29-Oct-2025

ବଲାଙ୍ଗୀର- ପୂର୍ବରୁ ସଦେଇପାଲି ବିସ୍ଥାପିତ କଲୋନୀବାସୀ ପାଣିୟଜଳ ପାଇଁ ଆନ୍ଦୋଳନକୁ ଓହ୍ଲାଇ ମୁଖ୍ୟନିର୍ମାଣଯନ୍ତ୍ରୀଙ୍କ କାର୍ଯ୍ୟାଳୟ ଘେରାଉ କରିଥିଲେ । ଆଉ ଏବେ ଝାଙ୍କରପାଲି ମୌଜାରେ ନୂଆକରି ଗଢିଉଠିଥିବା ଗଡଶଙ୍କରଡୁଙ୍ଗୁରିପାଲି ବିସ୍ଥାପିତ କଲୋନୀରେ ସ୍କୁଲ ଓ ପାନୀୟଜଳ ସୁବିଧା ନଥିବାରୁ କଲୋନୀବାସୀ ଆନ୍ଦୋଳନକୁ ଓହ୍ଲାଇଛନ୍ତି । ଶହଶହ ସଂଖ୍ୟାରେ ବିସ୍ଥାପିତମାନେ ଆଜି ସକାଳ ୮ଟାରେ ବଲାଙ୍ଗୀର-ପାଟଣାଗଡ ରାଜ୍ୟରାଜପଥ-୪୬କୁ ଦୀର୍ଘ ଦୁଇଘଣ୍ଟା କାଳ ଅବରୋଧ କରିଥିଲେ । ଫଳରେ ଶହଶହ ସଂଖ୍ୟାରେ ଗାଡି ଯିବାଆସିବା କରିନପାରି ରାସ୍ତାର ଉଭୟପଟେ ଅଟକି ରହିଥିଲା । ବିସ୍ଥାପିତମାନେ ଅଭିଯୋଗ କରିଛନ୍ତି ଯେ, ସରକାରଙ୍କ ପ୍ରତିଶୃତି ପ୍ରତାରଣା ପାଲଟିଯାଇଛି । ବର୍ଷ ବର୍ଷ ଧରି କେବଳ ପ୍ରତିଶୃତି ଦିଆଯାଇ ବିସ୍ଥାପିତ ପରିବାରମାନଙ୍କୁ କେବଳ ଠକାଯାଉଛି ବୋଲି ଅଭିଯୋଗ ଉଠାଇଛନ୍ତି । ବିସ୍ଥାପିତଙ୍କ ଦୁଃଖ ବଢିଚାଲିଛି । ତେବେ ଆସନ୍ତା ୭ଦିନ ମଧ୍ୟରେ ସମସ୍ୟାର ସମାଧାନ କରିବାକୁ ବଲାଙ୍ଗୀର ଉପଜିଲ୍ଲାପାଳ ଆଲୋକ ପଟେଲ ପ୍ରତିଶୃତି ଦେବାପରେ ରାସ୍ତା ଅବରୋଧ ହଟିଥିଲା ।
  ପ୍ରକାଶ ଯେ,ବଲାଙ୍ଗୀର ଜିଲ୍ଲାର ମାଗୁରବେଢାଠାରେ ଲୋୟରସୁକତେଲ ଜଳସେଚନ ପ୍ରକଲ୍ପରେ ୨୯ଖଣ୍ଡ ଗ୍ରାମର ୧୧ହଜାର ପରିବାର ବିସ୍ଥାପିତ ହୋଇଛନ୍ତି । ଏମାନଙ୍କ ପାଇଁ ପ୍ରାୟ ୮ଟି କଲୋନୀରେ ନିର୍ମାଣ କରାଯାଇ ଥଇଥାନ କରାଯାଇଛି । ତେବେ କୌଣସି ବିସ୍ଥାପିତ କଲୋନୀରେ ଆବଶ୍ୟକ ମୌଳିକ ସୁବିଧା ନାହିଁ । ନୀୟମ କହୁଛି ବିସ୍ଥାପିତମାନଙ୍କ ପାଇଁ ଥଇଥାନ କଲୋନୀରେ ଆବଶ୍ୟକ ଶିକ୍ଷା,ସ୍ୱାସ୍ଥ୍ୟ,ପାନୀୟଜଳ,ଗମନାଗମନର ସୁବିଧା କରାଯାଇ ସେମାନଙ୍କୁ ସସମ୍ମାନେ ବିସ୍ଥାପିତ କରାଯିବ । କିନ୍ତୁ ଗତ ୨୦୨୩ ମସିହାରେ କୌଣସି ମୌଳିକ ସୁବିଧା ନଥାଇ ଡେମରେ ପାଣିରଖି ପୋଲିସ ଲଗାଇ ବିସ୍ଥାପିତ ପରିବାରମାନଙ୍କୁ ଭୟଦେଖାଇ ପ୍ରଶାସନ ବିସ୍ଥାପିତ କରିଦେଇଥିଲା । ସେହିଦିନରୁ ଆଜି ପର୍ଯ୍ୟନ୍ତ ବିସ୍ଥାପିତ ପରିବାରମାନେ ପିଲାଛୁଆକୁ ଧରି ଆସି କଲୋନୀରେ ରହିଛନ୍ତି । ବୁଡିଥିବା ଗ୍ରାମ ମଧ୍ୟରେ ଐତିହ୍ୟସମ୍ପନ୍ନ ସର୍ବବୃହତ ଗ୍ରାମ ଗଡଶଙ୍କରଡୁଙ୍ଗୁରୀପାଲି ଗ୍ରାମବାସୀଙ୍କୁ ଆଣି ସଦରବ୍ଲକ ଅନ୍ତର୍ଗତ ଝାଙ୍କରପାଲିଠାରେ ରଖାଗଲା । ବଲାଙ୍ଗୀର-ପାଟଣାଗଡ ରାସ୍ତାକଡରେ ଏକ ଜଙ୍ଗଲଜମିକୁ ସମତୁଳ କରି କଲୋନୀ ନିର୍ମାଣ ହେଲା । ଲୋକମାନଙ୍କୁ ଆଣି ପ୍ରଥମେ ଟିଣଘରେ ରଖାଗଲା । ବହୁକଷ୍ଟରେ ଲୋକମାନେ ଭୟରେ ରହିଲେ । କିନ୍ତୁ କଲୋନୀରେ ଆଜି ପର୍ଯ୍ୟନ୍ତ ସ୍କୁଲଟିଏ କିମ୍ବା ପାନୀୟଜଳର ବ୍ୟବସ୍ଥା କରାଯାଇ ପାରିଲା ନାହିଁ । ପ୍ରାୟ ୩୦୦ ପରିବାରକୁ ଏଠାରେ ରଖାଯାଇଥିବା ବେଳେ ଏପର୍ଯ୍ୟନ୍ତ କୌଣସି ମୌଳିକ ସୁବିଧା କରାଯାଇ ପାରିନାହିଁ । ପ୍ରଶାସନ ମିଥ୍ୟା ପ୍ରତିଶୃତି ଦେଇ ଚାଲିଥିଲା । କିନ୍ତୁ ଶେଷରେ ଆଜି ଲୋକମାନେ ତାତିଲେ । ପ୍ରଶାସନକୁ ଆଉ ଭରସା ନକରି ରାଜରାସ୍ତାକୁ ଓହ୍ଲାଇଲେ । ଆଜି ସକାଳ ପ୍ରାୟ ୮ଟାରୁ ୧୦.୧୫ ପର୍ଯ୍ୟନ୍ତ ୨ଘଣ୍ଟାରୁ ଉର୍ଦ୍ଧ୍ୱ ସମୟ ଧରି ରାଜ୍ୟରାଜପଥକୁ

