03-Nov-2025

ବଲାଙ୍ଗୀର(ପ୍ରେରଣା ଖବର) ସମାଜର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ବଲାଙ୍ଗୀର ଜିଲ୍ଲା ଓକିଲ ସଂଘ ପକ୍ଷରୁ ବଲାଙ୍ଗୀର ଜିଲ୍ଲାର କିଛି ବ୍ୟକ୍ତବିଶେଷଙ୍କୁ ସମ୍ବଦ୍ଧିତ କରାଯିବାକୁ ନିଷ୍ପତ୍ତି ଗ୍ରହଣ କରାଯାଇଛିି । ଏଥିରେ ମୁଖ୍ୟଅତିଥି ଭାବରେ ପୂର୍ବତନ ମନ୍ତ୍ରୀ ତଥା ପୂର୍ବତନ ବଲାଙ୍ଗୀର ବିଧାୟକ ନରସିଂହ ମିଶ୍ର ଯୋଗ ଦେବାର କାର୍ଯ୍ୟକ୍ରମ ରହିଛି । ସାହିତ୍ୟ, ସାମ୍ବାଦିକତା, ନୃତ୍ୟ, ଗୀତ, କ୍ରୀଡା ଓ କ୍ଷେତ୍ରରେ ଉତ୍କର୍ଷ ଲାଭ କରି ବଲାଙ୍ଗୀର ମାଟି ପାଇଁ ସୁନାମ ଆଣିଥିବା ୧୭ଜଣ ପ୍ରତିଭାଙ୍କୁ ଜିଲ୍ଲା ଓକିଲ ସଂଘ ପକ୍ଷରୁ ମାନପତ୍ର ଓ ଉପାୟନ ଦେଇ ସମ୍ବର୍ଦ୍ଧତ କରଯିବାକୁ ନିଷ୍ପତ୍ତି ଗ୍ରହଣ କରାଯାଇଛି । ଆସନ୍ତା ନଭେମ୍ବର ୮ ତାରିଖ ସକାଳ ୧ଠଟାରେ ସ୍ଥାନୀୟ ସିଭିଲ କୋର୍ଟ ବାର୍ ହଲ୍ ଠାରେ ଅନୁଷ୍ଠିତ ଏହି ସମ୍ବର୍ଦ୍ଧନା ଉତ୍ସବକୁ କିପରି ସୁଚାରୁ ରୂପରେ ପାଳନ କରାଯାଇପାରିବ ସେ ନେଇ ଆଜି ସଂଘର ସଭାପତି ବାସୁଦେବ ରଥଙ୍କ ଆବାହକତ୍ୱରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା । କାର୍ଯ୍ୟକ୍ରମର ସଫଳ ଆୟୋଜନ ପାଇଁ ସଂଘର ବିଭିନ୍ନ ସଦସ୍ୟଙ୍କୁ ଦାୟିତ୍ୱ ହସ୍ତାନ୍ତରଣ କରାଯାଇଥିଲା । ଏହି ପ୍ରସ୍ତୁତି ବୈଠକ ରେ ସଂଘର ସଂପାଦକ ସଂଜୟ ବଗର୍ତ୍ତି, ଉପସଭାପତି ସୁଧାଂଶୁ ଦେଓ, କୋଷାଧ୍ୟକ୍ଷ ସମୀର ମିଶ୍ର, ଯୁଗ୍ମ ସଂପାଦକ ସୁମିତ ଖୁଆସ, କାର୍ଯ୍ୟକାରୀ କମିଟି ସଭ୍ୟ ସରୋଜ ଗୁପ୍ତା, ରାଜେନ୍ଦ୍ର ମିଶ୍ର, ସଂଜୟ ଭୋଇ, ମଳୟ ଗଡତ୍ୟା, ସବିତାରଣୀ ମିଶ୍ର, ଦୀପ୍ତି ଶର୍ମା ଓ ରଘୁନନ୍ଦନ ସିଂହ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ ।