ଏନ ଏ ସି ଓ ମୁ୍ନିସିପାଲିଟି ଗଠନ ପାଇଁ ପୌର ଆଇନ ଅନୁଯାୟୀ ଅଧିସୂଚନା ଜାରୀ କରାଯାଇ ନାହିଁ । ସିନାପାଲି, କୋମନା ଏନ ଏ ସି ଓ ଖରିଆର ରୋଡ ମୁ୍ନିସିପାଲିଟି ପାଇଁ  ନୁଆପଡା ଜିଲ୍ଲାପାଳଙ୍କ ରିପୋର୍ଟ ପ୍ରଦାନ କରି ନଥିବା ତଥ୍ୟରୁ ଜଣାଯାଇଛି ।