କଲୋନୀ ପାଖରେ ଅବରୋଧ କରିବ ରଖିଥିଲେ । ବଲାଙ୍ଗୀର ଉପଜିଲ୍ଲାପାଳ ଆଲୋକ ପଟେଲ ଓ ସଦର ଆଇଆଇସି ପହଞ୍ଚି ସେମାନଙ୍କ ସହିତ ଆଲୋଚନାକରି ପ୍ରତିଶୃତି ଦେବାପରେ ରାସ୍ତା ଅବରୋଧ ହଟିଥିଲା । ଆସନ୍ତା ୭ଦିନ ଭିତରେ ବିସ୍ଥାପିତଙ୍କ ସମସ୍ୟାର ସମାଧାନ କରାଯିବ ବୋଲି ପ୍ରଶାସନ ପକ୍ଷରୁ ପ୍ରତିଶୃତି ଦିଆଯାଇଛି । ତେବେ ଗଡଶଙ୍କରଡୁଙ୍ଗୁରୀପାଲିରେ ପ୍ରଥମରୁ ଦଶମ ପର୍ଯ୍ୟନ୍ତ ସ୍କୁଲ ଥିଲା । ଏହା ସହିତ ସୁକତେଲ ନଦୀରୁ ପାଇପ ଯୋଗେ ପାନୀୟଜଳ ଯୋଗାଣ ବ୍ୟବସ୍ଥା ଥିଲା । କିନ୍ତୁ ଯେଉଁ ପ୍ରକଲ୍ପ ପାଇଁ ହଜାର ହଜାର ଲୋକ ବିସ୍ଥାପିତ ହେଲେ ସେହି ବିସ୍ଥାପିତ ପରିବାରକୁ ଆଉ ପାଣି ମୁନ୍ଦିଏ ମଧ୍ୟ ପିଇବାକୁ ମିଳୁନାହିଁ । କେବଳ ନଳକୂଅ ଉପରେ ଭରସା କରିବାକୁ ପଡୁଛି ବୋଲି ବିସ୍ଥାପିତ କଲୋନୀବାସୀ କ୍ଷୋଭପ୍ରକାଶ କରିଛନ୍ତି । ସେହିପରି ଗାଁରେ ସ୍କୁଲରେ ପଢୁଥିବା ଛାତ୍ରଛାତ୍ରୀ ଦୀର୍ଘ ୩କିମି ଦୂରକୁ ସିଆଲବାହାଲି କିମ୍ବା ଅନ୍ୟ ଗାଁର ସ୍କୁଲକୁ ଯିବାକୁ ପଡୁଛି । ଅଭିଭାବକମାନେ ରୋଜଗାର ପାଇଁ ଯିବେ ନାଁ ସ୍କୁଲକୁ ପିଲାଙ୍କୁ ପାଠପଢାଇନେବେ ବୋଲି ପ୍ରଶ୍ନ କରୁଛନ୍ତି । ଆଜି ଏହି ଆନ୍ଦୋଳନରେ ଗଡଶଙ୍କରଡୁଙ୍ଗୁରୀପାଲି କଲୋନୀର ଯଜେ୍ଞଶ୍ୱର ବିଶ୍ୱାଳ,ବିନାୟକ ସାହୁ,ରାମପ୍ରସାଦ ଚାନ୍ଦ,ମୀନକେତନ ଚାନ୍ଦ,ଭରତ ସାହୁ,ବୁଡିଅଞ୍ଚଳ ସଂଗ୍ରାମ ପରିଷଦର ସତ୍ୟ ବନଛୋରଙ୍କ ସହିତ ଶତାଧିକ ପୁରୁଷ,ମହିଳା ତଥା ଛାତ୍ରଛାତ୍ରୀମାନେ ସାମିଲ ଥିଲେ ।