03-Dec-2025

ବଲାଙ୍ଗିର,  ବିଶ୍ୱ ସାହିତ୍ୟ କ୍ଷେତ୍ରରେ  ନୋବେଲ ପୁରସ୍କାର ସର୍ବଶ୍ରେଷ୍ଠ ସମ୍ମାନ I  ନୋବେଲ ପୁରସ୍କାରପ୍ରାପ୍ତ  ସାହିତ୍ୟିକ ସର୍ବୋଚ୍ଚ ମର୍ଯ୍ୟାଦାର ଅଧିକାରୀ I ତାଙ୍କ ସାହିତ୍ୟିକ କୃତି ଓ କୃତିତ୍ୱ ସମ୍ପର୍କରେ  ଅବଗତହେବା ପ୍ରତ୍ୟେକ ସାହିତ୍ୟାନୁରାଗୀ ପାଇଁ ବେଶ୍  ଗୁରୁତ୍ୱପୂର୍ଣ୍ଣ I  ଏକ୍ରମରେ ବିଗତ ବର୍ଷମାନଙ୍କ ଭଳି ଚଳିତବର୍ଷ ମଧ୍ୟ ସରକାରୀ ମହିଳା ମହାବିଦ୍ୟାଳୟ ବଲାଙ୍ଗିର ର  ଇଂରାଜୀ ଭାଷା ଓ ସାହିତ୍ୟ  ବିଭାଗର  ଉଦ୍ୟମକ୍ରମେ  ଚଳିତ ବର୍ଷର  ନୋବେଲ ପୁରସ୍କାର ପ୍ରାପ୍ତ ସାହିତ୍ୟିକ  ଲାରିଲୋ କ୍ରାଜନାହୋରକାଇଙ୍କ ସାହିତ୍ୟିକ ଜୟଯାତ୍ରା ସମ୍ପର୍କରେ ଏକ ବିଚାର ବିମର୍ଶ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି  I   ସମ୍ପୃକ୍ତ କାର୍ଯ୍ୟକ୍ରମରେ ଅଧ୍ୟକ୍ଷ ଡ଼ଃ ଅରବିନ୍ଦ କୁମାର ଭାବରେ ଓଝା  ସଭାପତିତ୍ୱ କରିଥିବାବେଳେ  ବିଭାଗୀୟ ମୁଖ୍ୟ ଶ୍ରୀ ସଲୋମନ  କୁମାର ସ୍ୱାଗତ ଭାଷଣ ଦେଇଥିଲେ I  ଏ ସକାଶେ ମୁଖ୍ୟବକ୍ତା ଭାବରେ ମହିଳା ମହାବିଦ୍ୟାଳୟ, ଝାରସୁଗୁଡାର ଇଂରାଜୀ ଅଧ୍ୟାପକ ଶ୍ରୀ ଅଂଶୁମାନ ମିତ୍ର ଯୋଗଦେଇ ନୋବେଲ ବିଜେତାଙ୍କ ବ୍ୟକ୍ତିତ୍ୱ ଏବଂ ସାହିତ୍ୟିକ କୃତି ତଥା ରାଜନୈତିକ ପ୍ରଭାବ ସମ୍ପର୍କରେ ବିଶଦ ଆଲୋଚନା କରିଥିଲେ I  ଏହା ସହ ବିଭାଗୀୟ  ଛାତ୍ରୀ ରୁକ୍ମିଣୀ ସରାଫ ଏବଂ ରିତିକା ପାଣିଗ୍ରାହୀ  ପ୍ରମୁଖ କ୍ରାଜନାହୋରକାଇଙ୍କ ସମ୍ପର୍କରେ ନିଜ ନିଜ ବକ୍ତବ୍ୟ ଉପସ୍ଥାପନ କରିଥିଲେ I ଏହି ସାରସ୍ୱତ କାର୍ଯ୍ୟକ୍ରମରେ ଡ଼ଃ ଅନୁରାଧା ମିଶ୍ର ଅତିଥି ପରିଚୟ ପ୍ରଦାନ କରିଥିବାବେଳେ ଶେଷରେ ସାମ୍ରାଜ୍ଞୀ ମିତ୍ର  ଧନ୍ୟବାଦ ଅର୍ପଣ କରିଥିଲେ I