21-Mar-2025

ଟିଟିଲାଗଡ: ବେଲଗାଁ-ରିଗଡୁଲ ଜାତୀୟରାଜପଥ ସଂପ୍ରସାରଣର ରାସ୍ତାପାର୍ଶ୍ବ ଉଚ୍ଛେଦ କ୍ଷତିପୂରଣ  ପ୍ରଦାନରେ ଅଧିକାରୀଙ୍କ ଜ୍ଞାତସାରରେ ବେଆଇନ ଭାବରେ ଲକ୍ଷାଧିକ ଟଙ୍କାର ହେରଫେର ହୋଇଥିବାର ଏକ ଘଟଣାର ଚର୍ଚ୍ଚା ହେଉଛି ।

ଏହି ଏନ୍ ଏଚ୍-୫୮  ରାସ୍ତାର ବିଜେପୁର ପଞ୍ଚାୟତର  ତରାସିଂହା ଗ୍ରାମର ରାସ୍ତାପାର୍ଶ୍ବରେ ଥିବା ଅନୁସୂଚିତ ଜାତିର  ସ୍ଵର୍ଗତ ଶିବଶଙ୍କର ନାଗଙ୍କ ମୌଜା- ତରାସିଂହାର ଖାତା ନଂ ୧୬୪/୨୪୮ ର ପ୍ଲଟ୍ ନଂ ୭୫୦ ର କଥିତ କିସମ ଘରବାରି ମାଲମାମୁଲି ୧୪ ଡେସମିଲ୍ ଜମିରେ ସେହି ଗ୍ରାମର ଜଣେ ଶୁଣ୍ଢିଜାତିର ଲୋକ ଦନାର  ବେହେରାଙ୍କ ଘର ଥିଲା । ତେବେ ଏହି ଅଣରେଜିଷ୍ଟ୍ରିକୃତ ଜମିରେ ଥିବା ଘରର ଆଗପଟର କିଛିଅଂଶକୁ ଏହି ରାସ୍ତାର ପ୍ରଶସ୍ତୀକରଣ  ସକାଶେ ଭଙ୍ଗାଯାଇଛି । ତତ୍କାଳୀନ କଣ୍ଟବାଞ୍ଜିର ଟିଟିଲାଗଡ ଦାୟିତ୍ବରେ ଥିବା ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ଇଂ ଦିଲେଶ୍ଵର  ମାଝି ଏହାର ୭୦ ଲକ୍ଷରୁ ଉର୍ଦ୍ଧ୍ବ ଅତିରିକ୍ତ ମୂଲ୍ୟାୟନ କରିଥିବା ଓ ଏହି ଅନୁଯାୟୀ ଟିଟିଲାଗଡ  ଉପଜିଲ୍ଲାପାଳଙ୍କ ଅଧୀନସ୍ଥ ଅସ୍ଥାୟୀ ଭୂ-ଅର୍ଜନ ଅଧିକାରୀ ବା ଆର୍ ଆଇଙ୍କ ଦ୍ବାରା ବଲାଙ୍ଗୀର  ଜାତୀୟରାଜପଥ ବିଭାଗ , ଭୁବନେଶ୍ବର ବିଭାଗୀୟ କର୍ତ୍ତୃପକ୍ଷ ଓ କୋଲକାତାର ମୁଖ୍ଯ କାର୍ଯ୍ଯାଳୟ କର୍ତ୍ତୃକ ଅନୁମୋଦନ କ୍ରମେ ୰ ଶିବଶଙ୍କର ନାଗଙ୍କ  ବିଧବାପତ୍ନୀ ଜ୍ୟୋତ୍ସ୍ନାମୟୀ ନାଗଙ୍କୁ ମାର୍ଫତଦାର ଦନାର  ବେହେରାଙ୍କୁ ମୋଟ ୭୦ ଲକ୍ଷ  ୩୪ ହଜାର ୧୦୫ ଟଙ୍କାରୁ ଟିଡିସି କଟି ୬୩ ଲକ୍ଷ ୩୦ ହଜାର ୮୩୩ ଟଙ୍କା ସ୍ଥାନୀୟ  ଟିଟିଲାଗଡ ଏକ୍ସିସ୍ ବ୍ୟାଙ୍କ ଜରିଆରେ ଅନ୍ ଲାଇନ୍ ରେ କ୍ଷତିପୂରଣ ରାଶି ପ୍ରଦାନ  କରାଯାଇଥିବା ପ୍ରକାଶ । ଏ ସମ୍ପର୍କରେ ଆର.ଆଇ  କ୍ଷୀରସିନ୍ଧୁ ବାରିକ ପ୍ରକାଶ  କରିଛନ୍ତି।  ତେବେ ଏନେଇ ସମ୍ପୃକ୍ତ  ଅଞ୍ଚଳରେ ବିଭିନ୍ନ ଚର୍ଚ୍ଚା ହେଉଛି । ଯଦିଓ ଉକ୍ତ ଆର୍.ଆଇ ଓ ସମ୍ପୃକ୍ତ ପକ୍ଷରୁ ଏଥିନେଇ କୌଣସିପ୍ରକାର ଅନିୟମିତତା ହୋଇ ନ ଥିବାର କହୁଥିବା ବେଳେ ତରାସିଂହାର ବିଜେପୁର ପୂର୍ବତନ ସରପଞ୍ଚ  ସୁବାସ ମହାନନ୍ଦ ଏହି କାରବାର ଉଭୟଙ୍କ ଆପୋଷ ବୁଝାମଣାରେ ହୋଇଥିବା କହିଛନ୍ତି । 

