05-Nov-2025

ଗଣିଆ(ବିଜୟଲକ୍ଷ୍ମୀ ରାଉତ): କାର୍ତ୍ତିକ ମାସକୁ ଧର୍ମମାସ ବୋଲି ବିବେଚନା କରାଯାଏ । ଏହି ଅବସରରେ ପୁରପଲ୍ଲୀରେ ଥିବା ବିଭିନ୍ନ ମନ୍ଦିରରେ ପୂଜାର୍ଚ୍ଚନା, ଦୀପଦାନ, ସଂକୀର୍ତ୍ତନ, ନାମ ଯଜ୍ଞ ଆଦି ଅନୁଷ୍ଠିତ ହେଉଅଛି । ନୟାଗଡ଼ ଜିଲ୍ଲା ଗଣିଆ ବ୍ଲକ କିଶୋର ପ୍ରସାଦ ଗ୍ରାମପଞ୍ଚାୟତରେ ଥିବା ଶିବ ମନ୍ଦିର ପରିସରରେ କାର୍ତ୍ତିକ ମାସରେ ପଞ୍ଚୁକ ପାଞ୍ଚଦିନ ଦୀପଦାନ ଉତ୍ସବ ପାଳିତ ହୋଇ ଆସୁଅଛି । ଆଜି ପଞ୍ଚୁକର ଶେଷ ଦିନ ହୋଇଥିବାରୁ ଆଖପାଖର ପ୍ରାୟ ୨ ହଜାରରୁ ଅଧିକ ଭକ୍ତଙ୍କ ସମାଗମ ହୋଇଥିଲା । ସନ୍ଧ୍ୟାରେ ମହାଦୀପ ଉଠିବା ପରେ ହରିବୋଲ ହୁଳହୁଳିରେ କମ୍ପି ଉଠିଥିଲା ମନ୍ଦିର ପରିସର । ଖୋଳ କୀର୍ତ୍ତନ କରି ମାନସିକ ଧାରୀ ଭକ୍ତମାନେ ବେଢ଼ା ପରିକ୍ରମା କରିଥିଲେ । ଦିନ ତମାମ ଏଠାରେ ମହିଳା ସଂକୀର୍ତ୍ତନ ମଣ୍ଡଳୀ ସଂକୀର୍ତ୍ତନ ପରିବେଷଣ କରିଥିଲେ । ଆବାଳବୃଦ୍ଧବନିତା ଏହି ଦୀପଦାନ ଉତ୍ସବରେ ସାମିଲ ହୋଇ ପ୍ରଭୁ ଚରଣରେ ଭକ୍ତିପୂତ ଶ୍ରଦ୍ଧାଂଜଳି ଜ୍ଞାପନ କରିଥିଲେ । ଏତେ ସଂଖ୍ୟକ ଭକ୍ତ ଶାନ୍ତି ଶୃଙ୍ଖଳାର ସହିତ ପ୍ରଭୁଙ୍କୁ ଦର୍ଶନ କରିବା ସହିତ ପ୍ରସାଦ ସେବନ କରିଥିଲେ । ମନ୍ଦିର ପରିଚାଳନା କମିଟି ତଥା ଗ୍ରାମବାସୀଙ୍କ ସହଯୋଗରେ ଏହି କାର୍ଯ୍ୟକ୍ରମ ଧୁମଧାମରେ ପାଳିତ ହୋଇଯାଇଛି ।