ତେବେ ଏହି ରାସ୍ତା ସମେତ ସତୀଘାଟ- ଚାରଭଟା ରାସ୍ତାର  କ୍ଷତିପୂରଣ  ସମ୍ପର୍କ ରେ ମଧ୍ଯ  ଉଚ୍ଚସ୍ତରୀୟ ଯାଞ୍ଚର ଆବଶ୍ୟକତା ରହିଥିବା ଲୋକେ ସରକାରଙ୍କର  ଦୃଷ୍ଟିଆକର୍ଷଣ କରିଛନ୍ତି ।   

ଉଲ୍ଲେଖଯୋଗ୍ଯ  ଯେ, ଏହି ବେଲଗାଁ-ରିଗଡୁଲ ଜାତୀୟ ରାଜପଥ ସଂପ୍ରସାରଣର କ୍ଷତିପୂରଣ ପ୍ରଦାନ  ସକାଶେ ୧୭୭ଟି କେସ୍ ର  ମୋଟ ୫  କୋଟି ୫୭ ଲକ୍ଷ  ୬୮, ୮୮୬ ଟଙ୍କାରୁ ଅଦ୍ୟାବଧି ୩ କୋଟି ୯୩ ଲକ୍ଷ ୫୨, ୫୨୦ ଏବଂ ସତୀଘାଟ-ଚାରଭଟା ରାସ୍ତାର ମଧ୍ଯ ୧୧୭ଟି କେସ୍ ର ମୋଟ ୨୨ କୋଟି ୮୩ ଲକ୍ଷ ୭୫, ୫୪୦ ଟଙ୍କା ଓ ୭୫ % ପ୍ରଦାନ  କରାଯାଇ  ସରିଥିବା  ଉକ୍ତ ଆର.ଆଇଙ୍କ ସୂତ୍ରରୁ ପ୍ରକାଶ । ତେବେ ଏହି କୋଟିକୋଟି ଟଙ୍କାର  କ୍ଷତିପୂରଣ ପ୍ରଦାନ ନିମନ୍ତେ ଏଭଳି ୬ମାସିଆ ଅବସରପ୍ରାପ୍ତ  କର୍ମଚାରୀଙ୍କ ନିଯୁକ୍ତି ସହିତ ଏଭଳି ଚର୍ଚ୍ଚାର କାରଣ ଦିଗରେ ସରକାର ସତର୍କ  ରହିବାକୁ ଜନସାଧାରଣ ଦାବି କରିଛନ୍ତି ।